Reglugerð um frádrátt frá tekjum erlendra sérfræðinga.

1. gr. Gildissvið og markmið.

Reglugerð þessi gildir um frádrátt frá tekjum erlendra sérfræðinga skv. 6. tölul. A-liðar 1. mgr. 30. gr. laga nr. 90/2003, um tekjuskatt. Markmiðið er að laða að erlenda sérfræðinga sem búa yfir nauðsynlegri þekkingu og hæfni til starfa hér á landi og með því að gera fyrirtækjum auðveldara fyrir að fá til sín slíka aðila svo að ekki þurfi að fara með viðkomandi starfsemi úr landi.

2. gr. Erlendur sérfræðingur og skilyrði frádráttar.

Erlendum sérfræðingum, sem ráðnir eru til starfa hér á landi frá og með 1. janúar 2017 og eru skattskyldir á grundvelli 1. gr. eða 1. tölul. 3. gr. laga nr. 90/2003, um tekjuskatt, er heimilt fyrstu þrjú árin frá ráðningu í starf að draga 25% frá tekjum skv. 1. tölul. A-liðar 7. gr. laganna, sem greidd eru fyrir sérfræðistörf enda séu skilyrði 2. og 3. mgr. uppfyllt.

Erlendur sérfræðingur, óháð ríkisborgararétti, í skilningi reglugerðar þessarar, sbr. einnig 6. tölul. A-liðar 1. mgr. 30. gr. laga nr. 90/2003, um tekjuskatt, skal uppfylla eftirfarandi skilyrði:

1. hann hafi ekki verið búsettur eða heimilisfastur hér á landi á því 60 mánaða samfellda tímabili sem næst er fyrir upphaf starfa hans hér á landi, en þó að frátöldum fyrstu þremur mánuðum dvalar hérlendis; og
2. hann búi yfir þekkingu eða reynslu sem ekki er fyrir hendi hér á landi eða einungis í litlum mæli.

Ákvæði 1. og 2. mgr. gilda þó einungis ef hinn erlendi sérfræðingur:

1. er ráðinn til starfa sem sérfræðingur og njóti launa sem slíkur hjá lögaðila sem hefur lögheimili eða fasta starfsstöð hér á landi; og
2. sinni verkefnum er krefjast sérþekkingar og reynslu sem ekki er fyrir hendi hér á landi eða í litlum mæli; og/eða
3. starfi á sviði rannsókna, þróunar og/eða nýsköpunar, kennslu eða við úrlausn og/eða uppbyggingu sérhæfðra verkefna;
4. sinni framkvæmda- eða verkefnastjórnun eða öðrum verkefnum sem eru lykilþættir í starfsemi fyrirtækisins.

3. gr. Form og skilyrði umsóknar.

Umsókn um frádrátt samkvæmt 2. gr. skal borin undir sérstaka nefnd, sbr. 5. og 6. gr., er metur hvort viðkomandi starfsmaður uppfylli sett skilyrði samkvæmt reglugerð þessari. Umsókn skal berast nefndinni eigi síðar en þremur mánuðum frá þeirri dagsetningu sem starfsmaður hóf störf hérlendis ella skal henni hafnað.

Í umsókninni sem skal vera skrifleg og ítarlega rökstudd með fylgigögnum komi eftirfarandi fram:

1. fullt nafn og heimilisfang/aðsetur viðkomandi starfsmanns hér á landi ásamt staðfestingu Þjóðskrár Íslands þar á og því að skilyrði a-liðar 2. mgr. 2. gr. séu uppfyllt;
2. staðfesting á ráðningarsamningi ásamt upplýsingum um laun og hvers konar hlunnindi; og
3. staðfest gögn eftir því sem við á, er sýna fram á sérþekkingu eða reynslu, s.s. upplýsingar um menntun, starfsreynslu (ferilskrá) eða annað sem sýnir fram á sérþekkingu og/eða sérhæfingu; og
4. greinargerð frá launagreiðanda um að umrædd sérþekking eða reynsla sé ekki fyrir hendi hér á landi eða í litlum mæli; og
5. önnur gögn sem umsækjandi telur skipta máli.

