Örorkulífeyrir til 31. ágúst 2025

Fjárhæðir og frítekjumörk

Athugið að upplýsingar á þessari síðu eru um örorku- og endurhæfingarlífeyriskerfið sem var í gildi til 31. ágúst 2025. Umsækjendur frá 1. september 2025 eru metnir samkvæmt nýja kerfinu á meðan þau sem áttu mat í gildi í gamla kerfinu til að minnsta kosti 31. ágúst 2025 færðust sjálfkrafa yfir í nýja kerfið.

Hér fyrir neðan má nálgast upplýsingar um nýja kerfið:

Örorkulífeyrir frá 1. september 2025

Hlutaörorka og virknistyrkur frá 1. september 2025

Samþætt sérfræðimat frá 1. september 2025

Sjúkra- og endurhæfingargreiðslur frá 1. september 2025

Örorkulífeyrir er tekjutengdur, sem þýðir að aðrar tekjur hafa áhrif til lækkunar.

Fullur örorkulífeyrir er:

421.380 krónur á mánuði fyrir skatt með heimilisuppbót,
335.128 krónur á mánuði fyrir skatt án heimilisuppbótar.

Í reiknivélinni getur þú sett inn þínar forsendur og séð áætlaðar upphæðir.

Sundurliðun upphæða

Ef tekjur frá öðrum en TR, lífeyrissjóður, laun og fjármagnstekjur, eru undir frítekjumörkum færð þú:

grunnlífeyri 65.730 krónur á mánuði,
tekjutryggingu 210.485 krónur á mánuði,
aldursviðbót, sem fer eftir aldri fyrsta mats á örorku eða endurhæfingu.

Aldur við fyrsta mat	Fjárhæð
18 til 24 ára	65.730 krónur
25 ára	62.244 krónur
26 ára	59.157 krónur
27 ára	55.871 króna
28 til 29 ára	49.298 krónur
30 til 31 árs	42.725 krónur
32 til 33 ára	36.152 krónur
34 til 35 ára	29.579 krónur
36 til 37 ára	23.006 krónur
38 til 39 ára	16.433 krónur
40 til 45 ára	9.860 krónur
46 til 50 ára	6.573 krónur
51 til 55 ára	4.930 krónur
56 til 60 ára	3.287 krónur
60 til 66 ára	1.643 krónur

Framfærsluuppbót fylgir oft greiðslum örorku- og endurhæfingarlífeyris. Framfærsluuppbót er ekki föst upphæð heldur fer eftir framfærsluviðmiðum. Sérstakt frítekjumark er fyrir framfærsluuppbót.

Frítekjumörk eru mismunandi eftir tegund tekna.

Atvinnutekjur mega fara upp í 200.000 krónur á mánuði eða 2.400.000 krónur á ári fyrir skatt án þess að lækka greiðslur örorku- og endurhæfingarlífeyris.

Lífeyrissjóðstekjur mega fara í 27.400 krónur á mánuði eða 328.800 krónur á ári fyrir skatt án þess að lækka greiðslur örorku- og endurhæfingarlífeyris.

Fjármagnstekjur mega mest vera 98.640 krónur á ári fyrir skatt án þess að lækka greiðslur örorku- og endurhæfingarlífeyris. Fjármagnstekjur eru sameign hjóna og sambýlisfólks.

Ein undantekning er þó á þessu en sumir lífeyrisþegar, sem eru með engar eða lágar tekjur frá öðrum, fá framfærsluuppbót. Þessi framfærsluuppbót fellur ekki undir venjulegu frítekjumörkin heldur er með sitt eigið frítekjumark, framfærsluuppbótin lækkar um 65 aura á móti hverri krónu skattskyldra tekna sem koma inn hvort sem það eru launa-, lífeyrissjóðs- eða fjármagnstekjur.

Nánari útskýringar á tekjutegundum ásamt leiðbeiningum við að fylla út tekjuáætlun má sjá hér.