Misjafnt er hvaða gögn skipta máli við umsókn um alþjóðlega vernd og spilar þar margt inn í, svo sem upprunaland, félagsleg staða og ástæður flótta. Fyrir viðtalið þitt skaltu skoða hvaða gögn þú átt sem geta stutt undir frásögn þína um hvers vegna þú flúðir heimaríki þitt.

Dæmi um gögn:

• Gögn sem sanna uppruna og tengsl, svo sem kennivottorð, fæðingarvottorð, hjúskapavottorð og forsjárgögn.

• Gögn frá opinberum stofnunum á borð við lögregluskýrslur, dómsmál eða sakavottorð.

• Gögn um heilsufar eins og sjúkraskýrslur og greiningar.

• Gögn varðandi menntun eða fyrri störf á borð við útskriftarskírteini, ráðningarsamninga, fyrirtækjaskráningu eða aðild að félagasamtökum.

• Óformleg gögn sem að öðru leyti styðja við frásögn af ákveðinni atburðarrás, svo sem ljósmyndir, myndbönd og símaskilaboð.

Athugaðu að ofangreindur listi er ekki tæmandi og að misjafnt getur verið hvaða gögn eru talin skipta máli miðað við aðstæður að hverju sinni.