Umsókn um námsheimild og fyrsta ökuskírteini

Á Íslandi er bílprófsaldur 17 ár og miðast við þann dag sem aðili verður 17 ára. Gott er að gefa sér góðan tíma í ökunámið. Ökunám getur hafist við 16 ára aldur. Hvenær ökunám er hafið fer þó eftir ýmsum þáttum s.s. árstíð, búsetu, efnahag, persónulegum aðstæðum eða löngun til að aka. Mikilvægt er að kynna sér allt um ökunám og bílpróf

Ökuskírteinið veitir almenn ökuréttindi í flokki B.

Fyrsta ökuskírteinið er bráðabirgðaskírteini og gildir í 3 ár. Ef skírteinishafi hefur lokið ökuskóla 3, aksturmati og er punktalaus, þá má leggja inn umsókn um fullnaðarskírteini einu ári eftir útgáfu bráðabirgðaskírteinis. Fullnaðarskírteini gildir í 15 ár í senn.

Skilyrði til að hefja ökunám

• Hafa náð 16 ára aldri

• Hafa fullnægjandi sjón og heyrn 

• Vera líkamlega og andlega hæfur til að stjórna bíl 

• Hafa fasta búsetu á Íslandi

Umsóknarferli og fylgigögn

Um leið og nám hefst þarf að sækja stafrænt um námsheimild. Það er gert með að fylla út umsókn um námsheimild og fyrsta ökuskírteinið hér efst á síðunni.

• Velja sér ökukennara

• Velja sér ökuskóla

• Sækja stafrænt um námsheimild. Ökuneminn sækir sjálfur um með rafrænum skilríkjum.

• Í umsókninni er hægt að sækja mynd og undirskrift úr skilríkjaskrá, að því gefnu að myndin uppfylli aldursskilyrði eða nota mynd sem þegar er til í ökuskírteinaskrá. Þetta getur til dæmis átt við ef nemandi hefur þegar öðlast AM-réttindi eða er að hefja ökunám að nýju eftir hlé og hefur áður skilað mynd til sýslumanns.

• Ef engin mynd er til í skilríkjaskrá eða ökuskírteinaskrá er hægt að sækja um nafnskírteini og fara í myndatöku hjá sýslumanni. Strax að myndatöku lokinni er hægt að nota myndina í stafrænni umsókn um námsheimild.

• Einstaklingar 13 ára og eldri geta sjálfir sótt um nafnskírteini sem er ekki ferðaskilríki, án aðkomu forsjáraðila og notað myndina í stafrænu umsóknarferli vegna ökunáms.

• Ef einni eða fleiri heilsufarsspurningu er svarað játandi þarf einnig að skila inn læknisvottorði með í umsóknarferlinu það yfirfarið og námheimild veitt.

• Ef ekki er til stafræn mynd í skilríkjaskrá þarf umsækjandi að koma á skrifstofu sýslumanns. Fylla út umsókn á pappír og skila passamynd á ljósmyndapappír í stærðinni 35x45 mm, með einlitum bakgrunn ásamt því að gefa undirritun, ásamt því að framvísa persónuskilríki.

• Ef einni eða fleiri heilsufarsspurningu er svarað játandi í umsóknarferlinu þarf einnig að skila inn læknisvottorði á skrifstofu sýslumanns.

Afgreiðslu og afhendingarferli

Afgreiðslutími ökuskírteina er allt að 7 virkir dagar frá því að umsókn berst og ökuskírteini er pantað

Hægt er að fá ökuskírteini afhent á eftirfarandi vegu:

• Sent í pósti (póstburðgjald bætist við)

• Sækja í afgreiðslu sýslumanna.

Stafrænt ökuskírteini uppfærist í Ísland.is appinu um leið og ökuskírteini er pantað, hægt er að óska eftir bráðabirgðaakstursheimild á pappír ef t.d. aðilar eru að taka aukin ökuréttindi eða eru ekki með rafræn skilríki.

Kostnaður

Námsheimild gildir í tvö ár og fyrsta ökuskírteinið kostar 4.300 krónur.

Bílpróf getur farið fram þegar nemandi hefur fengið námsheimild hjá sýslumanni og ökukennari hefur staðfest að fullnægjandi ökunám hafi farið fram.