Það þarf meðal annars að upplýsa Vinnueftirlitið um:

• Nafn fyrirtækis, heimilisfang í heimaríki, virðisaukaskattsnúmer, nafn fyrirsvarsmanns og netfang fyrirtækisins.

• Nafn notendafyrirtækis og kennitölu þess eða annað sambærilegt auðkenni, ef við á.

• Yfirlit yfir starfsfólk sem mun starfa hér á landi á vegum fyrirtækisins. Þar skulu koma fram upplýsingar um nafn, fæðingardag, heimilisfang í heimaríki, ríkisfang, hvort starfsmaður njóti almannatryggingaverndar í heimaríki, dvalarstað, áætlaðan starfstíma hér á landi og starfsréttindi, eftir því sem við á.

• Gild atvinnuleyfi starfsmanna í heimaríki þegar um er að ræða starfsmenn sem eru ekki ríkisborgarar EES-ríkja, EFTA-ríkja eða Færeyja.

• Tegund þeirrar þjónustu sem veitt er.

Fyrirtækjum ber einnig að afhenda Vinnueftirlitinu:

• Afrit af þjónustusamningi milli fyrirtækis og notendafyrirtækis.

• Afrit af ráðningarsamningum alls starfsfólks sem sent er til Íslands, sem staðfesta að laun þeirra séu í samræmi við gildandi íslensk lög og kjarasamninga.

• Gögn sem sýna fram á raunverulega starfsemi fyrirtækis í heimaríki, svo sem gögn frá skattyfirvöldum eða sambærilegum stjórnvöldum. Eins upplýsingar um starfsleyfi, eftir því sem við á, og upplýsingar um umfang veltu í heimaríki.

• Vinnueftirlitið getur kallað eftir frekari upplýsingum frá fyrirtækinu telji stofnunin þörf á því.

Þjónustufyrirtæki skal enn fremur hafa aðgengilegt afrit af launaseðlum, vinnutímaskýrslum og staðfestingu á greiðslu launa meðan það veitir þjónustu hér á landi og í einn mánuð eftir að starfsemi þess lýkur.

Eigi síðar en sama dag og starfsemi hefst skal þjónustufyrirtæki upplýsa Vinnueftirlitið um hvar stofnunin geti nálgast framangreindar upplýsingar og skal þjónustufyrirtæki bregðast við beiðni Vinnueftirlitsins um afhendingu á þessum gögnum innan tveggja virkra daga frá því að beiðni stofnunarinnar berst.

Ekki þarf að upplýsa um starfsemina ef fyrirtækið starfar á Íslandi í samtals tíu virka daga eða skemur á tólf mánaða tímabili. Þetta á við óháð því hvort dagarnir eru samfelldir eða ekki.

Þetta er líka óháð fjölda starfsfólks sem sent er til starfa á Íslandi

Til dæmis: Ef fyrirtæki veitir þjónustu á Íslandi í 5 daga og kemur aftur til landsins 6 mánuðum síðar til að veita þjónustu í 6 daga til viðbótar, er fyrirtækinu skylt að tilkynna starfsemina til Vinnueftirlitsins.

Fyrirtæki getur verið undanþegið upplýsingaskyldu ef þjónustan:

• Felst í sérhæfðri samsetningu, uppsetningu, eftirliti eða viðgerð tækja og tekur ekki lengri tíma en fjórar vikur á tólf mánaða tímabili.

Uppsetning á innréttingum og húseiningum telst ekki uppsetning tækja samkvæmt undanþágunni. Svo sem á gluggum, lögnum og byggingareiningum.

Ef þú ert ekki viss um hvort þurfi að upplýsa um starfsemina skaltu ávallt hafa samband við Vinnueftirlitið og leita ráða.