Hafðu samband við bankann þinn eða fjármálaþjónustu sem fyrst til að endurheimta peninginn. Því fyrr sem brugðist er við, því meiri líkur eru á að stöðva greiðsluna.
Greiðsla á erlendan reikning getur tekið nokkra daga. Þegar greiðslan hefur farið úr landi er mjög erfitt að endurheimta peninginn. Viðtakandinn greiðir oft peninginn áfram til fleiri banka og tekur hann jafnvel út í reiðufé fáeinum klukkustundum eftir að greiðslan er komin.
Ef netglæpamaðurinn er hérlendis eða óskar eftir innlendri greiðslu milli íslenskra banka eru meiri líkur á að endurheimta peninginn.
Það er nánast ómögulegt að rekja greiðslur með rafmynt, þess vegna óska fjárkúgarar og netglæpamenn oft eftir því.
Tilkynntu fjársvikin til lögreglu, annað hvort hér eða á næstu lögreglustöð. Í tilkynningunni er beðið um að gefa lögreglunni heimild til að fá upplýsingar um greiðsluna hjá bankanum þínum. Það er mikilvægt til að hjálpa við rannsókn málsins.
