Gjaldþrot einstaklinga
Á þessari síðu
Almennt
Gjaldþrot er fullnustugerð sem felur í sér að andvirði eigna skuldara er ráðstafað til að greiða skuldir hans. Héraðsdómur þarf að kveða upp úrskurð um gjaldþrotaskiptin. Ef engar eignir eru til staðar getur gjaldþrotaskiptum lokið án þess að nokkuð fáist greitt upp í skuldir.
Einstaklingur með lögheimili á Íslandi getur sjálfur krafist gjaldþrotaskipta að uppfylltum skilyrðum.
Gjaldþrot einstaklinga er afdrifarík ákvörðun og hefur ýmiss konar áhrif. Oft er hægt að leysa fjárhagsvanda án gjaldþrots og það er mikilvægt að leita ráðgjafar vegna fjárhagsvanda áður en tekin er ákvörðun.
Umboðsmaður skuldara hefur tekið saman bækling um gjaldþrot einstaklinga (.pdf)
Skilyrði þess að óska sjálfur eftir gjaldþrotaskiptum?
Skuldari getur krafist þess að bú sitt verði tekið til gjaldþrotaskipta ef hann getur ekki staðið í fullum skilum við kröfuhafa sína þegar kröfur þeirra falla í gjalddaga og ekki verður talið sennilegt að greiðsluörðugleikar hans muni líða hjá innan skamms tíma.
Ferill gjaldþrotaskipta
Krafa um gjaldþrotaskipti skal vera skrifleg og beint til þess héraðsdómstóls þar sem skuldari hefur lögheimili eða dvalarstað. Með kröfunni þurfa að fylgja ákveðin gögn.
Við úrskurð um gjaldþrotaskipti er skipaður skiptastjóri en skiptameðferð tekur alla jafna nokkra mánuði.
Við skiptalok byrjar tveggja ára fyrningarfrestur að líða.
Skuldir fyrnast þegar tvö ár eru liðin frá lokum skiptanna, nema fyrningu sé slitið. Vakin skal athygli á því að tveggja ára fyrningarfrestur gildir ekki um námslán.
Áfram: Að krefjast gjaldþrotaskipta
Þjónustuaðili
Umboðsmaður skuldara