Sjúkrahúsið á Akureyri
Innlögn á sjúkrahús
Þegar einstaklingur leggst inn á sjúkrahús er það eftir aðstæðum hvers og eins. Hægt er að leggjast inn á:
Göngudeild: einstaklingur á bókaðan tíma, en dvelur ekki yfir nótt.
Dagdeild: einstaklingur fær sjúkrarúm fyrir rannsóknir eða skurðaðgerðir en dvelur ekki yfir nótt. Þetta getur falið í sér meðferðir eins og minniháttar skurðaðgerðir, skilun eða lyfjameðferð.
Legudeild: dvalið er á sjúkrahúsi í 1 nótt eða lengur vegna rannsókna, læknismeðferðar eða skurðaðgerðar.
Frá innlögn að útskrift
Við innlögn á Sjúkrahúsið á Akureyri biðjum við sjúklinga að hafa með sér:
lyf sem viðkomandi notar, lyfjakort eða yfirlit yfir lyf úr lyfjaskömmtun
snyrtivörur: tannbursta, tannkrem, greiðu og rakvél
góða inniskó sem styðja vel við fætur
náttslopp. Þó er hægt að fá lánaðan slopp á sjúkrahúsinu
hjálpartæki eins og heyrnartæki eða gleraugu
hjálpartæki eins og staf, göngugrind eða hjólastól
peninga eða greiðslukort til dæmis fyrir símakorti eða til að nota í sjálfsala
léttan fatnað sem þægilegt er að klæðast
Það er gott að hafa með sér mat eða drykki til að borða á milli mála.
Sjúklingar geta haft með sér eigin farsíma og fartölvur.
Ekki er tekin ábyrgð á persónulegum munum sjúklinga sem geymdir eru á sjúkrastofum. Við viljum benda þér á að fá verðmæti geymd í læstum skáp á vaktherbergi.
Vinsamlegast skiljið verðmæti eins og peninga og skartgripi eftir heima eins og unnt er.
Lyflækninga-, skurðlækninga- og geðdeild frá kl. 16-17 og 19-20
Barnadeild: Aðrir en foreldrar og forráðamenn frá kl. 14-20
Gjörgæsludeild eftir samkomulagi
Kristnesspítali frá kl. 16-18
Fæðingadeild: Heimsóknir ekki leyfðar nema í undantekningartilfellum.
Tveir gestir eru leyfðir í hverjum heimsóknartíma nema í undantekningartilfellum og í samráði við starfsfólk deilda.
Gestir með einkenni öndunarfærasýkinga mega ekki koma í heimsókn.
Það er mikilvægt fyrir sjúklinga að nærast vel. Líkaminn þarf orku til að jafna sig starfsfólk eldhússins á SAk gerir sitt besta til að svo megi verða. Flestir sjúklingar ættu að geta fengið mat við sitt hæfi.
Við gerð matseðla er hugað að samspili næringar, bragðs, útlits, gæða og kostnaðar.
Allir matseðlar eru næringaútreiknaðir.
Ekki eru notuð nein matvæli í eldhúsinu nema fyrir liggi innihald og næringagildi þeirra.
Við gerð matseðla er tekið tillit til hátíðisdaga.
Passa þarf að rétt fæðisgerð sé valin fyrir sjúklinga með tilliti til sérþarfa t.d vegna sjúkdóms, ofnæmis og þess háttar og ákvarða þarf skammtastærð út frá orkuþörf og getu einstaklingsins til að borða. Staðlaðar skammtastærðir eru 1500 kkal/dag, (lítill skammtur) 2000 kkal (meðalstór skammtur) og 2700 kkal (stór skammtur)
Á sjúkrahúsinu eru 5 máltíðir á dag og er skammtað í eldhúsi fyrir morgunverð, hádegisverð og kvöldverð, skv. valinni skammtastærð og einstaklingsbundnu vali.
Hægt er að velja breytta áferð á allar fæðisgerðir.
Tvær aðalfæðisgerðir eru í boði: Sjúkrahúsfæði og heilsufæði.
Sjúkrahúsfæði
Ætlað þeim sjúklingum sjúkrahússins, sem eru í hættu á vannæringu, lystarlausir, eiga í erfiðleikum með að nærast og þurfa af einhverjum ástæðum orku- og próteinríkara fæði en almennar ráðleggingar fyrir fríska segja til um. Fæðið hentar flestum sjúklingum á lyf-, skurð- og öldrunarlækningadeildum.
Heilsufæði
Ætlað þeim sjúklingum sjúkrahússins frá 1 árs aldri, sem ekki hafa sérstakar þarfir varðandi samsetningu fæðisins, vegna sjúkdóma eða annarra ástæðna, eru í lítilli hættu á vannæringu, hafa góða matarlyst og getu til að borða. Fæðið hentar flestum sjúklingum á geðdeild, fæðingadeild og í endurhæfingu.
Ekki er afgreitt sérstakt fæði fyrir sykursjúka, en samsetning Sjúkrahússfæðis og Heilsufæðis hentar sykursjúkum með einstaklingsbundnu vali. Kolvetnamagni er haldið innan ákveðinna marka í öllum máltíðum, en breytilegt eftir vali hvers og eins.
Ósætt kaffibrauð og ósætir eftirréttir eru í boði fyrir þá sem það þurfa eða vilja.
Á Sjúkrahúsinu á Akureyri er leitast við að búa öllum sjúklingum og aðstandendum eins góða aðstöðu og unnt er hverju sinni.
