Tilkynna skal yfirmanni án tafar með sannanlegum hætti um veikindi ef um veikindi eða slys í orlofi er að ræða og þau síðan staðfest með læknisvottorði.

Geti starfsfólk ekki tekið orlof vegna veikinda á það rétt á að taka orlofið síðar og þá eftir atvikum utan sumarorlofstímabils. Ef ekki er hægt að nýta orlofsdaga vegna veikinda er heimilt að flytja þá til næsta orlofsárs, sjá umfjöllun um flutning orlofs á milli orlofsára.

Fæðingarorlof lengist ekki þó að starfsfólk veikist á meðan töku þess stendur. Þó er heimilt að framlengja fæðingarorlof móður um tvo mánuði vegna alvarlegra veikinda hennar í tengslum við fæðingu. Í slíkum tilvikum þarf að liggja fyrir læknisvottorð og starfsmaður þarf að bera ósk um lengingu undir tryggingayfirlækni.