Sjálfsvígsforvarnir

Unnið er að gerð fræðsluvefs fyrir ungt fólk um geðheilbrigði. Markmiðið með vefsíðunni er að ungmenni geti fengið upplýsingar um heilsu og líðan. Á síðunni verða líka hagnýt ráð, sjálfshjálparúrræði, æfingar og upplýsingar um snemmtækan stuðning og úrræði ef á þarf að halda.

Efni síðunnar mun byggja á gagnreyndu fræðsluefni en fyrirmyndin er meðal annars danska vefsíðan Mindhelper.dk. Efnisflokkar á vefsíðunni verða meðal annars kvíði, depurð, ást og kynlíf, streita og einmanaleiki. Vefsíðan verður unnin af sérfræðingum á lýðheilsusviði embættis landlæknis í samstarfi við helstu sérfræðinga innanlands í hverjum málaflokki fyrir sig. Verkefnastjórnun er hjá Lífsbrú - miðstöð sjálfsvígsforvarna.

Vinnsla á rafrænu fræðsluefni af þessu tagi er hluti af vinnu við Aðgerðaáætlun til að fækka sjálfsvígum á Íslandi (aðgerð.5.3). Aðgerðin hefur verið fjármögnuð af heilbrigðisráðuneytinu. Í fyrstu útgáfu íslensku vefsíðunnar verður gefið út efni sem miðar að ungu fólki. Danska fyrirmyndin er líka með efni fyrir foreldra.

Stefnt er að því að vefsíðan verði sett í loftið síðla árs 2026.