Greiðslur til einstaklinga og skattskylda

Launatekjur eru almennt skattskyldar.

Skattur er staðgreiddur við útborgun launa og samanstendur af tekjuskatti til ríkisins og útsvari til sveitarfélags.

Launatekjur eru allar greiðslur sem einstaklingur fær fyrir vinnu sína eða störf í þágu launagreiðanda. Þetta á ekki bara við um regluleg mánaðarlaun, heldur líka margs konar viðbótargreiðslur, hlunnindi og fríðindi.

Dagpeningar eru greiddir vegna ferðalaga launþega vegna vinnu og koma í stað endurgreiðslu á útlögðum kostnaði. Dagpeningum er ætlað að standa undir kostnaði vegna fjarveru frá heimili, til dæmis vegna gistingar og fæðis.

Leyfilegt er að draga vissan kostnað frá dagpeningum áður en skattar af þeim eru reiknaðir út. Reglur um það fara eftir því hvert er ferðast.

Sjá nánar um dagpeninga vegna ferðalaga.

Framlag launagreiðanda í lífeyrissjóð telst ekki með skattskyldum tekjum fyrr en við útborgun lífeyris.

Framlagið þarf að vera í samræmi við lög um skyldutryggingu lífeyrisréttinda og starfsemi lífeyrissjóða og lög um starfstengda eftirlaunasjóði.

Fari framlag launagreiðanda fram úr 12% af iðgjaldsstofni, að viðbættum 2.000.000 kr. á ári, telst þó vera um að ræða skattskyldar launatekjur þegar iðgjaldið er greitt í lífeyrissjóðinn.

Ef samið er um iðgjald í lífeyrissjóð í kjarasamningum eða það er bundið í lögum telst það þó aldrei til skattskyldra tekna fyrr en við greiðslu lífeyris.

Í framkvæmd sjá launagreiðendur yfirleitt um að skrá lífeyrisiðgjöld í launakerfum með réttum hætti. Einstaklingur ætti þó að yfirfara framtal og tryggja að framlög sem eiga að teljast skattfrjáls séu ekki ranglega sett sem skattskyld laun.

Hjá þeim sem hafa fasta búsetu á Íslandi (og svokallaða ótakmarkaða skattskyldu hér) eru þær launatekjur sem aflað er erlendis almennt skattskyldar hér sem laun. Skattlagning fer þó eftir tvísköttunarsamningum og því hvort skattur hafi verið greiddur erlendis.

Í skattframtali þarf að gera grein fyrir erlendum launatekjum, uppruna þeirra og erlendum sköttum sem greiddir hafa verið. Slíkar tekjur geta haft áhrif á heildarskattskyldu og tekjutengd réttindi.

Sjá nánar um skattgreiðslur af tekjum milli landa.

Laun frá alþjóðastofnunum teljast almennt til skattskyldra tekna.

Í ákveðnum tilvikum getur verið heimilt að færa frádrátt á móti slíkum launum samkvæmt sérstökum samningum.

Laun frá alþjóðastofnunum ber alltaf að telja fram í skattframtali og geta þau haft áhrif á útreikning bóta og annarra tekjutengdra réttinda.

Staðaruppbót

Staðaruppbót sem greidd er vegna starfa erlendis í þágu íslenska ríkisins telst til skattskyldra tekna.

Heimilt er að færa sömu fjárhæð til frádráttar, þannig að á greiðsluna verði hvorki lagður tekjuskattur né útsvar. Staðaruppbót getur þó haft áhrif á útreikning bóta.

Laun sem greidd eru í námsleyfi, til dæmis samkvæmt ákvæðum kjarasamninga opinberra starfsmanna, eru skattskyldar tekjur og skattlögð eins og aðrar launatekjur.

Þar sem þessar greiðslur teljast ekki vera styrkir er ekki heimilt að draga frá þeim kostnað.

