1. gr. Gildissvið.

Reglugerð þessi tekur til makrílveiða íslenskra skipa í fiskveiðilandhelgi Íslands, norskri lögsögu, færeyskri lögsögu, á samningssvæði Norðaustur-Atlantshafsfiskveiðinefndarinnar (NEAFC) utan lögsögu ríkja og í lögsögu Svalbarða.

Í lögsögu Svalbarða skal farið að reglum sem norsk stjórnvöld setja um veiðarnar, enda séu þær settar á grundvelli samnings um Svalbarða frá 9. febrúar 1920 og í samræmi við ákvæði hans.

2. gr. Aflamark.

Aðeins skipum sem hafa aflamark í makríl er heimilt að stunda makrílveiðar.

Heimilt er hverju skipi að veiða allt að 5% umfram aflamark í makríl í íslenskri lögsögu og á alþjóðlegu hafsvæði á viðkomandi almanaksári og dregst sá umframafli frá aflamarki þess næsta almanaksárið. Þá er heimilt að flytja allt að 15% aflamarks fiskiskips í makríl frá viðkomandi almanaksári til næsta almanaksárs. Það aflamark má eingöngu veiða innan íslenskrar lögsögu og alþjóðlegs hafsvæðis. Flutningsheimildir samkvæmt þessari grein eiga einnig við um aflaheimildir sem eru dregnar frá leyfilegum heildarafla samkvæmt 3. mgr. 8. gr. laga nr. 116/2006 (5,3%) og samkvæmt 10. gr. b. laga nr. 116/2006.

3. gr. Sérstakar heimildir vegna makrílveiða í efnahagslögsögu Noregs og Færeyja.

Fiskistofa skal, á grundvelli aflamarks fiskiskipa í makríl, úthluta eftirfarandi sérstökum heimildum vegna veiða og ráðstöfunar afla:

1. Heildaraflamarki í makríl, sem tekur til alls aflamarks skips í makríl samkvæmt aflahlutdeild þess, að teknu tilliti til flutnings aflamarks milli skipa.
2. Heimild til veiða á makríl í efnahagslögsögu Noregs sem heimilt er að landa eða ráðstafa án uppboðsskyldu, sbr. 34% þess afla sem skipi er heimilt að veiða í efnahagslögsögu Noregs samkvæmt 3. mgr. 4. gr.
3. Heimild til veiða á makríl í efnahagslögsögu Noregs sem skylt er að bjóða upp í gegnum Norges Sildesalgslag SA, sbr. 66% þess afla sem skipi er heimilt að veiða í efnahagslögsögu Noregs samkvæmt 4. mgr. 4. gr.
4. Heimild til veiða á makríl í efnahagslögsögu Færeyja, samkvæmt 5. gr.

Heimildir samkvæmt 2.–4. tölul. 1. mgr. eru hluti af heildaraflamarki skips í makríl og fela ekki í sér aukningu á aflamarki þess, og byggja á samningum Íslands við viðkomandi ríki um stjórnun makrílveiða. Fiskistofu er heimilt að færa heimildir þessar sérstaklega í aflamarkskerfi og setja nánari reglur um skráningu, flutning og uppgjör þeirra.

4. gr. Veiðar í lögsögu Noregs.

Íslenskum skipum sem hafa aflamark í makríl er heimilt að veiða makríl í efnahagslögsögu Noregs, í samræmi við samning Íslands og Noregs frá 15. desember 2025 um stjórnun makrílveiða í Norðaustur-Atlantshafi.

Á árinu 2026 mega íslensk skip að hámarki veiða 18.838 tonn af makríl í efnahagslögsögu Noregs.

Af þeim afla, sem heimilt er að veiða í efnahagslögsögu Noregs samkvæmt 2. mgr., skal Fiskistofa fyrst heimila veiðar á allt að 6.405 tonnum (34%), sem heimilt er að landa eða ráðstafa án uppboðsskyldu. Afla, sem veiddur er á grundvelli þeirrar heimildar, er heimilt að selja á hvaða markaði sem er.

Hinn 10. september 2026 skal Fiskistofa heimila veiðar á því sem eftir stendur af hámarksafla samkvæmt 2. mgr., allt að 12.433 tonnum (66%), sem skylt er að bjóða upp í gegnum Norges Sildesalgslag SA. Hafi heildarafli skipa eigi náð 6.405 tonnum þegar sú dagsetning rennur upp, skal skipum, sem hefja veiðar eftir það tímamark, heimilt að landa afla án uppboðsskyldu þar til samanlagður afli hefur náð 6.405 tonnum.

Þegar Fiskistofa telur fyrirséð að samanlagður afli íslenskra skipa í efnahagslögsögu Noregs muni ná 6.405 tonnum skal stofnunin birta tilkynningu þess efnis á vefsíðu sinni. Í tilkynningunni skal koma fram að afli, sem veiddur er í efnahagslögsögu Noregs eftir að samanlagður afli íslenskra skipa þar hefur náð 6.405 tonnum, skuli boðinn upp í gegnum Norges Sildesalgslag SA, sbr. 4. mgr.

