Umsókn um sakavottorð til einstaklinga

Á sakavottorðinu koma fram þeir dómar og sáttir í refsimálum sem einstaklingur hefur fengið.

• Stafrænt sakavottorð er ekki til prentunar á pappír, á því er rafrænt innsigli/stimpill og því þarf að afhenda það með rafrænum leiðum. Rafræna innsiglið tryggir að skjalið sé vottað, ef skjalinu er breytt á einhvern hátt, missir skjalið innsiglið/stimpilinn.

• Sakavottorð fást ekki endurgreidd.

Til þess að sækja stafrænt sakavottorð þarf umsækjandi að vera með rafræn skilríki á Íslandi og vera eldri en 15 ára.

Sakavottorðið er gefið út á íslensku með enskri þýðingu í samræmdu skjali. Athugið að dómar eru þó aðeins á íslensku.

Sakavottorðið er strax aðgengilegt í lokaskrefi umsóknarferlis. Einnig er vottorðið sent í pósthólf umsækjanda.

Greitt er með greiðslukorti í umsóknarferlinu og er gjaldið 2.700 kr. Þegar umsókn hefur verið kláruð eru reikningar og greiðslukvittanir aðgengileg undir Fjármál á Mínum síðum.

Hvað kemur fram á sakavottorði?

• Brot á almennum hegningarlögum.

• Brot á lögum um ávana- og fíkniefni.

Hvað kemur ekki fram á sakavottorði?

• Fangelsisdómar eldri en 5 ára frá dómsuppkvaðningu eða frá því að dómþoli var látinn laus hafi hann afplánað refsingu.

• Aðrir dómar eldri en þriggja ára.

• Ráðstafanir samkvæmt almennum hegningarlögum, til dæmis vistun á heilbrigðisstofnun eða meðferðarheimili, ef liðin eru 5 ár frá því að ráðstöfun var felld niður.

Nánari upplýsingar um sakaskrá má finna á vef Ríkissaksóknara.

Eingöngu þeir sem eru með rafræn skilríki á Íslandi eða íslenska kennitölu geta sent beiðni um útgáfu sakavottorðs rafrænt. Einstaklingur sem uppfyllir ekki þau skilyrði þarf að mæta á skrifstofu sýslumanns og framvísa persónuskilríkjum.

Apostille vottun á prentað sakavottorð

Þar sem stafrænt sakavottorð er einungis með rafrænan stimpli/undirskrift er ekki hægt að apostille votta þau.
Ef þú þarft apostille vottun á skjal sem nota á erlendis þarf að nálgast sakavottorð á skrifstofu sýslumanns og láta votta það hjá starfsmanni utanríkisráðuneytisins sem er staðsettur hjá Sýslumanninum á höfuðborgarsvæðinu, Hlíðasmára 1, Kópavogi.