Ef fyrirtækið hyggst ekki veita þjónustu á Íslandi og senda starfsmenn hingað til vinnu lengur en samtals 10 virka daga á hverju tólf mánaða tímabili þarf það ekki að tilkynna starfsemi sína til Vinnueftirlitsins.

Dagarnir tíu þurfa ekki að vera samfelldir og hvorki skiptir máli hversu oft fyrirtækið sendir starfsmenn hingað né hversu margir þeir eru.

Ef þjónustan varir engu að síður lengur en 10 virka daga skal fyrirtækið veita Vinnueftirlitinu upplýsingar og/eða aðgang að gögnum eigi síðar en á ellefta virka degi starfseminnar.

Ef þjónusta fyrirtækisins felur í sér sérhæfða samsetningu, uppsetningu, eftirlit eða viðgerð tækja og er ekki ætlað að vara lengur en fjórar vikur á hverju tólf mánaða tímabili er fyrirtækið undanþegið tilkynningarskyldu til Vinnueftirlitsins.

Vikurnar fjórar þurfa ekki að vera samfelldar og hvorki skiptir máli hversu oft fyrirtækið sendir starfsmenn hingað né hversu margir þeir eru.

Ef þjónustan varir engu að síður lengur en fjórar vikur skal fyrirtækið veita Vinnueftirlitinu upplýsingar og/eða aðgang að gögnum eigi síðar en fyrsta virka dag eftir að þjónustan hefur staðið yfir í fjórar vikur á hverju tólf mánaða tímabili.

Athugið að uppsetning innréttinga og húseininga, þar með talið glugga, lagna og byggingareininga, telst ekki til uppsetningar tækja í skilningi undanþágunnar.