Samgöngustyrkir, eða samgöngugreiðslur, teljast ekki til skattskyldra tekna upp að ákveðinni fjárhæð sem ákveðin er árlega með skattmati.

Samgöngustyrkur er greiðsla sem launagreiðandi greiðir starfsmanni vegna ferða milli heimilis og vinnustaðar samkvæmt sérstökum samningi um nýtingu á almenningssamgöngum eða vistvænum samgöngumáta.

Í skattmati er nánar kveðið á um skilyrði fyrir undanþágunni.

Ógreidd laun teljast almennt til tekna á því ári sem þau voru unnin, jafnvel þótt greiðsla berist síðar. Þetta gildir til dæmis um desemberlaun sem eru greidd í janúar.

Ef laun fást ekki greidd, til dæmis vegna gjaldþrots launagreiðanda, teljast þau ekki til tekna.

Ef greiðsla berst síðar, til dæmis úr ábyrgðarkerfi launa, telst hún til tekna á því ári sem hún er greidd.

Ökutækjastyrkur vegna notkunar eigin bifreiðar í þágu vinnuveitanda telst til skattskyldra tekna en heimilt er að færa kostnað á móti.

Frádrátt á móti ökutækjastyrk má færa ef bifreið launþega hefur sannanlega verið notuð vegna aksturs í þágu vinnuveitanda.

Sjá nánar um ökutækjastyrk og frádrátt.

Hlunnindi eru fríðindi eða gæði sem hafa fjárhagslegt verðmæti. Þau teljast til skattskyldra launatekna. Dæmi um hlunnindi eru til dæmis fatnaður, vörur, ökutæki og fleira.

Hlunnindi geta verið veitt starfsmanni í tengslum við starf hans en geta einnig verið veitt á milli annarra tengdra eða ótengdra aðila.

Hlunnindi á að meta til fjár á markaðs- eða gangverði, nema um þau gildi sérstakt matsverð samkvæmt skattmati.

Ef launagreiðandi lætur starfsmann hafa bifreið til umráða eða afnota telst það til tekna sem hlunnindi hjá starfsmanni.

Sömu reglur gilda hvort sem bifreið er í eigu launagreiðanda/rekstraraðila eða hann hefur hana á leigu eða til láns.

Ákvörðun bifreiðahlunninda og útreikningur þeirra fer eftir matsreglum sem birtar eru árlega í skattmati.

Mismunandi reglur gilda eftir því hvort starfsmaður telst hafa full og ótakmörkuð umráð yfir bifreiðinni eða hvort hann telst hafa takmörkuð afnot yfir henni.

Sjá nánar um skattskyldu bifreiðahlunninda.

Ef starfsmaður fær afhentan fatnað til afnota skal telja þau hlunnindi til tekna á kostnaðarverði.

Það á þó ekki við um:

• Einkennisfatnað og nauðsynlegan öryggis- og hlífðarfatnaður sem starfsmenn fá til afnota og er ætlað að nota við störf sín.

• Fatnað sem er auðkenndur eða merktur launagreiðanda og einkum nýttur vegna starfa fyrir hann.

Ef vinnuveitandi sér starfsmanni (eða fjölskyldu starfsmanns) fyrir fæði án endurgjalds á að meta það til skattskyldra tekna samkvæmt matsfjárhæð sem ákvörðuð er árlega í skattmati.

Ef starfsmaður greiðir fyrir fæði að hluta á að taka tillit til þess:

• Ef greitt er lægra verð fyrir máltíðir en matsfjárhæðir ríkisskattstjóra segja til um telst mismunurinn til tekna.

• Ef greitt er hærra verð fyrir máltíðir en matsfjárhæðir ríkisskattstjóra segja til um telst ekkert til tekna.

Greidda fæðispeninga á að telja til skattskyldra launatekna án nokkurs frádráttar.

Þegar launagreiðandi veitir starfsmanni sínum endurgjaldslaus afnot af íbúðarhúsnæði teljast þau hlunnindi til tekna.

