Ferðaskírteini fyrir flóttafólk

Ferðaskírteini fyrir flóttafólk verður aðeins gefið út ef þú:

• hefur löglega búsetu á Íslandi,

• ert með dvalarleyfi á grundvelli alþjóðlegrar verndar eða viðbótarverndar, 

• hefur upplýst auðkenni þannig að ekki leiki vafi á því hver þú ert, 

• hefur ekki verið kærð/kærður fyrir refsivert brot sem varðar fangelsisrefsingu og

• hefur ekki hlotið endanlegan dóm fyrir mjög alvarlegt brot og ert ekki talin/talinn hættulegur samfélaginu.

Með umsóknareyðublaðinu þarftu að leggja fram: 

• Gilt vegabréf útgefið af heimaríki eða ferðaskilríki útgefið af öðru ríki, ef slík gögn eru ekki nú þegar í vörslu Útlendingastofnunar. 

  • Athugaðu að ferðaskilríki eða dvalarleyfiskort útgefin af öðru ríki en heimaríki geta ekki staðfest auðkenni. Í slíkum tilfellum þarf að skila inn þeim gögnum sem lágu til grundvallar við útgáfu skilríkjanna. 

• Ef þú hefur áður fengið útgefið ferðaskírteini fyrir flóttafólk frá Útlendingastofnun verður þú að leggja það fram með umsókn um nýtt ferðaskírteini. 

  • Ef ferðaskírteini glatast eða eyðileggst skal tilkynna lögreglu og Útlendingastofnun það þegar í stað með því að fylla út tilkynningu um týnt eða stolið ferðaskilríki. 

• Hafi auðkenni þitt ekki verið staðfest þegar þér var veitt alþjóðleg vernd eða viðbótarvernd þarftu að leggja fram gögn sem staðfesta auðkenni þitt. Dæmi um gögn sem geta staðfest auðkenni eru:  

  • Eldri vegabréf og kennivottorð.  

  • Önnur formleg auðkennisgögn sem innihalda mynd af þér og eru útgefin af stjórnvöldum.  

  • Gögn sem nota má til stuðnings eru formlega útgefin gögn á borð við: nafnskírteini, fæðingarvottorð, fjölskyldubók, búsetuskráningu, hjúskaparvottorð, forræðisgögn eða sakavottorð. 

Auðkennismat 

Hafi auðkenni þitt ekki verið staðfest við veitingu verndar þarf að leggja mat á þau gögn sem þú hefur áður lagt fram og varða auðkenni þitt. Þú gætir fengið sent bréf um að enn leiki vafi á auðkenni þínu og þér gefinn tiltekinn frestur til að leggja fram frekari gögn. 

Gerð er krafa um að fylgigögn umsóknar séu lögð fram í lögformlega staðfestu frumriti eða staðfestu afriti. Ef skjöl eru ekki á ensku eða norrænu tungumáli þarf löggilt þýðing að fylgja með þeim. 

Lagt er mat á öll þau gögn sem lögð eru fram en vinsamlegast athugaðu að afrit gagna geta ekki, ein og sér, leitt líkum að auðkenni þar sem ekki er unnt að kanna áreiðanleika þeirra. 

Best er að hlaða eyðublaðinu niður og fylla út í tölvu.

Umsóknir um ferðaskírteini fyrir flóttafólk þarf að leggja fram í frumriti á pappír.

Þeim má skila í þar til gerðan póstkassa í anddyri Útlendingastofnunar eða með því að senda umsókn í bréfpósti. Áður en það er gert er nauðsynlegt að greiða fyrir umsókn með millifærslu í banka og þarf greiðslukvittun að fylgja umsókn til staðfestingar, sjá upplýsingar um greiðslu afgreiðslugjalds.

Útlendingastofnun (sjá á korti)
Dalvegi 18
201 Kópavogi Ísland

Einnig er hægt að leggja inn umsókn og greiða fyrir í afgreiðslu Útlendingastofnunar eða hjá embættum sýslumanna utan höfuðborgarsvæðisins.

Kostnaður

• Afgreiðslugjald er 7.000 krónur

• Ógreidd umsókn verður endursend umsækjanda.

• Afgreiðslugjald er ekki endurgreitt þótt umsækjandi hætti við umsókn.

Eftir að umsóknir um ferðaskírteini fyrir flóttafólk hafa verið mótteknar og skráðar hjá Útlendingastofnun eru þær teknar til vinnslu í þeirri röð sem þær berast.

Stærstur hluti umsókna er afgreiddur innan tveggja mánaða. Það tekur þó lengri tíma að afgreiða umsóknir sem þarfnast frekari vinnslu, til dæmis ef auðkenni er óstaðfest, gögn eru metin ófullnægjandi eða gögn vantar. Í slíkum tilfellum hefur stofnunin samband við umsækjanda eða umboðsmann hans.

Það er mikilvægt að sýna þolinmæði á meðan beðið er eftir svari. Ekki fást upplýsingar varðandi umsóknina í síma, tölvupósti eða netspjalli á meðan umsóknin bíður þess að verða tekin til vinnslu.

Þegar umsóknin hefur verið afgreidd hefur Útlendingastofnun samband og lætur þig vita hvaða skref þú þarft að taka næst. Vinsamlegast athugaðu að ekki er ráðlagt að bóka flugmiða án þess að hafa gilt ferðaskírteini undir höndum.

Þegar umsókn um ferðaskírteini fyrir flóttafólk hefur verið samþykkt þarftu að mæta í myndatöku, annað hvort til Útlendingastofnunar, þar er nauðsynlegt að panta tíma, eða til sýslumanna utan höfuðborgarsvæðisins. Börn geta aðeins mætt í myndatöku fyrir ferðaskírteini í fylgd forsjáraðila. 

Athugaðu að ekki er hægt að taka mynd áður en umsókn er samþykkt. 

Afhending ferðaskírteinis

Eftir að þú hefur mætt í myndatöku færðu tölvupóst um að beiðni um framleiðslu ferðaskírteinis hafi verið móttekin hjá Þjóðskrá Íslands. 

Þegar ferðaskírteinið hefur verið framleitt færðu annan tölvupóst með upplýsingum um afhendingarstað og áætlaðan afhendingartíma. Almennt eru ferðaskírteini afhent um viku eftir að beiðni um framleiðslu berst til Þjóðskrár. 

Ef umsókn um ferðaskírteini fyrir flóttafólk er synjað hefurðu 15 daga til að kæra ákvörðunina til kærunefndar útlendingamála.

Heimilt er að synja útgáfu ferðaskírteinis þegar:

• Umsækjandi uppfyllir ekki skilyrði fyrir útgáfu ferðaskírteinis.

• Ekki er staðfest hver umsækjandi er eða vafi leikur á um hver hann er.

• Umsækjandi er eftirlýstur af lögreglu, gefin hefur verið út handtökuskipun á hendur honum eða lagt á hann farbann. Fram er komin kæra á hendur umsækjanda fyrir refsivert brot sem ætla má að varði fangelsisrefsingu.

• Umsækjandi hefur hlotið endanlegan dóm fyrir mjög alvarlegt afbrot og er talinn hættulegur samfélaginu.

• Ástæður sem varða öryggi ríkisins eða stefnu stjórnvalda í utanríkismálum mæla gegn því.