Dvalarleyfi á grundvelli alþjóðlegrar verndar

Afturköllun verndar hefur þau áhrif að dvalarleyfi sem veitt hefur verið á grundvelli verndarinnar er einnig afturkallað. Viðkomandi einstaklingur hefur þá ekki lengur heimild til dvalar á Íslandi.

Þú færð senda tilkynningu frá Útlendingastofnun um að verið sé að kanna hvort afturkalla eigi vernd þína og dvalarleyfi.

Þú færð jafnframt boð í viðtal hjá stofnuninni þar sem þér er gefinn kostur á að leggja fram gögn eða andmæli gegn hugsanlegri afturköllun.

Þú getur leitað þér aðstoðar lögmanns eða annars fulltrúa á eigin kostnað. Þú getur einnig haft samband við fulltrúa Flóttamannastofnunar Sameinuðu þjóðanna eða við mannúðar- eða mannréttindasamtök sem starfa á Íslandi.

Þér verður tilkynnt um afturköllun á alþjóðlegri vernd og dvalarleyfi með birtingu ákvörðunar frá Útlendingastofnun. Í ákvörðuninni verður rökstutt á hvaða grundvelli dvalarleyfi þitt og staða sem flóttamaður hafa verið afturkölluð.

Já, ákvörðun Útlendingastofnunar um afturköllun á alþjóðlegri vernd og dvalarleyfi er kæranleg til kærunefndar útlendingamála. Kæra skal berast innan 15 daga frá móttöku ákvörðunarinnar.

Já, kæra frestar framkvæmd ákvörðunar. Það þýðir að ef þú kærir ákvörðun Útlendingastofnunar um afturköllun á alþjóðlegri vernd og dvalarleyfi verður réttaráhrifum ákvörðunarinnar ekki framfylgt á meðan mál þitt er til meðferðar hjá kærunefndinni.

Staða þín verður áfram eins og ákvörðun um afturköllun hafi ekki verið tekin og heldur þú þeirri stöðu þar til úrskurðað hefur verið í kærumálinu.

Já, þú átt rétt á skipun talsmanns á kærustigi.

Ef veiting alþjóðlegrar verndar er afturkölluð athugar Útlendingastofnun hvort þú eigir rétt á dvalarleyfi á grundvelli mannúðarsjónarmiða og einnig hvort grundvallarreglan um bann við því að vísa fólki brott eða endursenda þangað sem líf þess eða frelsi kann að vera í hættu eigi við.

Afturköllun á alþjóðlegri vernd og dvalarleyfi felur í sér að þér ber að yfirgefa Ísland og snúa aftur til heimalands eða annars lands þar sem þú hefur löglega heimild til dvalar. Þér verður gefinn ákveðinn tímafrestur til að yfirgefa landið á eigin vegum. Kærir þú ákvörðunina til kærunefndar útlendingamála máttu dvelja áfram á Íslandi á meðan mál þitt er til meðferðar hjá kærunefndinni.

Staðfesti kærunefnd útlendingamála ákvörðunina um afturköllun á alþjóðlegri vernd þinni og dvalarleyfi, verður þú að yfirgefa landið. Ef þú ferð ekki innan frestsins sem þér er veittur verður máli þínu vísað til framkvæmdar hjá Heimferða- og fylgdadeild ríkislögreglustjóra.