Útreikningar húsnæðishlunninda byggja á matsreglum sem birtar eru árlega í skattmati.

Ef rafmagn og hiti fylgir með skal telja þau hlunnindi til tekna á kostnaðarverði samkvæmt reikningum.

Ef starfi fylgir kvöð um búsetu í húsnæði frá launagreiðanda, er ríkisskattstjóra heimilt að lækka hlunnindamatið ef launamaður telst ekki nýta húsnæðið að fullu.

Í því samhengi telst húsnæði fullnýtt þegar það eru allt að 150 fermetrar fyrir allt að sex íbúa. Ef íbúar eru fleiri en 6 er gert ráð fyrir aukalega 5 fermetrum fyrir hvern íbúa við mat á nýtingu.

Afnot af húsnæði í verbúðum eða vinnubúðum þar sem launþegi dvelur um takmarkaðan tíma í þjónustu launagreiðanda telst ekki til skattskyldra hlunninda.

Endurgjaldslaus afnot af orlofshúsnæði frá launagreiðanda í fleiri en tíu daga á ári skal telja til tekna. Það sama gildir um afnot fjölskyldumeðlima starfsmanns.

Miðað er við tiltekna fjárhæð fyrir hvern dag sem er umfram tíu. Fjárhæðin er ákvörðuð árlega í skattmati ríkisskattstjóra.

Með orlofshúsnæði er átt við sumarbústaði og annað það húsnæði sem ætlað er til slíkrar notkunar, þar með talið íbúðir í þéttbýli, sem og hjólhýsi, fellihýsi, tjaldvagna og aðra tengivagna.

Sérstakar reglur gilda um skattlagningu þegar starfsmaður kaupir hlutabréf á grundvelli kaupréttar sem hann fékk í starfi.

Mismunurinn á markaðsverði bréfanna og því verði sem greitt er telst til launa og er skattlagður eins og önnur laun.

Sjá nánar um skattlagningu kaupréttar á hlutabréfum.

Umráð yfir vélknúnum ökutækjum öðrum en bifreiðum skal færa til tekna sem hlutfall af kaupverði tækisins í samræmi við matsreglur sem birtar eru árlega í skattmati.

Afnot af flugvélum í einkaþágu skal færa til tekna með tiltekinni fjárhæð á hvern flugtíma. Fjárhæðin er ákvörðuð árlega í skattmati.

Allar lífeyrisgreiðslur frá lífeyrissjóðum, þar með talið séreignarlífeyrir, teljast til skattskyldra tekna móttakanda og eru skattlagðar sem tekjur.

Ef lífeyrir (eftirlaun) er greiddur beint af launagreiðanda er litið á þá greiðslu eins og hverja aðra launagreiðslu.

Ef barn hefur misst annað eða bæði foreldri og er skattlagt sérstaklega af öðrum tekjum en launatekjum telst barnalífeyrir með tekjum barnsins.

Bótagreiðslur

Ýmsar bótagreiðslur geta verið greiddar frá tryggingafélögum, sjúkrasjóðum stéttarfélaga eða öðrum aðilum. Skattaleg meðferð ræðst af því hvort bætur koma í stað tekna eða eru greiddar vegna tjóns:

• Bætur vegna tímabundins tekjutaps, svo sem bætur sem koma í stað launa, teljast almennt skattskyldar.

• Aftur á móti eru eingreiðslur vegna varanlegs líkamstjóns eða örorku oft skattfrjálsar.

Útgreiðslur úr séreignalífeyri og viðbótalífeyrissparnaði teljast almennt til skattskyldra tekna á því ári sem þær eru greiddar út.

Á innborgunartíma hefur oft verið veitt skattfrestun eða skattaleg ívilnun, og skattlagning fer því fram við útgreiðslu.

