Ótímabundið dvalarleyfi

Barn handhafa ótímabundins dvalarleyfis, sem fæðist eftir að foreldri þess kemur til Íslands, getur fengið ótímabundið dvalarleyfi án þess að uppfylla skilyrði um fyrri dvöl.

Foreldrið sækir um fyrir barnið með því að fylla út stafrænu umsókina um ótímabundið dvalarleyfi á þessari síðu.

Þessi gögn þurfa að fylgja með umsókninni:

• Afrit vegabréfs barnsins.

• Fæðingarvottorð barnsins.

• Forsjárgögn, í þeim tilvikum þegar foreldrar eru ekki í hjúskap og/eða annað foreldrið er ekki löglega búsett á Íslandi.

• Ef báðir foreldrar fara með forsjá barns, þarf það foreldri sem ekki er sótt um fjölskyldusameiningu við að samþykkja að barnið fái dvalarleyfi hér á landi.

  • Samþykki foreldris vegna umsóknar barns um dvalarleyfi á Íslandi.

Erlendur ríkisborgari, sem var íslenskur ríkisborgari við fæðingu en hefur misst ríkisborgararéttinn eða afsalað sér honum, getur sótt um ótímabundið dvalarleyfi án þess að hafa búið áður á Íslandi, ef hann hyggst setjast hér að.

Maki eða sambúðarmaki íslensks ríkisborgara getur sótt um ótímabundið dvalarleyfi þegar hann hefur búið með íslenskum maka sínum hér á landi og haft dvalarleyfi samfellt í minnst þrjú ár eftir stofnun hjúskapar eða skráningu sambúðar. Dvalarleyfi umsækjandans þarf ekki að hafa verið gefið út á grundvelli hjúskapar eða sambúðar.

Erlendur ríkisborgari sem á íslenskan ríkisborgara að foreldri getur sótt um ótímabundið dvalarleyfi þegar hann hefur haft dvalarleyfi hér á landi samfellt síðastliðin tvö ár fyrir framlagningu umsóknar. Foreldrið þarf að hafa haft íslenskan ríkisborgararétt í minnst fimm ár. Það skiptir ekki máli hvort dvalarleyfi umsækjandans geti verið grundvöllur ótímabundins dvalarleyfis eða ekki.

Erlendur ríkisborgari sem hefur lokið doktorsnámi á Íslandi getur sótt um ótímabundið dvalarleyfi þegar hann hefur haft dvalarleyfi á grundvelli starfs sem krefst sérfræðiþekkingar í minnst þrjú ár.

Erlendur ríkisborgari, sem hefur áður dvalið hér á landi í samfelldri dvöl á dvalarleyfi vegna náms, getur sótt um ótímabundið dvalarleyfi þegar hann hefur haft dvalarleyfi sem getur verið grundvöllur ótímabundins dvalarleyfis í að minnsta kosti tvö ár. Heildardvöl þarf að minnsta kosti að vera fjögur ár.

Ungmenni 18 ára eða eldra, sem hefur dvalið hér á landi á grundvelli fjölskyldusameiningar í fjögur ár eða lengur og stundað nám eða störf, getur sótt um ótímabundið dvalarleyfi án þess að uppfylla skilyrði um samfellda dvöl.