Sækja um æfingaakstur

Skilyrði fyrir æfingaakstri

• Leiðbeinandi í æfingaakstri er foreldri eða annar aðili sem fylgir barni í æfingaakstri. Til að fá leyfi sem leiðbeinandi við æfingaakstur þarf viðkomandi að hafa náð 24 ára aldri, hafa gild ökuréttindi fyrir B flokk í að minnsta kosti 5 ár og hafa ekki verið sviptur ökuréttindum eða refsað fyrir vítaverðan akstur á síðustu 12 mánuðum.

• Ökunemi þarf að ljúka ökuskóla 1 og 10 verklegum ökutímum að jafnaði áður hægt er að sækja um leyfi til æfingaaksturs.

• Ökukennarinn metur hvort og hvenær nemandinn er tilbúinn til að hefja æfingaakstur og staðfestir það í rafræna ökunámsbók nemanda. Þá getur leiðbeinandi sótt um að vera leiðbeinandi í æfingaaksti hjá ökunema.

Leyfi fyrir leiðbeinendur með ökuskírteini frá EES ríki

Leiðbeinendur með ökuskírteini frá EES ríki þurfa að mæta á skrifstofu sýslumanns með:

• ökukskírteinið

• Umsókn vegna æfingaaksturs frá ökukennara

Kostnaður

Umsókn um æfingaleyfi er ókeypis

Æfingaleyfið

Æfingaleyfið er gefið út á nafn leiðbeinanda og nemanda og er leyfið sent til beggja aðila í pósthólf á island.is. Leyfið gildir í allt að 18 mánuði en þó aldrei lengur en námsheimildin er í gildi.

Uppfylli leiðbeinandi skilyrði, birtist það innan nokkurra mínútna í pósthólfinu. Leyfið fellur sjálfkrafa úr gildi þegar nemandi hefur öðlast ökuréttindi.

Leiðbeinandi skal hafa leyfið meðferðis við æfingaakstur og sýna það þegar lögreglan krefst þess. Í æfingaakstri telst leiðbeinandi vera stjórnandi bifreiðar. Heimilt er að afturkalla leyfi ef sérstaklega stendur á. Leiðbeinanda er óheimilt að taka gjald fyrir að leiðbeina ökunema í æfingaakstri.

Útrunnið æfingaleyfi

Ef námsheimild rennur út, rennur æfingaleyfið líka út. Þá þarf að sækja um nýja námsheimild hjá sýslumanni. Leiðbeinandi þarf þá líka að sækja um heimild aftur.