Dvalarleyfi fyrir foreldri barna yngri en 18 ára

Skilyrði

Allir umsækjendur um dvalarleyfi þurfa

að geta sannað á sér deili með gildu vegabréfi
að gefa réttar upplýsingar um tilgang dvalarinnar á Íslandi
að uppfylla eftirfarandi grunnskilyrði

Umsækjandi verður að sýna fram á að framfærsla hans sé trygg þann tíma sem hann sækir um að dveljast hér á landi. Trygg framfærsla þýðir að hafa næg fjárráð til að geta séð fyrir sér sjálfur.

Útlendingastofnun er heimilt að afla skattframtala og gagna frá skattayfirvöldum til staðfestingar á tryggri framfærslu.

Upphæð

Útlendingastofnun miðar við að mánaðarleg fjárráð umsækjenda séu að lágmarki:

239.895 krónur fyrir einstaklinga.
383.832 krónur fyrir hjón.
119.948 krónur til viðbótar vegna fjölskyldumeðlims 18 og eldri.

Viðmiðin samsvara grunnfjárhæð fjárhagsaðstoðar Reykjavíkurborgar, sjá reglur um fjárhagsaðstoð. Upphæðir miðast við tekjur fyrir skatt.

Tímabil

Framfærsla útlendings þarf að vera trygg á gildistíma dvalarleyfis. Það þýðir að verði dvalarleyfi gefið út til eins árs þarf að sýna fram á trygga framfærslu fyrir eitt ár.

Undanþágur frá skilyrðinu um sjálfstæða framfærslu

Allir umsækjendur um dvalarleyfi þurfa að sýna fram á sjálfstæða framfærslu, nema í eftirfarandi undantekningartilvikum:

Fyrir barn, yngra en 18 ára, sem er á framfæri foreldris eða forsjáraðila sem búsettur er hérlendis, þarf ekki að sýna fram á sjálfstæða framfærslu.
Fyrir einstakling eldri en 18 ára,
- sem hefur haft samfellt dvalarleyfi hér á landi frá því hann var barn,
- stundar nám eða störf hér á landi,
- býr hjá foreldri og
- er hvorki í hjúskap né sambúð
er framfærsluviðmið 50% af lágmarksframfærslu einstaklings, það er 119.948 krónur á mánuði. Til viðbótar við þá framfærslu sem foreldri eða forsjáraðili þarf að sýna fram á fyrir sjálfan sig og aðra fjölskyldumeðlimi.
- Umsækjandi þarf að sýna fram á sjálfstæða framfærslu ef hann stundar vinnu og er ekki í námi. Umsækjanda sem er í námi er heimilt að vera á framfæri foreldris.
Hjúskaparmaki þarf ekki að sýna fram á sjálfstæða framfærslu. Vegna framfærsluskyldu á milli hjóna samkvæmt hjúskaparlögum er nægjanlegt að annar aðili í hjúskap sýni fram á næga framfærslu fyrir báða.
- Athugið að sambúð er ekki jafngild hjúskap að þessu leyti. Ekki er framfærsluskylda á milli sambúðarfólks og þarf umsækjandi því að sýna fram á sjálfstæða framfærslu sé hann í sambúð.
Foreldri 67 ára eða eldra sem er á framfæri barns eða barna sinna hér á landi þarf ekki að sýna fram á fulla sjálfstæða framfærslu. Fyrir það er framfærsluviðmið 50% af lágmarksframfærslu einstaklings, það er 119.948 krónur á mánuði, til viðbótar við framfærslu annara fullorðinna einstaklinga á heimilinu.
Vistfjölskylda þarf að sýna fram á framfærslu fyrir au pair. Viðbótarframfærsla miðast við 50% af lágmarksframfærslu einstaklings, það er 119.948 krónur auk launakostnaðar au-pair að upphæð 60.000 kr. fyrir hverjar fjórar vikur í starfi.

Hvað telst ekki trygg framfærsla

Greiðslur í formi félagslegrar aðstoðar ríkis eða sveitarfélags (aðrar en húsnæðisbætur). Hafi umsækjandi þegið slíkan styrk og getur ekki sýnt fram á fullnægjandi framfærslu með öðrum hætti, verður dvalarleyfi synjað.
Meðlagsgreiðslur og barnalífeyrir þar sem þeim er ætlað að standa undir framfærslu barns.
Framfærsla þriðja aðila, í öðrum tilvikum en fram kemur framar í þessari umfjöllun
Eignir aðrar en bankainnstæður (til dæmis fasteignir) og arður af fyrirtækjum, vextir eða aðrar greiðslur sem ekki er tryggt hvort eða hvenær eru lausar til útborgunar
Reiðufé telst ekki fullnægjandi staðfesting á framfærslu.