Ef um er að ræða greiðslu séreignarlífeyris eða viðbótarlífeyris til erfingja teljast þær til skattskyldra tekna hans.

Í framkvæmd er mikilvægt að greina á milli reglulegra lífeyrisgreiðslna og sérstakra útgreiðslna. Reglulegar greiðslur falla almennt undir staðgreiðslu líkt og launatekjur, en einstakar útgreiðslur geta verið skattlagðar með öðrum hætti eftir uppbyggingu réttindanna.

Sérstök útgreiðsla úr séreignarsjóðum

Sérstakar útgreiðslur úr séreignasjóðum, til dæmis vegna heimilaðra ráðstafana eða sérstakra tímabundinna úrræða, teljast almennt til skattskyldra tekna nema annað sé tekið fram.

Slíkar greiðslur eru færðar til tekna á útgreiðsluári, óháð því á hvaða árum réttindin voru mynduð.

Í framtali er mikilvægt að tryggja að slíkar greiðslur séu rétt flokkaðar, þar sem röng flokkun getur haft áhrif á útreikning tekjuskatts og bóta.

Barnalífeyrir sem greiddur er af Tryggingastofnun vegna þess að annað foreldri (eða bæði) er látið, telst ekki til skattskyldra tekna. Sama á við um barnalífeyri vegna ófeðraðs barns eða barns foreldris sem sætir gæslu- eða refsivist.

Um barnalífeyri vegna náms (menntunar-barnalífeyrir) gilda sömu reglur og um menntunarmeðlag. Ef greiðslan er ekki umfram fjárhæð barnalífeyris, telst hún ekki skattskyld.

Meðlagsgreiðslur með börnum sem eru úrskurðaðar eða staðfestar af Sýslumanni teljast ekki skattskyldar upp að hámarksfjárhæð sem nemur tvöföldum barnalífeyri.

Ef greiðslur eru hærri telst mismunurinn til skattskyldra tekna hjá móttakanda.

Til dagforeldra

Endurgreiðslur sveitarfélags til foreldra vegna vistunar barna hjá dagforeldri teljast ekki til tekna hjá foreldrum.

Athugið þó að greiðslur sem sveitarfélag greiðir til dagforeldris vegna eigin barna dagforeldris teljast skattskyldar tekjur í rekstri dagforeldris.

Heimagreiðslur

Styrkir (svokallaðar heimagreiðslur) til foreldra eða forráðamanna til að annast barn heima frá lokum fæðingarorlofs og þar til barn fær leikskólavistun eða hefur grunnskólanám teljast ekki skattskyldar.

Greiðslurnar koma í stað niðurgreiðslu sveitarfélags á dagvistun.

Skattfrelsið nær eingöngu til foreldris/forráðamanns. Ef greiðslum er beint til annars aðila sem annast barnið teljast þær greiðslur skattskyldar í hendi móttakanda.

Nánari upplýsingar um greiðslur vegna vistunar barna á heimili.

Framfærslulífeyrir frá fyrr­ver­andi maka er skattfrjáls, að því gefnu að greiðslur takmarkist við sömu fjárhæð og grunn­líf­eyr­ir (ellilífeyrir án viðbóta og uppbóta) frá Tryggingastofnun.

Sjá fjárhæðir ellilífeyris.

Húsnæðisbætur frá HMS teljast ekki til skattskyldra tekna. Sama á við um sérstakan húsnæðisstuðning sveitarfélaga.

Uppbætur á lífeyri sem tengjast framfærslubyrði (félagsleg aðstoð) og uppbót vegna reksturs bifreiðar teljast ekki til skattskyldra tekna.

Þetta eru sértækar uppbætur sem eiga að mæta ákveðnum kostnaðarþáttum.

Verkfallsstyrkir frá stéttarfélögum eru skattskyldar tekjur og eru skattlagðir sem laun samkvæmt almennum reglum.

