Þeir sem njóta alþjóðlegrar verndar eða viðbótarverndar á Íslandi og dveljast löglega í landinu geta sótt um ferðaskírteini fyrir flóttafólk til ferða til útlanda.
Umsókn
Umsóknir þarf að leggja fram í frumriti á pappír.
Þeim má skila í þar til gerðan póstkassa í anddyri Útlendingastofnunar eða með því að senda umsókn í bréfpósti. Áður en það er gert er nauðsynlegt að greiða fyrir umsókn með millifærslu í banka og þarf greiðslukvittun að fylgja umsókn til staðfestingar, sjá upplýsingar um greiðslu afgreiðslugjalds.
Útlendingastofnun (sjá á korti)
Dalvegi 18
201 Kópavogi
Ísland
Einnig er hægt að leggja inn umsókn og greiða fyrir í afgreiðslu Útlendingastofnunar eða hjá embættum sýslumanna utan höfuðborgarsvæðisins.
Kostnaður
Afgreiðslugjald er 7.000 krónur.
Ógreidd umsókn verður endursend umsækjanda.
Afgreiðslugjald er ekki endurgreitt þótt umsækjandi hætti við umsókn.
Fylgigögn umsóknar
Umsókn skal vera í frumriti, vel útfyllt og undirrituð af umsækjanda, eða forsjáraðila/-aðilum ef sótt er um fyrir barn yngra en 18 ára.
Ef þú hefur í fórum þínum vegabréf útgefið af heimaríki eða ferðaskilríki útgefin af öðrum ríkjum, verður þú að skila þeim með umsókn.
Ef þú hefur áður fengið útgefið ferðaskírteini frá Útlendingastofnun, verður þú að skila því með umsókn um nýtt ferðaskírteini.
Umsókn samþykkt
Þegar umsókn þín hefur verið samþykkt færðu boð í myndatöku. Börn geta aðeins mætt í myndatöku fyrir ferðaskírteini í fylgd forsjáraðila.
Umsókn synjað
Heimilt er að synja útgáfu ferðaskírteinis þegar
Ekki er staðfest hver umsækjandi er eða vafi leikur á um hver hann er.
Umsækjandi er eftirlýstur af lögreglu, gefin hefur verið út handtökuskipun á hendur honum eða lagt á hann farbann. Fram er komin kæra á hendur umsækjanda fyrir refsivert brot sem ætla má að varði fangelsisrefsingu.
Umsækjandi hefur hlotið endanlegan dóm fyrir mjög alvarlegt afbrot og er talinn hættulegur samfélaginu.
Ástæður sem varða öryggi ríkisins eða stefnu stjórnvalda í utanríkismálum mæla gegn því.
Réttindi og skyldur
Ef ferðaskírteini glatast eða eyðileggst skal tilkynna lögreglu og Útlendingastofnun það þegar í stað með því að fylla út tilkynningu um glatað ferðaskilríki.
Afturköllun
Ferðaskírteini fyrir flóttamenn skal afturkalla þegar
handhafa þess er vísað frá landi á grundvelli brottvísunar
handhafi þess útvegar sér ferðaskilríki heimaríkis
handhafi þess missir réttarstöðu sína sem flóttamaður við það að fá íslenskan ríkisborgararétt eða ríkisborgararétt annars ríkis eða missir hana á annan hátt
handhafa þess er samkvæmt lögum bannað að yfirgefa landið
brottför handhafa frá landinu mundi fara í bága við dóm, úrskurð eða ákvörðun stjórnvalda
útliti eða efni þess hefur verið breytt á ólögmætan hátt
Heimilt er að afturkalla ferðaskírteini fyrir flóttamenn þegar
það hefur skemmst eða er ónothæft af öðrum ástæðum
ljósmynd eða upplýsingar í því svara ekki lengur til auðkenna handhafa
það finnst í vörslu óviðkomandi aðila
handhafi þess hefur ekki lengur leyfi til dvalar hér á landi.
Lög
Ferðaskírteini fyrir flóttamenn er gefið út á grundvelli 1. málsgreinar 46. greinar laga um útlendinga, 1. greinar laga um vegabréf og 17. greinar reglugerðar um íslensk vegabréf.
Þjónustuaðili
Útlendingastofnun