Almenna reglan er sú að starfsmaður sem ekki mætir til starfa af völdum ófærðar er launalaus eða vinnur daginn eða vaktina af sér síðar. Hafi almenn ófærð ríkt á viðkomandi svæði og það starfsfólk sem í hlut á, gert sitt ítrasta til að komast til vinnu eða komið strax og til dæmis strætisvagnaleiðir opnuðust, er því beint til stofnana að dagvinnulaun hlutaðeigandi starfsfólks verði ekki skert vegna slíkra fjarvista. Önnur laun en dagvinnulaun falla niður, þannig að hvorki greiðist vaktaálag né yfirvinna ef til dæmis um aukavakt eða yfirvinnu hefur verið að ræða.

Réttur til launa og frítökuréttur skapast ekki þegar starfsmaður kemst ekki frá vinnustað eða teppist á heimleið vegna ófærðar. Sé um vaktavinnu að ræða og næsta vakt starfsmanns er 8 klukkustundum síðar á starfsmaður hvorki hvíldar- né frítökurétt þótt hann dvelji áfram á vinnustað eða komist seint heim vegna ófærðar.

Í þessum tilvikum getur verið um að ræða:

1. Forstöðumaður ákveður að breyta vaktskrá þannig að starfsmaður vinnur tvær vaktir í röð en vakt sem hann hefði átt að vinna síðar er unnin af þeim starfsmanni sem ekki komst á sína vakt. Dæmi: Starfsmaður vinnur kvöldvakt og svo næturvakt í stað dagvaktar en sá sem átti að vinna næturvaktina, vinnur dagvaktina í staðinn. Starfsfólk fær aukagreiðslur samkvæmt ákvæðum um breytingar á vaktskrá með skömmum fyrirvara. Vaktaálag greiðist eins og unnið er en ekki eins og hefði átt að vinna. Frítökuréttur skapast ekki en starfsmaðurinn á rétt á samsvarandi hvíld í staðinn samanber. c.-lið 13. gr. samnings um skipulag vinnutíma frá 23. janúar 1997.

2. Ef ekki er notuð heimild til breytinga á vaktskrá, greiðist fyrir viðbótarvaktina eins og um venjulega aukavakt sé að ræða. Frítökuréttur skapast ekki.

Starfsmaður sem er í orlofi erlendis og kemst ekki til vinnu telst áfram í orlofi. Hann getur þó samið við yfirmann um að fá að taka launalaust leyfi þann tíma sem hann er frá vinnu.

Starfsmaður sem er erlendis á vegum stofnunar og kemst ekki til vinnu heldur launum sínum þann tíma sem hann er frá vinnu. Hann skal fá greidda dagpeninga þennan tíma samkvæmt reglum ferðakostnaðarnefndar. Bætur sem starfsmaður á rétt á frá flugfélögum eða öðrum aðilum vegna þessa koma til frádráttar.

Hafi starfsmaður verið í launalausu leyfi en kemst ekki til vinnu eftir það framlengist launalausa leyfið nema aðilar semji um annað.