Styrkir frá launagreiðanda eða stéttarfélagi vegna kostnaðar við reglulega íþróttaiðkun eru skattfrjálsir upp að ákveðinni fjárhæð sem ákveðin er árlega með skattmati. Greiðslur umfram þá fjárhæð teljast skattskyldar.

Dæmi um reglulega íþróttaiðkun

• Æfingagjöld

• Aðgangur að líkamsræktarstöðvum, sundlaugum, skíðasvæðum og golfvöllum

• Íþróttanámskeið

• Einkaþjálfun

Kostnaður við búnað eða fatnað fellur ekki undir undanþáguna.

Frístundastyrkir sem greiddir eru af sveitarfélögum vegna íþróttaiðkunar eða annarra frístunda barna eru ekki skattskyldir.

Styrkir vegna náms, námskeiða eða rannsókna teljast skattskyldar tekjur.

Á móti slíkum styrkjum er heimilt að færa beinan kostnað, svo sem námskeiðsgjöld, skólagjöld, kaup á námsbókum eða ferðakostnað vegna námsins.

Persónulegur kostnaður eða kostnaður vegna tækjakaupa, t.d. kaupa á tölvu, leyfist þó aldrei til frádráttar.

Dvalar- og ferðastyrkir sem greiddir eru til jöfnunar á námskostnaði (oft nefndir dreifbýlisstyrkir) teljast ekki til skattskyldra tekna hjá námsmanni.

Greiðslurnar eru almennt tengdar því að nemandi þurfi að dvelja fjarri heimabyggð eða bera aukinn ferðakostnað.

Styrkir til orlofsdvalar eða leigu á orlofshúsnæði eru skattfrjálsir upp að ákveðinni fjárhæð sem ákveðin er árlega með skattmati. Greiðslur umfram þá fjárhæð teljast skattskyldar.

Styrkir úr húsafriðunarsjóði eru undanþegnir tekjuskatti.

Fjárhæð styrks er færð til lækkunar á stofnverði viðkomandi eignar.

Örorkubætur sem eru ákveðnar í einu lagi (eingreiðsla) vegna varanlegrar örorku í kjölfar slysa teljast ekki til skattskyldra tekna.

Aftur á móti eru örorkubætur sem greiddar eru reglulega (t.d. mánaðarlega) skattskyldar.

Það er því mikilvægt að greina á milli eingreiðslu vegna varanlegrar örorku og reglubundinna bótagreiðslna.

Umönnunargreiðslur sem Tryggingastofnun greiðir vegna fjárhagslegrar aðstoðar til foreldra sem eiga börn sem glíma við fötlun eða alvarleg veikindi teljast ekki til skattskyldra tekna.

Tilgangurinn er að mæta auknum kostnaði vegna heilbrigðisþjónustu, meðferðar og þjálfunar.

Miskabætur og bætur vegna varanlegrar örorku sem ákveðnar eru í einu lagi teljast ekki til skattskyldra tekna. Sama á við um skaðabætur og vátryggingabætur vegna tjóns á eignum sem ekki eru notaðar í atvinnurekstri.

Aðrar skaðabætur, til dæmis bætur vegna atvinnutaps, launamissis eða greiðslur sem koma í stað vinnulauna, teljast hins vegar almennt til skattskyldra tekna.

Þess vegna er mikilvægt að greina á milli:

Dánarbætur frá tryggingafélögum og sjúkrasjóðum stéttarfélaga sem ákveðnar eru og greiddar í einu lagi teljast ekki til skattskyldra tekna.

Þær eru yfirleitt ætlaðar til að mæta kostnaði vegna andláts.

Dánarbætur vegna slysa

Dánarbætur sem Tryggingastofnun ríkisins greiðir vegna slyss teljast ekki til skattskyldra tekna.

Bætur þessar eru greiddar ekkju/ekkli eða sambúðarmaka sem var í samvistum við hinn látna eða á framfæri hans.