Þegar sótt er um dvalarleyfi mega ekki liggja fyrir atvik sem valdið geta því að umsækjanda verði meinuð landganga eða dvöl hér á landi.

Þetta þýðir að þú mátt ekki

hafa á síðustu fimm árum afplánað refsingu erlendis eða verið dæmdur þar til refsingar fyrir háttsemi sem að íslenskum lögum getur varðað fangelsi lengur en þrjá mánuði
hafa verið dæmdur hér á landi til refsingar eða til að sæta öryggisráðstöfunum fyrir háttsemi sem getur varðað fangelsi lengur en þrjá mánuði eða oftar en einu sinni verið dæmdur til fangelsisrefsingar á síðustu þremur árum

Skilyrði sem þarf að uppfylla þegar dvalarleyfið er nauðsynlegt til að viðhalda umgengni foreldris við barn

Útgáfa dvalarleyfis til foreldrisins þarf að vera nauðsynleg til að viðhalda umgengni þess við barnið.

Barnið er íslenskur ríkisborgari eða erlendur ríkisborgari með dvalarleyfi hér á landi og búsett hér á landi.
Þú ferð með forsjá barnsins, annað hvort ein/einn eða sameiginlega með hinu foreldrinu.
Þú ert í lögmætri dvöl hér á landi þegar umsókn er lögð fram.
- Ef þú ert í ólögmætri dvöl verður dvalarleyfinu synjað.
Þú hefur haft dvalarleyfi hér á landi sem ekki er hægt að endurnýja á sama grundvelli.
- Þetta getur átt við ef þú hefur verið með dvalarleyfi á grundvelli hjúskapar eða sambúðar og ert skilin/skilinn eða sambúð hefur verið slitið.
Þú hefur umgengnisrétt við barnið samkvæmt staðfestum samningi og fyrir liggur að umgengni á sér stað samkvæmt samningnum.
- Ef staðfestur samningur um umgengni liggur ekki fyrir verður dvalarleyfi ekki veitt. Það sama á við ef ljóst er að umgengni fer ekki fram samkvæmt samningi. Í einhverjum tilvikum getur reynst erfitt að afla staðfestingar á að umgengi fari fram samkvæmt samningi, til dæmis ef samkomulag við hitt foreldrið er ekki gott. Í þeim tilvikum er umsækjanda bent á að hafa samband við Útlendingastofnun til að fá frekari leiðbeiningar um þetta skilyrði.
- Ef umgengni við barn er sannarlega mjög lítil getur verið að dvalarleyfi sé ekki nauðsynlegt til að viðhalda umgengni, til dæmis ef umgengni fer einungis fram nokkrum sinnum á ári. Væri þá hægt að sinna umgengni með heimsóknum á grundvelli vegabréfsáritunar eða áritunarfrelsis.

Skilyrði sem þarf að uppfylla þegar dvalarleyfið er nauðsynlegt til að íslenskt barn geti búið áfram á Íslandi

Dvalarleyfið á fyrst og fremst við í þeim tilvikum þegar erlent foreldri íslenks barns er ekki búsett hér á landi og hefur jafnvel aldrei verið.

Barnið er íslenskur ríkisborgari og búsett hér á landi.
- Dvalarleyfinu er ætlað að tryggja að íslenskt barn þurfi ekki að flytja erlendis þrátt fyrir að íslenskt foreldri þess geti ekki sinnt því, annað hvort tímabundið eða varanlega. Dæmi um slíkt getur verið þegar íslenska foreldrið er alvarlega veikt eða látið.
- Sé barnið erlendur ríkisborgari verður umsókn synjað.
Þú ferð með forsjá barnsins, annað hvort ein/einn eða sameiginlega með hinu foreldrinu.
- Dvalarleyfið á ekki við þegar dvöl þín er ekki nauðsynleg hérlendis til að barn geti áfram verið búsett á Íslandi. Ef barn er í forsjá íslenska foreldrisins og býr hjá því við eðlilegar aðstæður getur þetta dvalarleyfi ekki komið til skoðunar.
Þú ætlar að búa með barninu hér á landi.
- Það þýðir að þú og barnið þurfið að hafa sama lögheimili eða aðsetur og sannarlega búa saman.
Þú ert ekki í hjúskap eða sambúð með hinu foreldri barnsins.
- Ef svo væri ætti að sækja um dvalarleyfi á grundvelli hjúskapar eða sambúðar.

Dvalarleyfi fyrir foreldri barna yngri en 18 ára

Þjónustuaðili

Útlendingastofnun