Sífellt fleiri kjósa að leysa sjálf úr sínum málum á netinu og hafa væntingar til þess að það sé auðvelt. Góð þumalputtaregla er að 80% notenda þurfi um það bil sömu 20% upplýsinganna. Það er hlutverk okkar að vita hvaða 20% efnisins þetta eru og:

• hafa þær upplýsingar skýrar og aðgengilegar,

• tryggja að þær séu uppfærðar,

• forgangsraða því efni svo það sé ávallt fyrst og fremst.

Með því eru líkur á að við mætum þörfum 80% okkar notenda frekar vel. Þá höfum við jafnframt meiri tíma og fókus til þess að sinna 20% notendanna sem mögulega hafa flóknari þarfir.

Athugið að þótt starfsfólk stofnana og annarra opinberra aðila sé mikilvægur notendahópur er efnisvinnsla og birting ekki hugsuð á forsendum þeirra.

Á Ísland.is birtum við annars vegar upplýsingar um þjónustu sem hið opinbera veitir og hins vegar leiðbeinandi upplýsingar sem hjálpa fólki að klára erindi sín.

Efni af þessu tagi er staðsett í greinum sem flokkaðar eru í þjónustuflokka innan leiðakerfis Ísland.is. Einnig er hægt að vísa á efnið frá lendingarsíðu stofnunarinnar.

Hins vegar birtum við upplýsingar sem tengjast stofnunum og verkefnum hins opinbera.

Efni af þessu tagi er staðsett innan stofnana- eða verkefnavefja á Ísland.is.

Markmið aðgengisstefnu Ísland.is er að tryggja að allir sem koma að vinnu við Ísland.is séu samtaka um að tryggja gott aðgengi fyrir alla notendur vefsins, óháð fötlun eða tækjabúnaði.

Viðfangsefni aðgengisstefnunnar sem helst snúa að vefstjórum og öðrum sem vinna efni fyrir vefinn eru:

• Fyrirsagnaskipan
  Fyrirsagnir og millifyrirsagnir þurfa að vera í rökréttri röð svo skjálesarar geti ratað um síðuna. H2→H3→H4. Þannig má til dæmis ekki nota fyrirsagnasniðið H4 beint á eftir H2.

• Skýrt mál
  Við notum stuttar setningar, orðfæri almennings og forðumst langa textahlemma.

• Þýðing á ensku
  Efni á Ísland.is skal vera aðgengilegt á íslensku og ensku. Auðveldara er að þýða efnið úr ensku yfir á fleiri tungumál fyrir þá notendur sem það vilja eða þurfa.

• Lýsandi tenglatextar og hnappatextar
  Hlekkir þurfa að geta staðið sjálfstæðir til að auðvelda notendum með skjálesara að rata milli vefsíða. Texti í hnöppum þarf að vera lýsandi svo notendur viti hvað tekur við eftir að smellt er á þá.

• Alt-textar með myndrænu efni
  Við setjum alt-texta bak við myndrænt efni, nema skrautmyndir. Alt-textar lýsa því sem er á myndinni fyrir notendum sem nýta skjálesara og eru einnig mikilvægir fyrir leitarvélar.

• Frágangur PDF-skjala
  Ef nauðsynlegt er að birta efni á PDF-formi þarf að tryggja gott aðgengi að viðkomandi skjali, þar á meðal með réttri fyrirsagnaskipan og tungumálastillingum.
  

Notendur munu lesa og skoða efni á Ísland.is á alls konar skjám.
Um 60% umferðar á Ísland.is er í gegnum síma.

Síma- og spjaldtölvuskjáir munu sýna minna af efninu í einu en fartölvur eða borðskjáir.

Notendur sem til dæmis skoða vefinn í síma:

• munu þurfa að skrolla eða smella oftar til þess að nálgast sama magn upplýsinga,

• reiða sig meira á eigið minni til þess að muna það sem ekki sést lengur á skjánum hverju sinni.

Mikilvægt er að skoða uppsetningu efnis á ólíkum tegundum skjáa, ekki aðeins á stórum skjám.

Efni á Ísland.is skal vera aðgengilegt á íslensku og ensku.

Ensk þýðing auðveldar þýðingu yfir á fleiri tungumál fyrir þá notendur sem það vilja eða þurfa.

Á Ísland.is er notaður ritháttur breskrar ensku. Gætið þess þegar þýðingarvélar og yfirlestrartól eru notuð því ritháttur sumra orða er ólíkur í til dæmis bandarískri og breskri ensku.

Nauðsynlegt er að yfirfara allar þýðingar vel til að tryggja gæði og rétta merkingu.

Ef mikilvægt er að vísa til erlendrar þýðingar á heitum í texta notum við sviga til að aðgreina þýðinguna.

Dæmi

Við forðumst að birta upplýsingar á Ísland.is á PDF-formi þar sem það gengur gegn aðgengisstefnu vefsins. PDF-snið hentar vel þegar búa á efni til prentunar en illa til miðlunar efnis á vef.

• Erfitt er að laga efnið að þörfum notenda, til dæmis að stækka texta, breyta línubili eða nota eigin skjástillingar.

• Mörg PDF-skjöl eru ekki rétt merkt (e. tagged). Þá þekkja skjálesarar ekki uppbyggingu skjalsins, svo sem fyrirsagnir, lista eða töflur. Myndir og gröf eru oft án textalýsinga sem þýðir að notendur sem ekki sjá myndir fara á mis við mikilvægar upplýsingar.

• Leitarvélar lesa ekki innihald PDF-skjala og því birtist efnið ekki í leitarvélum.

• Erfiðara er að beina fólki á rétta kafla í PDF-skjölum. Það getur einnig truflað notendur þegar skjöl opnast í nýjum flipa eða öðru forriti.

• Viðhald efnis er flóknara. Fólk hleður niður og deilir PDF-skjölum sem gerir það erfitt að tryggja að notendur séu alltaf með nýjustu útgáfu efnisins.

Leitast skal við að birta efni heldur sem undirsíður á vefnum.

Ef nauðsynlegt er að birta upplýsingar á PDF-formi þarf að huga vel að frágangi slíkra skjala. Lykilþættir í því samhengi eru:

• Rétt uppbygging og lestrarröð (e. tagged PDF) svo skjálesarar geti áttað sig á röðun efnis í viðkomandi skjali og hvar listar, töflur og myndir eru.

• Að texti sé skilgreindur sem slíkur, ekki aðeins mynd af texta. Það sé til dæmis hægt að velja og afrita hluta textans af skjánum.

• Tungumálastillingar, fyrir skjálesara og leitarvélar.

• Að skráarheiti og lýsigögn séu rétt og gagnleg, meðal annars fyrir leitarvélar.