Í efnahagslögsögu Noregs skulu ekki fleiri en 12 íslensk skip stunda makrílveiðar á hverjum tíma. Veiðar á makríl sunnan 62°N eru eingöngu heimilar í nót.

Við veiðar í efnahagslögsögu Noregs skulu skip fara að reglum sem norsk stjórnvöld setja um veiðarnar, þar á meðal reglum um tilkynningar, rafræna skýrslugjöf, löndun afla og eftirlit.

5. gr. Veiðar í lögsögu Færeyja.

Íslenskum skipum sem hafa aflamark í makríl er heimilt að veiða makríl í efnahagslögsögu Færeyja, í samræmi við samning Íslands og Færeyja frá 15. desember 2025 um stjórnun makrílveiða í Norðaustur-Atlantshafi.

Á árinu 2026 mega íslensk skip að hámarki veiða 9.419 tonn af makríl í efnahagslögsögu Færeyja.

Í efnahagslögsögu Færeyja skulu ekki fleiri en 12 íslensk skip hafa leyfi til makrílveiða á hverjum tíma. Færeysk stjórnvöld geta, að höfðu samráði við íslensk stjórnvöld, takmarkað frekar fjölda skipa sem stunda makrílveiðar í lögsögu Færeyja á sama tíma, ef nauðsynlegt er talið til að koma í veg fyrir þrengsli á veiðisvæðum.

Við veiðar í efnahagslögsögu Færeyja skulu skip fara að reglum sem færeysk stjórnvöld setja um veiðarnar, þar á meðal reglum um tilkynningar, rafræna skýrslugjöf, löndun afla og eftirlit.

Meðafli norsk-íslenskrar síldar við makrílveiðar íslenskra skipa í efnahagslögsögu Færeyja skal reiknast til þeirra aflaheimilda sem íslensk skip hafa aðgang að í efnahagslögsögu Færeyja samkvæmt öðrum samningum milli Íslands og Færeyja.

6. gr. A- og B- flokkur.

Aflaheimildir í makríl skiptast í A- og B-flokk. Skip sem eru með aflamark í makríl skiptast í A- og B-flokk og fer um skiptinguna eftir því í hvaða flokki aflaheimildir skipsins eru. Ekki er hægt að skipta um flokk á veiðitímabilinu. Óheimilt er að flytja aflamark úr B-flokki yfir í A-flokk nema í jöfnum skiptum í þorskígildum talið fyrir aflamark í þorski, ýsu, ufsa og steinbít að því gefnu slík skipting samræmist reglum um krókaaflamark þ.m.t. að krókaaflamark verður aðeins flutt til skips sem leyfi hefur til veiða með krókaaflmarki. Þrátt fyrir ákvæði 4. mgr. 15. gr. laga nr. 116/2006 um stjórn fiskveiða, er ekki heimilt að flytja aflamark makríls sem flutt hefur verið af skipi í B flokki og yfir á skip í A flokki, til annarra skipa í sama flokki.

7. gr. Búnaður.

Skipum sem hafa fengið heimild til veiða á makríl er óheimilt að vera með þannig útbúnað að mögulegt sé að dæla úr tönkum skips undir yfirborði sjávar.

Hámarksbil milli rimla í sjóskilju skal ekki vera meira 10 mm og skulu rimlarnir rafsoðnir fastir. Ef að gataplötur eru notaðar í stað rimla má hámarksþvermál gata ekki fara yfir 10 mm. Göt og rimlar í rennum framan við sjóskilju mega ekki fara yfir 15 mm í þvermál.

8. gr. Veiðitilhögun.

Makrílveiðar í flottroll eru ekki heimilar nær landi en 12 sjómílur frá viðmiðunarlínu.
Þá eru makrílveiðar í flottroll bannaðar á svæði sem afmarkast af línum sem dregnar er milli eftirfarandi hnita:

1. 68°30 N - 17°00 V
2. 65°30 N - 17°00 V
3. 65°30 N - 26°00 V
4. 66°00 N - 26°00 V
5. 66°55 N - 24°13 V
6. 67°40 N - 24°13 V
7. 68°30 N - 19°04 V

Makrílveiðar í net eru óheimilar.

9.  gr. Sýnataka.

Sé makríll veiddur í flottroll eða nót, skulu tekin sýni úr afla, a.m.k. eitt í hverri veiðiferð og skal skrá sýnatökuna í afladagbók skipsins. Í hverju sýni skulu vera að minnsta kosti 50 stk. af makríl, sem valin eru af handahófi. Sýnin skulu fryst um borð, merkt skilmerkilega (veiðiskip, staður, dagsetning og dýpi) og send Hafrannsóknastofnun, þegar að lokinni veiðiferð.

10. gr. Fjarskiptabúnaður.

Fiskiskip sem stunda veiðar á samningssvæði Norðaustur-Atlantshafsfiskveiðinefndarinnar (NEAFC) skulu búin fjarskiptabúnaði sem sendir upplýsingar um staðsetningu, stefnu og hraða viðkomandi skips á klukkustundar fresti, með sjálfvirkum hætti, til sameiginlegrar eftirlitsstöðvar Landhelgisgæslunnar og Fiskistofu, hér eftir nefnd eftirlitsstöðin, sem miðlar gögnum til hlutaðeigandi stofnana.

