Æfingaakstur

Skilyrði til að fá æfingaakstursleyfi

Ökunemi þarf að ljúka ökuskóla 1 og 10 verklegum ökutímum að jafnaði áður hægt er að sækja um leyfi til æfingaaksturs.

Ökukennarinn

Ökukennarinn metur hvort og hvenær nemandinn er tilbúinn til að hefja æfingaakstur og staðfestir það í rafræna ökunámsbók nemanda. Þá getur leiðbeinandi sótt um að vera leiðbeinandi í æfingaaksti hjá ökunema.

Bíll í æfingaakstri

Bíll sem notaður er til æfingaaksturs með leiðbeinanda má ekki vera yfir 3.500 kg. að leyfðri heildarþyngd. Heimilt er að tengja eftirvagn/tengitæki allt að 750 kg við bílinn. Bíllinn skal vera sérstaklega auðkenndur til æfingaaksturs. Nemandi sem er að læra á beinskiptan bíl má fara í æfingaakstur með leiðbeinanda á sjálfskiptan bíl.

Ekki þarf að sækja sérstaklega um leyfi fyrir bílinn.

Æfingaakstursskilti

Ökuskólar láta nemendur sína hafa skilti/auðkenni til að merkja bíla sem notaðir eru í æfingaakstri. Óheimilt er að nota auðkennið við annan akstur. Ekki er sjálfkrafa komið æfingaleyfi þó skiltið sé sent heim.

Leiðeinandi í æfingaakstri

Leiðbeinandi í æfingaakstri er foreldri eða annar aðili sem fylgir nemanda í æfingaakstri.

Æfingaaksturinn

Æfingaakstur er viðbótaræfing með leiðbeinanda og kemur ekki í stað kennsluaksturs með ökukennara. Í æfingaakstri æfir nemandinn sig í því að aka bíl undir leiðsögn foreldris eða annarra sem uppfylla skilyrði. Leiðbeinandi telst vera stjórnandi bifreiðarinnar. Óheimilt er að taka endurgjald fyrir að leiðbeina í æfingaakstri. Um æfingaakstur með leiðbeinanda gilda að öðru leyti, eftir því sem við á, ákvæði 68. gr.umferðalaga.

Eftir æfingaakstur taka aftur við nokkrir tímar hjá ökukennara í undirbúningi fyrir próf.

Góð ráð til leiðbeinenda í æfingaakstri

• Þjálfaðu minnst eina klukkustund á viku. „Æfingin skapar meistarann“.

• Þjálfaðu nemann vel í að leggja í stæði, aftur á bak og áfram.

• Byrjaðu í rólegri umferð og færðu þig smátt og smátt í erfiðari aðstæður til að venja bæði þig og ökunemann við mismunandi aðstæður.

• Þjálfaðu einnig þegar færi er erfitt vegna hálku eða snjóa.

• Þjálfaðu líka í myrkri eða rigningu til að venja nemann við rétta notkun ljósa s.s. þegar ökutæki mætast.

• Miðaðu hraðann alltaf við aðstæður og umfram allt ekki fara yfir leyfðan hámarkshraða.

• Hafðu það að markmiði að æfa nemann við eins fjölbreyttar aðstæður og hægt er.

• Vertu viðbúin(n) og opin(n) fyrir því að læra eitthvað nýtt um umferðina af nemanum því hann er nýkominn úr námi en mörg ár eru síðan þú varst í ökunámi.

• Notaðu augnspegil í hægra neðra horni framrúðu til að fylgjast með nemanum. Augnhreyfingar segja þér hvort hann hafi tekið eftir aðsteðjandi hættum eða ekki.

• Notaðu auka baksýnisspegil til að fylgjast með umferð fyrir aftan.

• Til að vera viðbúin(n) að grípa inn í aksturinn þarftu að vera vel á verði og fylgjast náið með allri umferð sem er í nánd við bílinn og ætlunum ökunemans.

• Forðastu neikvæðar athugasemdir, styrktu frekar það jákvæða sem ökunemi gerir.

• Þú hefur ekki hemlafetla hjá þér eins og ökukennarinn. Ákveddu því fyrirfram með nemanum markviss fyrirmæli um neyðarstöðvun eða neyðarviðbrögð.

• Hafðu samband við ökukennarann ef illa gengur eða aksturinn er kominn í sjálfheldu.