Gjaldþrot einstaklinga

Á þessari síðu

Að krefjast gjaldþrotaskipta

Kostnaður

Leggja þarf fram tryggingu fyrir skiptakostnaði ef ljóst er að eignir standa ekki undir skiptakostnaði. Skiptatryggingu er ætlað að standa undir kostnaði við framkvæmd skiptanna, s.s. launum skiptastjóra.

Fjárhæð skiptatryggingar er 280.000 kr.
Greiða þarf jafnframt sérstakt dómsmálagjald, 20.000 kr.

Að sækja um hjá umboðsmanni skuldara

Ef þú hefur árangurslaust leitað lausna, getur þú sótt um fjárhagslega aðstoð til að greiða kostnað vegna gjaldþrotaskipta.

Markmiðið er að gera einstakling, sem á ekki eignir og hefur ekki greiðslugetu, mögulegt að krefjast gjaldþrotaskipta á búi sínu.

Að krefjast gjaldþrotaskipta hjá héraðsdómi

Krafa um gjaldþrotaskipti þarf að vera skrifleg.
Kröfu á að skila til héraðsdómstóls í því umdæmi þar sem þú hefur lögheimili eða dvalarstað, ef hann er annar en lögheimili.

Kröfugerð

Þegar lögð er fram krafa um gjaldþrotaskipti, þarf í kröfunni að greina frá ákveðnum upplýsingum.

Í kröfugerðinni skal meðal annars koma fram:

að þú krefjist þess að bú þitt verið tekið til gjaldþrotaskipta og krafan styðjist við 64. gr. laga um gjaldþrotaskipti o.fl. nr. 21/1991
fullt nafn þitt og kennitala
lögheimili þitt og dvalarstaður, ef hann er annar en lögheimili
upplýsingar um atvinnurekstur, ef svo er:
1. Stutt lýsing á því um hvernig rekstur er að ræða.
2. Hvar reksturinn fer fram.
3. Hvort um er að ræða firma sem ber sérstakt heiti og kennitölu.
skýr lýsing á málsatvikum og rökum þínum: hvernig fjárhagur þinn hafi komist í það horf að þú telur rétt að krefjast gjaldþrotaskipta á búi þínu
sundurliðaðar upplýsingar um eignir og skuldir þínar. Taka þarf fram hve mikill hluti skulda er gjaldfallinn eða er í vanskilum
mánaðarlegar tekjur og útgjöld og hve mikið sé eftir í hverjum mánuði til að greiða af skuldum

Kröfu um gjaldþrotaskipti þurfa að fylgja gögn sem sýna fram á að þú getir ekki staðið í skilum við kröfuhafa þína þegar kröfur falla á gjalddaga.