Óheimilt er að halda til veiða fyrr en starfsmenn eftirlitsstöðvarinnar hafa staðfest að fjarskiptabúnaður starfi eðlilega. Skulu sendingar samkvæmt framangreindu hefjast þegar viðkomandi skip lætur úr höfn og skal þeim ekki ljúka fyrr en skipið kemur til hafnar að nýju til löndunar afla.

Ef búnaður til sjálfvirkra sendinga bilar skal gert við hann svo fljótt sem mögulegt er, þó eigi síðar en að 30 dögum liðnum. Þar til búnaðurinn verður kominn í lag skal senda á annan hátt upplýsingar um staðsetningu skipsins á a.m.k. 4 klukkustunda fresti til eftirlitsstöðvarinnar.

11. gr. Tilkynningar.

Um tilkynningar við makrílveiðar á alþjóðlegu hafsvæði gilda ákvæði reglugerðar um veiðieftirlit á samningssvæði Norðaustur-Atlantshafsfiskveiðinefndarinnar (NEAFC). Um tilkynningar varðandi veiðar í lögsögu Svalbarða fer samkvæmt reglum sem norsk stjórnvöld setja enda séu þær settar á grundvelli samnings um Svalbarða frá 9. febrúar 1920 og í samræmi við ákvæði hans

Eftir að skip hættir veiðum og í síðasta lagi fjórum klukkustundum áður en áætlað er að það komi til hafnar skal skipstjóri senda Fiskistofu tilkynningu á því formi sem Fiskistofa ákveður um áætlaðan afla skipsins, fyrirhugaðan löndunarstað og fyrirhugaðan löndunartíma. Heimilt er að víkja frá lágmarkstíma t.d. ef fjarlægð milli fiskimiða og löndunarhafnar gefur tilefni til þess, enda sé þá tilkynning send um leið og veiðum er hætt.

12. gr. Vigtun og löndun.

Makrílafla skal landað og hann veginn í íslenskri höfn. Þó er heimilt með leyfi Fiskistofu að landa makrílafla og makrílafurðum í höfnum erlendis, enda sé tryggt að eftirlit með vigtun aflans sé fullnægjandi að mati Fiskistofu. Sækja skal um leyfi til löndunar makríls utan íslenskra hafna til Fiskistofu, skal skipstjóri í umsókn tilgreina nákvæmlega hvar hann hyggst landa aflanum og hvert er áætlað magn makríls.

Áætli skip komu til hafnar samningsaðila NEAFC með afla af samningssvæði NEAFC, hvort heldur til löndunar, umskipunar eða til að leita þjónustu að öðru leyti, skal tilkynna þar til bæru yfirvaldi í viðkomandi ríki um komu skips til hafnar innan tiltekins frests sem ákveðinn er af hafnarríkinu í samræmi við reglur NEAFC um hafnarríkiseftirlit og framkvæmd þess.

Tilkynningar skal senda með rafrænum hætti á heimasíðu NEAFC https://psc.neafc.org. Samþykki þar til bærra yfirvalda þarf að liggja fyrir áður en löndun hefst.

Þegar að löndun lokinni skal skipstjóri veiðiskips senda Fiskistofu endanlegar tölur um landaðan afla og aflaverðmæti, staðfestar af móttakanda makrílsins eða staðfest afrit af vigtarnótu, liggi það fyrir.

Draga skal 2% af afla hvers skips vegna vatnsinnihalds í makríl miðað við afla upp úr sjó fari afli til manneldis og reiknast það magn ekki til aflaheimilda þess. Sé makríll veiddur á línu eða handfæri skal afla haldið aðgreindum um borð í veiðiskipi eftir tegundum. Verði slíku ekki við komið vegna smæðar báts skal afli aðgreindur eftir tegundum við löndun.

13. gr. Viðurlög.

Brot á reglugerð þessari varða viðurlögum samkvæmt ákvæðum laga nr. 116/2006, um stjórn fiskveiða, laga nr. 57/1996, um umgengni um nytjastofna sjávar, laga nr. 79/1997, um veiðar í fiskveiðilandhelgi Íslands og laga nr. 151/1996, um veiðar utan lögsögu Íslands.

14. gr. Lagaheimild og gildistaka.

Reglugerð þessi er sett samkvæmt ákvæðum 3. gr., 15. gr. og 16. gr. laga nr. 116/2006, um stjórn fiskveiða, 2. gr., 9. gr. og 30. gr. laga nr. 57/1996, um umgengni um nytjastofna sjávar, 8. gr. og 14. gr. laga nr. 79/1997, um veiðar í fiskveiðilandhelgi Íslands og 4. gr., 7. gr., 8. gr. og 19. gr. laga nr. 151/1996, um fiskveiðar utan lögsögu Íslands. Reglugerðin öðlast þegar gildi. Jafnframt fellur úr gildi reglugerð nr. 266/2024 um veiðar íslenskra skipa á makríl.

B deild — Útgáfudagur: 23. júlí 2026