Gjaldþrot einstaklinga

Við úrskurð um gjaldþrotaskipti verður til sérstakur lögaðili sem kallast þrotabú, sem tekur við öllum skuldum og eignum skuldara.

Við úrskurðinn falla allar kröfur á hendur þrotabúi í gjalddaga.

Skipaður er skiptastjóri sem fer með forræði búsins.

Skiptastjóri birtir auglýsingu í Lögbirtingablaði um að bú skuldara hafi verið tekið til gjaldþrotaskipta. Auglýsingin kallast innköllun.

Með innkölluninni er kröfuhöfum veittur ákveðinn frestur til að lýsa kröfum sínum fyrir skiptastjóra. Þannig fá kröfuhafar færi á að halda uppi kröfum sínum á hendur þrotabúinu.

Lokun reikninga

• Strax í kjölfar úrskurðar héraðsdóms um gjaldþrotaskipti mun skiptastjóri óska eftir að öllum reikningum og greiðslukortum sé lokað

• Oft er hægt að stofna nýjan innlánsreikning án heimildar eða fyrirframgreitt kreditkort

Eignir metnar

• Skiptastjóri tekur ákvarðanir um hvernig eignum og réttindum þrotabúsins er ráðstafað. Þá kannar skiptastjóri hvort riftanlegar ráðstafanir hafi átt sér stað í aðdraganda gjaldþrots, t.d. undanskot eigna

• Einstaklingur fær að halda vinnulaunum sínum með gjaldþrotaskiptum stendur

• Einstaklingur fær að halda eftir eignum sem ekki er gert fjárnám í t.d. lausafjármunum til að halda látlaust heimili, nauðsynlegum lausafjármunum vegna örorku eða heilsubrests eða munum sem notaðir eru vegna atvinnu (regla um hámarksvirði)

• Þrotabúið tekur yfir hlut sem einstaklingur á í félagi og leitast við að koma honum í verð

Aðrar ráðstafanir

• Skiptastjóri getur sagt upp samningi um leigu

• Skiptastjóri getur óskað eftir því að skuldari verði tekinn af launagreiðendaskrá og að virðisaukaskattsnúmeri hans verði lokað

Gjaldþrotaskiptum getur lokið með úthlutun fjármuna til kröfuhafa ef eignir eru í búinu,
eða án úthlutunar ef engar eignir eru fyrir hendi.

Skuldir sem ekki fást greiddar við skiptin falla niður þegar 2 ár eru liðin frá lokum skiptanna, nema fyrningu sé slitið (ath. gildir ekki um námslán).

Lesa nánar um fyrningartíma.

Skiptameðferð tekur alla jafna nokkra mánuði. Ef skiptameðferð dregst á langinn skal hafa samband við skiptastjóra.

Þegar bú hefur verið undir skiptum í eitt ár, skal héraðsdómstóll kalla eftir skýringum frá skiptastjóra á því hvers vegna skiptum hafi ekki verið lokið og óska eftir upplýsingum um það hvenær hann reikni með því að ljúka skiptum.