Barnalífeyrir er greiddur með hverju barni undir 18 ára aldri sem var á framfæri hins látna og telst sú greiðsla ekki heldur til skattskyldra tekna.

Samskotafé, sem safnað er af einstaklingum eða félagasamtökum til stuðnings við tiltekinn einstakling eða fjölskyldu, telst ekki til skattskyldra tekna.

Þetta á við þegar um er að ræða mannúðarsjónarmið, til dæmis vegna veikinda, slysa eða annarra óvæntra aðstæðna.

Styrkir sem greiddir eru af félagasamtökunum Umhyggju til foreldra og aðstandenda barna með fötlun eða langvinn veikindi teljast ekki til skattskyldra tekna.

Styrkirnir eru almennt ætlaðir til að mæta auknum útgjöldum sem falla til vegna aðstæðna barns.

Bifreiðakaupastyrkir sem Tryggingastofnun greiðir elli- og örorkulífeyrisþegum, örorkustyrkþegum og umönnunargreiðsluþegum eru ekki skattskyldar tekjur.

Þeir eru í staðinn færðir til lækkunar á stofnverði bifreiðarinnar á framtali.

Nánar um bifreiðastyrki Tryggingastofnunar.

Styrkir sem greiddir eru vegna endurhæfingar fatlaðra teljast ekki til skattskyldra tekna, að því gefnu að þeir séu ætlaðir til að mæta útgjöldum vegna meðferðar, þjálfunar eða annarra úrræða sem stuðla að endurhæfingu eða aukinni færni.

Styrkir sem ríki eða sveitarfélög greiða til tækjakaupa fyrir fatlaða teljast ekki skattskyldir.

Þetta á einungis við um styrki sem greiddir eru samkvæmt lögum og reglum um aðstoð við fatlaða, en ekki almennt um styrki til eignakaupa.

Styrkir frá Sjúkratryggingum Íslands

Styrkir til tækjakaupa sem Sjúkratryggingar Íslands veita fötluðum teljast ekki til skattskyldra tekna.

Þeir eru þó tengdir við keypta eign og eiga að færast til lækkunar á stofnverði tækisins.

Styrkir frá Sjúkratryggingum Íslands til kaupa á sérfæði og næringarefnum, sem greiddir eru eftir faglegt mat (t.d. læknis og/eða næringarfræðings) vegna hamlaðrar líkamsstarfsemi, teljast ekki til skattskyldra tekna.

Þetta eru greiðslur sem eiga að mæta aukakostnaði sem fellur til vegna heilsufars.

Greiðslur til notanda NPA eru almennt ekki persónulegar tekjur, heldur fjármunir sem ætlaðir eru til að standa straum af tilteknum þjónustukostnaði.

Notendastýrð persónuleg aðstoð (NPA) byggir á því að einstaklingur fær fjárveitingu til að skipuleggja eigin aðstoð og ráða starfsfólk.

Skattaleg meðferð ræðst af hlutverki viðkomandi aðila:

• Greiðslur til notanda teljast almennt ekki skattskyldar tekjur, að því gefnu að þær séu nýttar í samræmi við samþykkta þjónustuáætlun.

• Laun sem greidd eru aðstoðarfólki teljast skattskyld launatekjur og sæta staðgreiðslu, líkt og önnur vinnulaun.

Ef notandi fær greiðslur sem fara umfram raunverulegan þjónustukostnað, eða ef fjármunir eru nýttir í öðrum tilgangi en NPA-þjónustu, getur umframhluti talist skattskyldur. Því er mikilvægt að halda skýrt bókhald, varðveita samninga og sundurliða greiðslur.

Í skattframtali ber almennt ekki að telja NPA-fjárveitingar til tekna, en mikilvægt er að tryggja að laun aðstoðarfólks komi rétt fram sem launatekjur hjá viðkomandi.