Útvarp, sjónvarp og tölvur
Útvarp er við hvert rúm og sjónvörp eru ýmist við hvert rúm eða sameiginleg á hverri sjúkrastofu. Þá eru sjónvörp í dagstofu hverrar deildar. Einnig er hægt að hafa með sér tölvur ef fólk vill. Á flestum deildum er aðgengi að nettengdri tölvu fyrir sjúklinga og hægt er að tengjast þráðlausu neti.
Túlkaþjónusta
Ef þú þarft á túlkaþjónustu að halda skalt þú ræða við þinn hjúkrunarfræðing eða lækni.
Félagsráðgjöf
Félagsráðgjafi er starfandi alla virka daga á öllum deildum sjúkrahússins. Hægt er að óska eftir þjónustu félagsráðgjafa beint eða í gegnum vakthafandi hjúkrunarfræðinga og lækna. Markmið félagsráðgjafaþjónustu sjúkrahússins er að veita sjúklingum og fjölskyldum þeirra stuðning í persónulegum málum, þannig að þeim verði auðveldara að fást við daglegt líf, oft út frá breyttum forsendum, til dæmis varðandi
félagsleg réttindi og þjónustu, almannatryggingar og fjárhag
tilfinningalega líðan og upplifanir af breytingum sem sjúkdómar og áföll hafa í för með sér
Boðið er uppá einkaviðtöl sem og viðtöl við aðstandendur sjúklings, hjóna- og fjölskylduviðtöl.
Sjúkratryggðir einstaklingar geta átt rétt á gistiþjónustu, í þeim tilvikum að þeir þurfi að dvelja fjarri heimili sínu vegna rannsókna eða sjúkdómsmeðferða. Gistiþjónusta felur í sér gistingu með fullu fæði og Sjúkratryggingar Íslands greiða allt að 21 dag vegna gistiþjónustu. Ef dvöl er lengur en 21 dag þarf að sækja um undanþágu.
Gististaðir bjóða ekki upp á hjúkrunarþjónustu.
Reglugerð um dvöl á sjúkrahóteli: Reglugerð um dvöl á sjúkrahóteli 429/2019
Hverjir eiga rétt á þjónustunni?
Allir sjúkratryggðir einstaklingar sem þurfa að dvelja fjarri heimili sínu til að sækja heilbrigðisþjónustu í Reykjavík eða á Akureyri.
Í tengslum við sjúkrahúslegu
Vegna þjónustu á dag- og göngudeildum sjúkrahúsa
Vegna þjónustu sem sótt er á starfsstofur heilbrigðisstarfsmanna (svo sem vegna augasteinsaðgerða og annarra meðferða/rannsókna sem ekki eru aðgengilegar í heimabyggð)
Verðandi mæður sem þurfa að dvelja tímabundið í nálægð við sjúkrahús
Hvernig sæki ég um gistiþjónustu?
Hægt er að bóka gistingu hjá samningsaðilum í þann tíma sem beiðnin segir til um, þó háð því að það sé laust pláss á gististað
Læknir/hjúkrunarfræðingur/ljósmóðir þarf að gera beiðni/tilvísun um gistingu, eftir bókun
Gististaður hefur heimild til að óska eftir greiðslukortanúmeri til að tryggja greiðslu ef ekki er látið vita innan tilskilins frests ef hætt er við dvöl
Beiðnina má annað hvort afhenda við innritun á gististað eða senda rafrænt af beiðanda
Hvar get ég bókað gistingu, hverjir eru samningsaðilar?
Hótel Akureyri
Hótel Akureyri er 17 herbergja vel búið hótel þar sem rík áhersla er lögð á persónulega þjónustu. Herbergin eru með sér baðherbergi, sjónvarpi og þráðlausri nettengingu.
Hótel Akureyri, Hafnarstræti 67
Sími 462 5600
Hvað greiði ég fyrir þjónustuna?
Greiðsluhluti einstaklings fer nú samkvæmt reglugerð nr. 429/2019.
Sjúkratryggðir sem dvelja á sjúkrahóteli greiða gjald sem hér segir:
18 ára og eldri greiða 1.956 kr. á dag.
Fylgdarmenn sjúkratryggðra greiða gjald sem hér segir:
Fylgdarmaður greiðir 1.956 kr. á dag fyrir gistingu, gisti hann í sama herbergi og sjúkratryggður. Kaupi fylgdarmaður fæði á sjúkrahótelinu þá greiðir hann fyrir það samkvæmt gjaldskrá sjúkrahótels
Gisti fylgdarmaður/-menn í öðru herbergi en sjúkratryggður eða er auka nótt/nætur ein/n, skal greiða 9.509 kr. fyrir herbergið á dag. Kaupi fylgdarmaður/-menn fæði á sjúkrahótelinu er greitt fyrir það samkvæmt gjaldskrá sjúkrahótels.
Ef ég er ekki sjálfbjarga með athafnir daglegs lífs?
Gististaðir bjóða ekki upp á hjúkrunarþjónustu og verða dvalargestir sem dvelja á gististað að vera sjálfbjarga með að komast fram úr rúmi og eiga sjálfir að geta séð um allar athafnir daglegs lífs. Ef einstaklingar eru hreyfihamlaðir eða bundnir hjólastól, þá er gott að kynna sér fyrirfram aðstöðu hvers gististaðar vegna aðgengis fyrir fatlaða og aðstöðu fyrir fylgdarmann/aðstandanda.
Get ég haft fylgdarmann/aðstandanda með mér?
Já (sjá ofar).