Dvalarleyfi á grundvelli viðbótarverndar

Ef þú sækir um alþjóðlega vernd á Íslandi og færð veitta viðbótarvernd, fylgir því dvalarleyfi sem gildir í tvö ár.

Viðbótarvernd er veitt þeim sem eiga á hættu

• að sæta dauðarefsingu,

• að sæta pyndingum eða annarri ómannúðlegri meðferð eða

• að verða fyrir alvarlegum skaða vegna vopnaðra átaka í heimalandi.

Réttur til að vinna

Leyfið heimilar þér að vinna á Íslandi án þess að þurfa að sækja um atvinnuleyfi.

Réttur til ferðaskírteinis fyrir flóttafólk

Þú átt rétt á því að sækja um ferðaskírteini fyrir flóttafólk til að ferðast til útlanda.

Réttur til endurnýjunar leyfis

Þú þarft að sækja um endurnýjun dvalarleyfisins áður en leyfið þitt rennur út. Ef þú þarft enn á vernd að halda, er heimilt að endurnýja leyfið þitt.

Réttur til fjölskyldusameiningar

Dvalarleyfi á grundvelli viðbótarverndar veitir ekki rétt til fjölskyldusameiningar fyrr en eftir að það hefur verið endurnýjað.

Hægt er að veita undanþágu frá þessu skilyrði:

• Ef ríkar sanngirnisástæður mæla með því vegna aðkallandi umönnunarsjónarmiða.

• Ef þú hefur haft hér dvalarleyfi í eitt ár, verið virkur þátttakandi á vinnumarkaði í átta mánuði, uppfyllir skilyrði um trygga framfærslu, uppfyllir skilyrði um íslenskukunnáttu og hefur til umráða íbúðarhúsnæði fyrir þá aðstandendur sem hyggjast koma hingað.

Ólíkar reglur og skilyrði gilda um fjölskyldusameiningar við aðstandendur eftir því hvort fjölskyldutengsl voru til staðar áður eða eftir að þú fékkst veitta viðbótarvernd á Íslandi.

Fjölskyldutengsl fyrir veitingu

Endurnýjað dvalarleyfi á grundvelli viðbótarverndar veitir rétt til fjölskyldusameiningar við:

• Maka, sem þú giftist eða hófst sambúð með áður en þú sóttir um vernd á Íslandi.

• Börn þín yngri en 18 ára, sem fæddust áður en þú sóttir um vernd á Íslandi.

• Foreldra þína, ef þau eru 67 ára eða eldri.

Fjölskyldutengsl eftir veitingu

Endurnýjað dvalarleyfi á grundvelli viðbótarverndar veitir rétt til fjölskyldusameiningar við:

• Maka, sem þú giftist eða hófst sambúð með eftir að þú fékkst veitta viðbótarvernd á Íslandi.

  • Almennt skilyrði fyrir slíku leyfi er að þú hafir starfað eða stundað nám í löglegri dvöl á Íslandi í fjögur ár.

• Börn þín yngri en 18 ára, sem fæddust eftir að þú fékkst veitta viðbótarvernd á Íslandi.

Réttur til ótímabundins dvalarleyfis

Þú getur sótt um ótímabundið dvalarleyfi eftir að þú hefur verið með dvalarleyfi á grundvelli viðbótarverndar í fjögur ár.

• Athugið að eitt af skilyrðum ótímabundins dvalarleyfis er að hafa ekki hafa dvalist meira en 90 daga erlendis samtals á hverju ári á gildistíma dvalarleyfis, talið frá útgáfudegi leyfis.

Lög

Viðbótarvernd er veitt á grundvelli 2. málsgreinar 37. greinar og 1. málsgreinar 40. greinar laga um útlendinga.

Dvalarleyfi á grundvelli viðbótarverndar er veitt á grundvelli 73. greinar laga um útlendinga.