Samskiptasvik

• Skilaboð eða hótanir um yfirvofandi hættu gefa oft til kynna að um svindl sé að ræða og gætu verið vefveiðar.

• Lestu vel slóðina á vefsíðu til að vera viss um að þú sért ekki á svikavefsíðu.  

• Lögmæt fyrirtæki, bankar eða opinberar stofnanir biðja aldrei um persónulegar eða öryggistengdar upplýsingar gegnum skilaboð eða símtöl, til dæmis PIN-númer, kortaupplýsingar eða lykilorð.

• Aldrei gefa óþekktum aðila aðgang að tölvunni þinni eða bankareikningi, ekki fara eftir fyrirmælum frá einhverjum sem þú þekkir ekki og lokaðu á símtöl sem þú átt ekki von á.

• Aldrei samþykkja innskráningu eða staðfesta aðgerðir með rafrænum skilríkjum nema þú sért í raun og veru að nota þau til að skrá þig inn.

• Farðu mjög varlega þegar þú færð skilaboð sem innihalda hlekki eða biðja um viðkvæmar upplýsingar, sérstaklega ef þú átt ekki von á skilaboðum frá manneskjunni.

• Svikarar fá oft upplýsingar um netföng með því að brjótast inn á vefi fyrirtækja. Á vefsíðunni Have I Been Pawned geturðu athugað hvort netfangið þitt hafi verið hluti af gagnabroti. Ef svo er ættirðu að breyta um lykilorð á þeim reikningi og á tölvupóstinum þínum.

Það er mikilvægt að vafra á netinu á öruggum síðum með öruggum tækjum og lykilorðum. Tryggðu öryggi þitt á netinu með ýmsum ráðum.

Ráð fyrir samfélagsmiðla

Grunsamleg skilaboð

Ef þú færð grunsamleg skilaboð á samfélagsmiðlum tilkynntu (e. report) það til viðkomandi samfélagsmiðils. Ekki opna neina hlekki né gefa upp persónulegar upplýsingar.

Beiðni um pening

Ef einhver biður þig um pening á samfélagsmiðlum gæti það verið svindl. Skoðaðu prófílinn vandlega – leitaðu að óeðlilegum ummerkjum eins og nýjum eða ófullkomnum upplýsingum. Ef þú ert í vafa, reyndu að staðfesta að viðkomandi sé raunveruleg manneskja áður en þú bregst við.

Reikningurinn þinn hefur verið hakkaður

• Athugaðu hvort þú komist ennþá inn á reikninginn þinn.

• Ef þú kemst inn, breyttu lykilorðinu og settu upp fjölþátta-auðkenningu.

• Ef þú kemst ekki inn, reyndu að endursetja lykilorðið.

• Ef það virkar ekki, tilkynntu samfélagsmiðlinum að reikningurinn þinn hafi verið hakkaður. Sjá leiðbeiningar fyrir helstu samfélagsmiðla.

• Breyttu lykilorði á öllum öðrum aðgöngum sem nota sama - eða svipað - notendanafn og lykilorð.

• Farðu vel yfir öryggi þitt á netinu, .

Símtöl 

Óvænt erlend símtöl gætu verið svikasímtöl og því er best að svara þeim ekki. Svikarar geta líka falsað númerið sem hringt er úr (e. spoofing) til að það virðist vera íslenskt. Þekkt dæmi um svikasímtöl:

• Svikari þykist vera frá Microsoft og segir að það sé þekkt villa í tölvunni og að hann þurfi aðgang að tölvunni til að lagfæra hana.

• svikari þykist vera lögreglumaður eða bankastarfsmaður sem þurfi aðgang að bankareikningnum þínum til að laga eitthvað vandamál.

Aldrei gefa upp viðkvæmar upplýsingar í síma eða gefa einhverjum aðgang að tölvunni þinni eða bankareikningi.

Varastu falsfréttir

Ótrúlegar fyrirsagnir á samfélagsmiðlum geta verið merki um falsfréttir sem leiða þig á svikavefsíðu.