Húsnæðis-, mannvirkja- og skipulagsstofnun (HMS) staðfesti 28. júlí 2026 breytingu á aðalskipulagi Vestmannaeyja 2015-2035 sem samþykkt var í bæjarstjórn 1. júlí 2026.

Í breytingunni felst stækkun iðnaðarsvæðis I-3 í Viðlagafjöru úr 16,64 ha í 20,9 ha vegna áforma um stækkun landeldisstöðvar Laxeyjar ehf. úr 11.500 tonna framleiðslugetu í allt að 42.000 tonn á ári, með allt að 22.000 tonna hámarkslífmassa og seiðaeldisstöð með allt að 800 tonna lífmassa. Iðnaðarsvæðið stækkar til norðurs yfir meginhluta efnistökusvæðis E-1, sem fellur út, en nyrsti hluti þess verður hluti af óbyggðu svæði ÓB-3 sem stækkar um 0,5 ha. Skilmálum I-3 er jafnframt breytt þannig að fram kemur að lóðir innan svæðisins verði á stöllum frá um 6 m.y.s. upp í um 35 m.y.s. og að hámarkshæð bygginga verði 9 til 17 m frá gólfkóta, nánar útfært í deiliskipulagi.

Málsmeðferð var samkvæmt 1. mgr. 36. gr. skipulagslaga nr. 123/2010.

B deild — Útgáfudagur: 12. ágúst 2026