Evrópska sjúkratryggingakortið veitir rétt til heilbrigðisþjónustu í öðrum EES-löndum, Bretlandi og Sviss. Korthafi greiðir sama gjald fyrir heilbrigðisþjónustuna og íbúar landsins. 

Sækja þarf um sjúkratryggingu þegar flutt er til Íslands. Þeir sem flytja til Íslands frá öðrum löndum en Norðurlöndum eða EES-löndum þurfa almennt að bíða í 6 mánuði áður en þeir verða sjúkratryggðir á Íslandi.  

Þegar lögheimili er flutt frá Íslandi falla sjúkratryggingar á Íslandi sjálfkrafa strax niður nema um námsmenn sé að ræða. 

Ef ferðamaður þarf að greiða fyrir læknaþjónustu erlendis þá getur hann átt rétt á endurgreiðslu. 

Frá EES-landi 

Ferðamenn greiða sama gjald og sjúkratryggðir einstaklingar hér á landi ef þeir framvísa Evrópska sjúkratryggingakortinu auk vegabréfs sem staðfestir ríkisfang viðkomandi. 

Ferðamenn frá öðrum löndum utan EES 

Ríkisborgarar landa utan EES greiða gjald fyrir þjónustuna sem ákveðið er í reglugerð um heilbrigðisþjónustu fyrir þá sem eru ekki sjúkratryggðir. 

Sjúkratryggðir einstaklingar á Íslandi sem tala ekki íslensku eða nota táknmál eiga rétt á túlkaþjónustu sem Sjúkratryggingar greiða fyrir.  

Túlkaþjónustan er til að aðstoða þá við að skilja upplýsingar um heilsufar og opinbera heilbrigðisþjónustu.  

Heilbrigðisstarfsmaður metur þörf á túlkaþjónustu og skipuleggur notkun þjónustunnar.  

Sjúkratryggingar geta tekið þátt í kostnaði við fyrir fram ákveðnar læknismeðferðir erlendis ef: 

• Ekki er hægt að fá meðferðina á Íslandi

• Of löng bið er eftir meðferð á Íslandi

• Einstaklingur vill nýta sér læknisþjónustu í öðru EES landi

S1-vottorð er staðfesting á sjúkratryggingu einstaklings í fyrra búsetulandi. Með því að sækja um S1-vottorð verður einstaklingur sjúkratryggður í nýja búsetulandinu og fær þá sömu þjónustu og aðrir sjúkratryggðir einstaklingar í því landi. Einstaklingurinn heldur þó einnig áfram að vera sjúkratryggður á Íslandi. 

Ísland er með samninga varðandi almannatryggingu við: 

• Lönd í Evrópska efnahagssvæðinu (EES)

• Sviss

• Bretland

Samningarnir taka meðal annars fyrir: 

• Greiðslur bóta einstaklinga sem búa erlendis

• Hvernig á að taka tillit til búsetu-, atvinnu- og tryggingatíma sem hafa safnast upp í samningsríkjum

• Jafnræði ríkisborgara í samningsríkjum