Fara beint í efnið
Fjármál, skattar og tollar
Skatturinn

Reglur um skattlagningu kaupréttar á hlutabréfum

Sérstakar reglur gilda um skattlagningu þegar starfsmaður kaupir hlutabréf á grundvelli kaupréttar sem hann fékk í starfi. Mismunurinn á markaðsverði bréfanna og því verði sem greitt er telst til launa og er skattlagður eins og önnur laun.

Þegar kaupréttur er nýttur þarf launagreiðandi að greiða tryggingagjald af mismun á markaðsverði og kaupverði hlutabréfanna. Ekki er dregin staðgreiðsla af fjárhæðinni. Launagreiðandi þarf að gera grein fyrir viðskiptunum í gagnaskilum til Skattsins árið eftir að kauprétturinn var nýttur.

Eftirfarandi upplýsingar þurfa að fylgja:

  • Dagsetning nýtingar

  • Nafnverð hlutabréfa

  • Kaupverð

  • Tekjur starfsmanns (mismunur á markaðsverði og kaupverði)

Ef hlutabréfin eru ekki seld fyrir árslok

Ef þú nýtir kauprétt en selur hlutabréfin ekki innan sama árs:

  • Hlutabréfin eru skráð á skattframtal einstaklings sem eign.

  • Mismunur á markaðsverði og kaupverði er ekki skattlagður strax.

  • Skattlagning fer fram þegar hlutabréfin eru seld.

Þetta þýðir að skattlagningarkvöð hvílir á bréfunum þar til eigendaskipti eiga sér stað.

Ákvörðun markaðsverðs við skattlagningu

Ef hlutabréfin eru skráð í kauphöll er miðað við markaðsverð.

Ef hlutabréfin eru ekki skráð í kauphöll og engin viðskipti hafa átt sér stað er miðað við bókfært eigið fé samkvæmt síðasta endurskoðaða ársreikningi eða árshlutareikningi félagsins.

Kaupréttaráætlun

Að uppfylltum ákveðnum skilyrðum skulu tekjur af hlutabréfum sem keypt eru samkvæmt kauprétti teljast til fjármagnstekna á því tímamarki sem bréfin eru seld. Þessi undantekning á einungis við kaup að tiltekinni fjárhæð sem ákvörðuð er í lögum og er 1.500.000 kr.

Félag sem hefur í hyggju að veita starfsmönnum kauprétt þarf að senda ríkisskattstjóra fyrirfram kaupréttaráætlun til staðfestingar. Ríkisskattstjóri hefur sett reglur í þessum efnum þar sem fram kemur meðal annars fram að:

  • Sérhverju félagi beri að setja um kaupréttinn reglur sem nái til allra starfsmanna þeirra og eftir atvikum allra starfsmanna félaga í sömu félagasamstæðu. Fram þarf að koma hvernig félagið hyggst kynna starfsmönnum sínum rétt þann er þeir eiga samkvæmt áætluninni og þau skilyrði sem sett eru, ef einhver eru.

  • Kaupréttur gildir einungis um starfsmenn sem verið hafa í föstu starfi hjá félaginu eða öðru félagi í sömu félagasamstæðu. Verktakar hjá félaginu eða stjórnarmenn þess teljast ekki starfsmenn félagsins í þessu sambandi.

  • Að lágmarki 12 mánuðir þurfi að líða frá gerð samnings um kauprétt þar til hann er nýttur. Kaupréttarsamningur telst kominn á þegar fyrir liggja bæði skuldbinding félagsins um kauprétt starfsmanna og staðfesting viðkomandi starfsmanns á samningnum.

  • Kaupverð má ekki vera lægra en vegið meðalverð í viðskiptum með hluti/hlutabréf í félagi tíu heila viðskiptadaga fyrir samningsdag ef slík viðskipti hafa verið skráð í kauphöll. Ef slík skráning hefur ekki átt sér stað skal miða við gangverð í viðskiptum annars bókfært verð eigin fjár samkvæmt síðasta endurskoðaða ársreikningi eða árshlutareikningi.

  • Starfsmaður þarf að eiga hlutabréfin eða hlutina í tvö ár eftir að kaupréttur er nýttur. Ef misbrestur verður á þessu ber að skattleggja tekjurnar samkvæmt meginreglunni um að telja tekjurnar til launatekna.

  • Samningur um kauprétt er ekki framseljanlegur og tilgreina þarf í honum að ekki sé heimilt að veðsetja hann eða framselja með öðrum hætti.

  • Tekjur samkvæmt kaupréttaráætlun sem uppfyllir ofangreind skilyrði koma til skattlagningar þegar starfsmaður selur hlutabréfin

Ítarefni

Þjónustuaðili

Skatt­urinn