Styrkir sem sjúkrasjóðir stéttarfélaga veita til greiðslu á útfararkostnaði eru skattskyldar tekjur og færast eftir aðstæðum hjá eftirlifandi maka eða hjá dánarbúinu. Ekki er heimill neinn frádráttur á móti.

Sama gildir um útfararstyrki sem greiddir eru af öðrum, t.d. vinnuveitendum.

Ættleiðingarstyrkir eru skattskyldar tekjur.

Ef styrkirnir eru greiddir úr ættleiðingarsjóði samkvæmt lögum er heimilt að færa frádrátt á móti. Engin heimild er til frádráttar ef styrkurinn er greiddur af öðrum en ættleiðingarsjóði.

Í ákveðnum tilvikum getur eigin vinna talist skattskyld, til dæmis þegar einstaklingur vinnur fyrir aðra án endurgjalds en fær í staðinn fjárhagslegan ávinning.

Eigin aukavinna við íbúðarhúsnæði

Eigin aukavinna við íbúðarhúsnæði til eigin afnota telst ekki til skattskyldra tekna, að því gefnu að viðkomandi hafi unnið fullan vinnutíma við eiginlegt starf sitt og hafi skilað eðlilegum árstekjum af því.

Gera þarf grein fyrir vinnunni með framtali þegar við á (til dæmis þegar um er að ræða íbúðarhúsnæði í smíðum eða endurbótum).

Athugið að vinna sem unnin er í venjulegum vinnutíma eða vinna við annað en íbúðarhúsnæði til eigin nota getur talist skattskyld og þarf þá að meta til tekna samkvæmt viðmiðum sem birt eru í húsbyggingaskýrslu og uppfærast árlega.

Gjafavinna og skiptivinna

Gjafavinna og skiptivinna felur í sér að einstaklingar skipta á vinnu eða þjónustu án peningagreiðslu. Þrátt fyrir að engin greiðsla fari fram, getur slík vinna verið skattskyld.

Verðmæti vinnunnar skal þá meta til fjár miðað við markaðsverð sambærilegrar vinnu. Þetta á einkum við ef um er að ræða reglubundna eða umfangsmikla vinnu.

Tækifærisgjafir teljast almennt ekki til skattskyldra tekna hjá móttakanda, að því gefnu að verðmæti þeirra sé ekki meira en gerist almennt um slíkar gjafir

Ef gjöf er veitt í stað greiðslu fyrir vinnu eða í tengslum við starf, telst hún til skattskyldra tekna og skal meta til fjár.

Vinningar og verðlaun teljast almennt til skattskyldra tekna, nema sérstaklega sé kveðið á um skattfrelsi. Þetta á við bæði um peningavinninga og vinninga í formi verðmæta.

Smávægilegir vinningar og tilteknir happdrættisvinningar geta verið undanþegnir skattskyldu. Meta þarf hvert tilvik með hliðsjón af eðli vinningsins og heimildum happdrættisins.

Skattfrjálsir happdrættisvinningar

Vinningar úr happdrættum sem hafa fengið sérstaka heimild sýslumanns og staðfestingu ríkisskattstjóra teljast skattfrjálsir.

Einnig geta vinningar úr tilteknum happdrættum talist skattfrjálsir ef happdrættið hefur fengið heimildir og staðfestingu til að greiða skattfrjálsa vinninga. Listi yfir þau happdrætti er birtur árlega í framtalsleiðbeiningum ríkisskattstjóra.

Sjá nánar um happdrættisleyfi.

Happdrættisvinningar á Evrópska efnahagssvæðinu geta verið skattfrjálsir á sama hátt og skattfrjálsir vinningar hér á landi, að því gefnu að sambærilegar kröfur um heimildir og gögn séu uppfylltar.

Heiðurslaun og heiðursverðlaun

Bókmennta-, tónlistar- og umhverfisverðlaun Norðurlandaráðs ásamt norrænu leikskáldaverðlaununum eru undanþegin skattskyldu.