Starfsmanni sem hlotið hefur samþykki nefndar skv. 1. mgr. er heimilt að endurnýja umsókn sína innan þriggja ára frádráttartímabilsins hafi hann skipt um starf og ekki er liðinn lengri tími en einn mánuður þar til starf er hafið að nýju. Umsókn skal berast nefndinni eigi síðar en einum mánuði frá þeirri dagsetningu sem starfsmaður hóf störf á hinum nýja vinnustað ella skal henni hafnað. Framhaldsumsókn skal gilda til loka upphaflegs þriggja ára tímabils. Ákvæði reglugerðar þessarar taka að öðru leyti til framhaldsumsagnar að undanskildum a-lið 2. mgr. 2. gr.

4. gr. Annmarkar á umsókn.

Ef rökstuðningur og/eða fylgigögn umsóknar eru ófullnægjandi að mati nefndarinnar skal, eftir því sem nefndin telur ástæðu til, gefa umsækjanda kost á að bæta úr annmörkum. Að jafnaði skal ekki veittur lengri frestur en tvær vikur í því skyni. Verði ekki bætt úr annmörkum að mati nefndarinnar skal vísa umsókninni frá.

5. gr. Nefndarskipan.

Fjármála- og efnahagsráðherra skipar nefnd til að fara yfir umsóknir, sbr. 3. gr., og meta hvort skilyrði 2. gr. séu uppfyllt.

Nefndin skal samanstanda af þremur nefndarmönnum, ásamt þremur nefndarmönnum til vara.

Fjármála- og efnahagsráðherra og mennta- og menningarmálaráðherra tilnefna hvor um sig sinn nefndarmann en sá þriðji skal skipaður án tilnefningar og vera formaður nefndarinnar.

Varamenn nefndarinnar skulu skipaðir með sama hætti og nefndarmenn.

6. gr. Starfshættir nefndarinnar.

Nefndin skal að jafnaði taka ákvörðun um umsókn innan þriggja vikna frá eftir að endanleg gögn liggja fyrir, sbr. 4. gr.

Nefndin skal halda skrá yfir þær umsóknir sem hún móttekur og sömuleiðis hvaða umsóknir hún samþykkir.

Meirihluti nefndarmanna nægir til þess að umsögn verði samþykkt. Sé umsókn, sbr. 2. gr., samþykkt sendir nefndin ríkisskattstjóra staðfestingu þess efnis.

Ákvörðun nefndarinnar er endanleg á stjórnsýslustigi.

7. gr. Þagnarskylda.

Nefndarmönnum, sbr. 4. og 5. gr., ber að gæta þagmælsku og fyllsta trúnaðar um hverjar þær upplýsingar og sérhver þau gögn er nefndinni berast. Þagmælska og trúnaður helst þótt látið sé af setu í nefndinni.

8. gr. Staðgreiðsla.

Frá og með næsta almanaksmánuði frá samþykkt umsóknar skal greiða staðgreiðslu í samræmi við lög nr. 45/1987, um staðgreiðslu opinberra gjalda, af 75% þeirra launatekna sem starfsmaður nýtur sem erlendur sérfræðingur. Hafi vinnuveitandi haldið eftir staðgreiðslu opinberra gjalda af launatekjum frá því starfsmaður hóf störf hérlendis sem erlendur sérfræðingur og þar til umsókn er samþykkt skal ríkisskattstjóri leiðrétta áður ákvarðaða staðgreiðslu. Launatengd gjöld ásamt barnabótum og vaxtabótum skulu taka mið af heildarlaunum hins erlenda sérfræðings.

9. gr. Gildistaka.

Reglugerð þessi, sem sett er með stoð í 6. tölul. A-liðar 1. mgr. 30. gr. laga nr. 90/2003 um tekjuskatt, öðlast gildi 1. janúar 2017.