Gjaldþrot einstaklinga

Skuldir eftir gjaldþrot fyrnast á 2 árum

Þegar búið er að ljúka gjaldþrotaskiptum byrjar tveggja ára fyrningarfrestur að líða.

Skuldir fyrnast (falla niður) þegar tvö ár eru liðin frá lokum skiptanna, nema fyrningu sé slitið. Vakin skal athygli á því að tveggja ára fyrningarfrestur gildir ekki um kröfur Menntasjóðs námsmanna (námslán).

Að slíta fyrningu eftir gjaldþrot

Að slíta fyrningu þýðir að nýr fyrningarfrestur byrjar að líða.

Þegar fyrningu er slitið heldur skuld eða krafa áfram að vera gild.

• Einstaklingur getur sjálfur slitið fyrningu á þessum 2 árum með því að greiða af eða viðurkenna skuld t.d. með samningi um greiðslur. Launaafdráttur slítur ekki fyrningu.

• Kröfuhafi getur aðeins slitið fyrningu með því að fá dóm um viðurkenningu á fyrningarslitum. Ströng skilyrði eru fyrir því að fá slíkan dóm.

Kröfuhöfum er heimilt að halda áfram innheimtu á 2 ára fyrningartíma. Á þessu tímabili má því búast við að rukkanir haldi áfram að berast.

Vilji einstaklingur ekki slíta fyrningu ætti hann ekki að bregðast við innheimtu með greiðslu eða samningi um greiðslur á meðan tveggja ára fyrningartíminn er að líða.

Launaafdráttur

• Innheimtumenn ríkissjóðs (Skatturinn og sýslumenn utan höfuðborgarsvæðisins) hafa heimild, á 2 ára fyrningartíma, að krefja vinnuveitanda um að halda eftir allt að 75% af launum vegna vangoldinna þing- og sveitarsjóðsgjalda.

• Sýslumaður hefur heimild, á 2 ára fyrningartíma, til að krefja vinnuveitanda að halda eftir allt að 50% af launum vegna meðlagsskulda.

• Hægt er að gera greiðsluáætlun um lækkun launaafdráttar hjá Skattinum og sýslumanni og slítur það ekki fyrningu.

Sýslumaður gæti ákveðið að vararefsingu vegna fésekta verði beitt á 2 ára fyrningartíma.

Til baka: Hvernig virka gjaldþrotaskipti?

Áfram: Í kjölfar gjaldþrots