Tilkynna þarf um töku foreldraorlofs til Vinnumálastofnunar eins fljótt og kostur er og í síðasta lagi sex vikum fyrir fyrirhugaðan upphafsdag þess. Tilkynningin á að vera skrifleg og innihalda fyrirhugaðan upphafsdag, lengd og tilhögun foreldraorlofs. Vinnuveitandi á að árita tilkynninguna með móttökudagsetningu og afhenda starfsmanni og Vinnumálastofnun afrit. Sjá nánar 46. gr. laga um fæðingar- og foreldraorlof.

Geti launagreiðandi ekki orðið við óskum um tilhögun foreldraorlofs skal hann, eftir samráð við starfsmann, tilkynna aðra tilhögun innan viku frá móttöku erindis um foreldraorlof. Skal það gert skriflega og skulu koma fram ástæður breyttrar tilhögunar. Ef um frestun og er að ræða skal skilgreina hversu lengi frestunin varir.

Eingöngu má fresta foreldraorlofi þegar sérstakar aðstæður í rekstri stofnunar gera slíkt nauðsynlegt og eru gildar ástæður taldar upp í 47. gr. laga um fæðingar- og foreldraorlof:

• Ekki er heimilt að fresta töku foreldraorlofs lengur en í sex mánuði nema með samþykki starfsmanns.

• Aldrei er heimilt að fresta foreldraorlofi sem tekið er í beinu framhaldi af fæðingarorlofi eða ef barn veikist og nærvera foreldra er nauðsynleg.

• Óheimilt að fresta töku foreldraorlofs ef vinnuveitandi hefur ekki svarað upphaflegri beiðni innan viku.

Í foreldraorlofi haldast áunnin réttindi óbreytt, þ.e. þau eru fryst á sama hátt og í launalausu leyfi. Þó ber að reikna foreldraorlof til starfstíma við mat á rétti til orlofstöku en ekki orlofslauna. Starfsfólk sem hefur tekið foreldraorlof hefur því rétt á ólaunuðum orlofsdögum. Ekki hefur enn verið samið í kjarasamningum um ávinnslu orlofslauna meðan á foreldraorlofi stendur.