Samþætt sérfræðimat

Samþætt sérfræðimat er forsenda þess að fá greiddan örorkulífeyri eða hlutaörorkulífeyri.

Allir umsækjendur á aldrinum 18 til 67 ára um örorku- eða hlutaörorkulifeyri fara í samþætt sérfræðimat. Það er staðlað mat á getu einstaklings til virkni á vinnumarkaði þar sem færni, fötlun og heilsa er metin heildstætt í víðum skilningi. Matið byggir á ICF, alþjóðlegu kerfi Alþjóða heilbrigðisstofnunarinnar.

Til að fara í samþætt sérfræðimat þarf endurhæfing að vera fullreynd eða ekki möguleg.

Hvernig fer samþætt sérfræðimat fram?

Þegar umsóknin og öll nauðsynleg gögn hafa borist fer málið til matsteymis sem fer yfir upplýsingarnar og metur hvort þær séu nægjanlegar til að ljúka matinu.

Ef fyrirliggjandi gögn eru ekki fullnægjandi, skortir skýringar eða þörf er á nánari upplýsingum, ertu boðuð / boðaður í viðtal hjá sérfræðingi TR. Í slíku viðtali er unnið að því að fá skýra og heildstæða mynd af heilsu, færni og aðstæðum áður en tekin er ákvörðun um rétt til örorku. Viðtalið fer fram í húsnæði Tryggingastofnunar í Hlíðasmára 11 í Kópavogi.

Vakin er athygli á að:

• Framvísa þarf persónuskilríkjum við komu.

• Komi til ferðakostnaðar innanlands endurgreiðist hann samkvæmt reglum Sjúkratrygginga Íslands. Upplýsingar er að finna á www.sjukra.is og hjá sýslumönnum um land allt.

Hver getur framkvæmt færnimat?

Heilbrigðismenntað fagfólk sem hefur sinnt umsækjanda getur framkvæmt færnimat. Það getur verið læknir, félagsráðgjafi, sjúkraþjálfari, iðjuþjálfi, sálfræðingur, þroskaþjálfi og svo framvegis. Æskilegast er að færnimatið sé útfyllt af þeim fagaðila sem þekkir umsækjandann hvað mest.

Ekki er hægt að óska sérstaklega eftir því að fagaðilar hjá TR framkvæmi færnimatið þar sem gert er ráð fyrir að það komi frá utanaðkomandi aðilum sem þekkja umsækjandann í meðferð eða þjónustu.

Mögulegar niðurstöður

• 0 til 25% geta til virkni á vinnumarkaði - réttur til örorkulífeyris.

• 26 til 50% geta til virkni á vinnumarkaði - réttur til hlutaörorkulífeyris.

• Endurhæfing ekki fullreynd - Mögulega réttur til sjúkra- og endurhæfingargreiðslna.

• Meira en 50% geta til virkni á vinnumarkaði - hvorki réttur til hlutaörorkulífeyris né örorkulífeyris.