Utanríkisráðuneytið sér um að staðfesta skjöl sem gefin eru út af íslensku stjórnvaldi en móttaka og afgreiðsla slíkra skjala er hjá Sýslumanninum á höfuðborgarsvæðinu, Hlíðarsmára 1.
Hvað er apostille staðfesting?
Apostille-staðfesting og keðjustimplun eru formlegar staðfestingar á lögmæti skjala sem nota á erlendis. Ferlið felur í sér staðfestingu á að undirskrift og stimpill séu sannanlega útgefin eða vottuð af til þess bæru íslensku stjórnvaldi.
Athugað er hvort undirskrift og stimpill á skjali séu ósvikin. Lögmæti skjalsins er apostille-staðfest með því að festa fylgiskjal, með stimpli utanríkisráðuneytisins, við skjalið. Í tilfelli keðjustimplana er skjalið staðfest með stimpli utanríkisráðuneytisins.
Athygli er vakin á því að apostille-staðfesting eða keðjustimplun felur ekki í sér efnislega staðfestingu á innihaldi skjalsins.
Hvaða skjöl er hægt að staðfesta?
Einungis er hægt að staðfesta:
Frumrit skjals sem er undirritað og stimplað af íslensku stjórnvaldi.
Íslensk skjöl sem hafa verið lögbókanda-vottuð (notarius publicus) hjá sýslumanni (þar með talin afrit opinberra skjala).
Hvað það kostar staðfesting?
Hver staðfesting kostar 2.700 kr.
Póstsending skjala kostar 2.000 kr.
Hvað tekur staðfesting langan tíma?
Skjölin eru tilbúin til afhendingar í móttöku Sýslumanns á höfuðborgarsvæðinu eftir kl. 14, tveimur virkum dögum eftir að þau berast.
Hvernig virkar ferlið?
Umsækjendur fylla út beiðni hér á vefnum, þar þarf að veita upplýsingar um:
Nafn og símanúmer/tölvupóst tengiliðs sem biður um staðfestingu.
Heiti vottorðs, ef við á.
Í hvaða landi á að nota skjölin.
Fjölda þeirra skjala sem óskast staðfest.
Ef skjölin óskast póstsend eftir staðfestingu þarf að tilgreina nákvæmt heimilisfang viðtakanda.
Greiðslur
Hægt er að greiða fyrir staðfestingu með:
Greiðslukorti (debet- eða kreditkorti) í umsóknarferlinu.
Innlendri millifærslu á reikning utanríkisráðuneytisins.
Kt. 670269-4779
Bankanúmer: 0303-26-269.
Senda þarf kvittun fyrir greiðslu á netfangið apostille@mfa.is.Millifærslu af erlendum bankareikningi
IBAN IS80 0303 2600 0269 6702 6947 79 / SWIFT ESJAISRE
Bank name: Arion Bank, Borgartún 19, 105 Reykjavík Account of: Ministry for Foreign Affairs, Rauðarárstígur 25, 105 Reykjavík, Iceland.
Athygli er vakin á því að geri viðtakandi skjalanna kröfu um að þau séu þýdd á tungumál viðtökuríkis þarf að:
Fá skjalið þýtt hjá löggiltum skjalaþýðanda hérlendis (sjá yfirlit yfir starfandi skjalaþýðendur).
Fá þýðinguna vottaða af sýslumanni.
Því næst fá staðfestingu á gildi skjalanna.
Þjónustuaðili
UtanríkisráðuneytiðTengd stofnun
Sýslumenn