Launagreiðslur í veikindum eru misjafnar eftir því hvort um er að ræða fyrstu viku veikinda eða samfelld veikindi eftir fyrstu viku veikinda:

• Í fyrstu viku veikinda eru greidd mánaðarlaun ásamt föstum greiðslum. Þá er greitt fyrir vinnuframlag eða vinnutíma sem er fyrir fram ákveðinn samkvæmt reglubundnum vöktum eða reglubundinni vinnu og sem staðið hefur í tólf mánuði eða lengur eða er ætlað að standa að minnsta kosti svo lengi

• Eftir fyrstu viku veikinda er greitt meðaltal yfirvinnu síðustu 12 mánaða oft kölluð tilfallandi yfirvinna. Yfirvinna sem er ekki föst telst tilfallandi. Greiðslur tilfallandi yfirvinnu koma til viðbótar en ekki í stað greiðslna á fastri yfirvinnu. Hafi starfsfólk verið fjarverandi vegna orlofs á viðmiðunartímabili tilfallandi yfirvinnu skal reikna með sama meðaltali yfirvinnu orlofsdagana og hinn hluta tímabilsins.

Starfsfólk fær greidd laun í veikindum í samræmi við það starfshlutfall sem það var í þegar það veiktist.

Dæmi: Starfsmaður gæti hafa verið í 100% starfi í einhver ár og verið kominn í 50% starf þegar hann veikist. Hann fær greidd 50% laun þann tíma sem hann á rétt á greiðslu launa í veikindum. Hið sama á við ef starfsmaður í 50% starfi er nýlega kominn í 100% starf þegar hann veikist. Hann fær greidd 100% laun þann tíma sem hann á rétt á greiðslu launa í veikindum.

Veikindaréttur er talinn í almanaksdögum en ekki vinnudögum. Réttur til launaðra veikinda tímavinnufólks og starfsfólk með tveggja mánaða ráðningu eða styttri er sem hér segir:

Starfstími - Fjöldi daga

• Á 1. mánuði í starfi - 2 dagar

• Á 2. mánuði í starfi - 4 dagar

• Á 3. mánuði í starfi - 6 dagar

• Eftir 3 mánuði í starfi - 14 dagar

• Eftir 6 mánuði í starfi - 30 dagar

Ef óvinnufærni stafar af vinnuslysi eða atvinnusjúkdómi bætast 13 vikur eða 91 dagur við veikindaréttinn.

Dæmi: Starfsmaður er ráðinn í tímavinnu með vinnuskyldu á laugardögum. Hann er veikur tvo laugardaga í röð og þá teljast veikindadagar vera átta talsins.

Greiða ber starfsmanni laun frá upphafi fjarvista þegar um vinnuslys eða slys á beinni leið til og frá vinnu er að ræða. Sjá nánar í 12. kafla kjarasamninga.

Ef starfsmaður er óvinnufær vegna vinnuslyss eða slyss á beinni leið til og frá vinnu í minnst 10 daga, greiða Sjúkratryggingar Íslands slysadagpeninga frá og með 8. degi eftir að slysið varð.

Stofnun á rétt þessum greiðslum fyrir þann tíma sem viðkomandi er á launum en eftir það renna þær til starfsmanns.

Sjá nánar lög um um slysatryggingar almannatrygginga nr. 45/2015 og upplýsingar um slysatryggingar á vefsíðunni sjukra.is. Tilkynning um vinnuslysið þarf að hafa borist Sjúkratryggingum Íslands til þess að slysadagpeningar verði greiddir.

Auk slysadagpeninga kann að stofnast réttur til annarra bóta slysatrygginga frá Sjúkratryggingum, svo sem örorku- og dánarbóta. Frekari upplýsingar eru vefsíðu sjukra.is.