Stafrænt Ísland

Umsóknarkerfi

Efnisyfirlit

Um Umsóknarkerfið

Hvað þarf stofnun að gera?

Hlutverk Stafræns Íslands

Prófunarumhverfi Umsóknarkerfis

Vefþjónustur við málakerfi stofnanna

Um Umsóknarkerfið

Hlusta

Umsóknarkerfi Ísland.is er öflugt verkfæri til þess að færa umsóknaferli hjá stofnunum og opinberum aðilum í notendavænt stafrænt viðmót.

Kerfið er hannað til þess að ná utan um allar helstu tegundir opinberra umsókna og samræma þannig upplifun notenda þvert á stofnanir. Umsóknarkerfi Ísland.is styður vel við sjálfsafgreiðslu umsókna en gerir notendum jafnframt kleift að fylgjast með framgangi sinna umsókna á einum stað, hvar og hvenær sem er á Mínum síðum á Ísland.is.

Þá auðveldar umsóknakerfið yfirsýn starfsfólks stofnana og fækkar bæði handtökum og pappírsmagni.

Nú eru um 300 umsóknaferli aðgengileg á Ísland.is.

Kynningarmyndband um Umsóknakerfi Ísland.is

Einfalt ferli til að stafvæða umsóknir

Kerfið hentar fyrir allar stofnanir og sveitarfélög sem veita þjónustu til almennings og vilja auka sjálfsafgreiðslu einstaklinga og fyrirtækja í notendavænu og aðgengilegu viðmóti.

Um leið er verið að samnýta fjárfestingu í tæknilegum innviðum, hönnun og aðgengi til hagræðis fyrir allar stofnanir og sveitarfélög.

Ávinningur stofnana felst í:

einfaldari þjónustuferlum
betur upplýstum notendum
meiri sjálfvirknivæðingu
rýmri tíma starfsfólks til að sinna flóknari þjónustu

Ábyrgð og eignarhald á þjónustu sem færð er yfir í umsóknarkerfið er áfram hjá stofnuninni. Við innleiðinguna eru sett upp samskipti milli innra kerfis stofnunarinnar og viðmótsins á Ísland.is.

Dæmi um umsóknir

Umsóknarkerfi Ísland.is er hannað til þess að ná utan um allar tegundir opinberra umsókna og þjónustu.

Dæmi um mismunandi flokka sem umsóknarkerfið getur sinnt:

Með notkun umsóknarkerfisins geta stofnanir veitt hvers kyns vottorð eða staðfestingar á skráningu til notenda í sjálfsafgreiðslu. Slíkt sparar tíma bæði starfsfólks og notenda. Með tengingu við greiðslugátt og afhendingu í stafrænt pósthólf á Ísland.is er gengið frá umsókn, greiðslu og afhendingu vottorða í einu og sama sjálfvirka ferlinu.

Dæmi um slíkar umsóknir eru umsóknir um sakavottorð, skuldleysisvottorð og veðbókavottorð.

Umsóknarkerfið býður upp á sjálfvirknivæðingu í leyfisveitingum, þar sem forsendur leyfisins eru skoðaðar samhliða því að notandi sækir um og sjálft leyfið afhent samstundis ef notandinn uppfyllir öll skilyrði. Reglur sem gilda um veitingu leyfa eru byggðar inn í umsóknarflæðið og notandinn upplýstur á mannamáli um ástæður þess ef ekki er hægt að veita leyfið, ef svo ber undir. Með tengingu við greiðslugátt og afhendingu í stafrænt pósthólf er gengið frá umsókn, greiðslu og afhendingu leyfisins í einu og sama sjálfvirka ferlinu.

Dæmi um slíkar umsóknir eru t.d. umsókn um leyfi til setu í óskiptu búi, málflutningsleyfi fyrir héraðsdómi og leyfi til einkaskipti á dánarbúi.

Með umsóknarkerfinu geta stofnanir heimilað notendum að gera breytingar á eigin skráningu í grunnskrám stofnunarinnar. Núverandi skráning og reglur um breytingar eru teknar inn í umsóknarflæðið og notandinn leiddur í átt að þeirri breytingu sem hann vill gera. Þurfi að kalla til þriðja aðila vegna álits eða samþykkis á breytingunni, býður umsóknarkerfið upp á að viðkomandi taki sér hlutverk í umsókninni og falli þannig inn í flæðið ásamt notandanum.

Dæmi um slíkar umsóknir eru umsóknir um breytingar á umráðamanni eða meðeiganda ökutækis og afskráning á ökutækjum.

Umsóknarkerfið gerir stofnunum kleift að birta stöðu erinda frá notendum. Þar getur notandi nálgast, séð og fylgst með stöðu sinna mála. Þessi virkni hentar fyrir tilkynningar, kvartanir eða beiðnir þar sem taka þarf á móti upplýsingum eða gögnum frá notendum til vinnslu hjá stofnuninni.

Dæmi um slíkar umsóknir eru tilkynning um umráðaskipti ökutækis og kvörtun til Umboðsmanns Alþingis.

Umsóknarkerfið er beintengt við staðgreiðslugátt þar sem notendur geta greitt fyrir opinbera þjónustu með debet- eða kreditkorti. Reikningur og greiðsla bókast samstundis í sjálfvirku tekjubókhaldskerfi ríkisins (TBR) og rafrænn reikningur verður aðgengilegur notanda á Mínum síðum.

Dæmi um umsóknir sem bjóða uppá greiðslur er umsókn um afskráningu ökutækis, umsókn um sakavottorð og umsókn um ríkisborgararétt.

Með Umsóknarkerfi Ísland.is má færa styrkumsóknir yfir í notendavænt og einfalt viðmót þar sem gögnum um umsækjanda er safnað með beinum samskiptum við grunnskrár ríkisins og þannig dregið verulega úr afgreiðslutíma og handavinnu. Þegar úthlutunarreglur eru skýrar og gögn til staðar er hægt að afgreiða styrkbeiðnirnar sjálfvirkt og senda niðurstöður umsókna í stafrænt pósthólf á Ísland.is.

Dæmi um slíkar umsóknir eru umsókn um rafbílastyrk og umsókn um styrk úr Framkvæmdasjóði ferðamannastaða.

Umsóknarkerfi Ísland.is hentar fyrir allar stofnanir og sveitarfélög sem veita þjónustu til almennings og vilja auka sjálfsafgreiðslu einstaklinga og fyrirtækja í notendavænu og aðgengilegu viðmóti.