Samkvæmt 14. gr. jafnréttislaga er forstöðumönnum stofnana, skylt að gera sérstakar ráðstafanir til að koma í veg fyrir að starfsfólk, nemar og notendur þjónustu verði fyrir kynbundnu ofbeldi, kynbundinni áreitni eða kynferðislegri áreitni á vinnustað eða á stofnun.

Forstöðumenn skulu gera starfsfólki ljóst með skýrum hætti að slík hegðun er óheimil.

Ef yfirmaður er kærður vegna ætlaðs kynbundins ofbeldis, ætlaðrar kynbundinnar áreitni eða ætlaðrar kynferðislegrar áreitni verður viðkomandi vanhæfur til að taka ákvarðanir í tengslum við starfsskilyrði kæranda á meðan meðferð málsins stendur yfir og skal þá næsti yfirmaður taka slíkar ákvarðanir.

Forstöðumanni eru lagðar ýmsar skyldur til að tryggja starfsfólki gott starfsumhverfi:

• Í 4. gr. vinnuverndarlaganna kemur fram að það er á ábyrgð forstöðumanns að tryggja starfsfólki sínum gott starfsumhverfi.

• Í reglugerð um aðgerðir gegn einelti, kynferðislegri áreitni, kynbundinni áreitni og ofbeldi vinnustöðum eru tíundaðar skyldur forstöðumanns í þeim efnum.

• Að auki ber forstöðumaður ábyrgð á að til sé skrifleg áætlun um öryggi og heilbrigði á vinnustað eins og fram kemur í XI. kafla vinnuverndarlaganna og reglugerð um skipulag og framkvæmd vinnuverndarstarfs á vinnustöðum.

Samkvæmt reglugerð um aðgerðir gegn einelti, kynferðislegri áreitni, kynbundinni áreitni og ofbeldi vinnustöðum skal forstöðumaður „bregðast við eins fljótt og kostur er þegar honum berst kvörtun eða ábending um einelti, kynferðislega áreitni, kynbundna áreitni eða ofbeldi á vinnustað sem og verði hann var við slíka hegðun eða aðstæður á vinnustaðnum sem líkur eru á að leitt geti til slíkrar hegðunar verði ekki gripið til aðgerða".