AFURÐARLÝSING

afurðarheitisins „Íslenskt viskí/viský – Icelandic Whisky/whiskey“.

1) Afurðarheiti.

Íslenskt viskí/viský – Icelandic Whisky/whiskey.

2) Lýsing á afurð, hráefni og helstu eðlis-, efna- og örverufræðilegu eða skynrænu einkenni afurðar.

Samkvæmt reglugerð Evrópusambandsins nr. 110/2008 frá 15. janúar 2008 um framleiðslu brenndra drykkja, sem gildir fyrir ríki innan Evrópska efnahagssvæðisins, skal viskí vera framleitt úr moltuðu og/eða ómoltuðu korni, sem síðar meir er meskjað, og að lokum eimað.

Í Skotlandi er afurðarheitið „Scotch Whisky“ verndað. Byggjum við kröfu okkar á þeirri reglugerð.

Íslenskt viskí skal framleitt á Íslandi og vera skilgreint svohljóðandi:

1. Það hafi verið eimað í brugghúsi á Íslandi, úr vatni og sterkju fenginni eru úr korni, þar sem að minnsta kosti 51% kornsins er ræktað á Íslandi.
   1. Mesking (umbreyting sterkju í gerjanlegar einsykrur) hafi átt sér stað í brugghúsi á Íslandi.
   2. Gerjun með viðbættu geri hafi átt sér stað í brugghúsi á Íslandi.
2. Það sé eimað að styrk undir 94,8% alkóhólstyrkleika svo vínandinn haldi lykt og bragði frá grunnhráefninu og framleiðsluferlum.
3. Það hafi farið í gegnum öldrunarferli með aðkomu viðar, í íláti undir 700 l að rúmmáli.
4. Öldrun hafi átt sér stað á Íslandi eða í lögsögu þess.
5. Það haldi lit, lykt og bragði úr grunnhráefni, framleiðsluferli og öldrun.
6. Að átöppun í neytendaumbúðir eigi sér stað á Íslandi til að tryggja möguleika á eftirliti og staðfestingu uppruna.
7. Að við átöppun sé engu bætt við að undanskildu:
   1. íslensku vatni,
   2. plain caramel colouring (E150), bragðlaust litarefni,
   3. íslensku vatni og plain caramel colouring.
8. Að lágmarksalkóhólstyrkleiki í neytendaumbúðum sé 40% rúmmáls (40% abv, 40% vol).

3) Sérstakar reglur um merkingar á viðkomandi afurð.

Íslenskt viskí sem stenst þær framleiðslureglur sem settar hafa verið fram í tölulið 2, mega vera merktar með þeirri skilgreiningu sem er að finna í tölulið 1.

Átöppun skal fara fram á Íslandi og notast skal við íslenskt bergvatn til niðurþynningar. Þær vörur sem ekki standast þessar reglur mega ekki, á beinan eða óbeinan hátt, vísa til þess að varan sé framleidd á Íslandi, t.d. með notkun íslenska fánans, skjaldarmerkisins eða á annan myndrænan hátt ýja að því að hér sé um íslenska vöru aða ræða.

1. Skilgreining landsvæðis.
2. Sönnun þess að afurð sé upprunnin á skilgreindu landsvæði.
3. Lýsing á framleiðsluaðferð afurðar og raunverulegum og óbreytilegum staðbundnum aðferðum, upplýsingum um pökkun ef hún verður að fara fram innan hins skilgreinda landsvæðis og ástæður þess að pökkun verður að fara fram innan þess til að standa vörð um gæði eða tryggja uppruna eða eftirlit.
4. Upplýsingar sem staðfesta tengsl milli gæða eða einkenna afurðar og umhverfisins, hvort sem við á; eða tengsl milli ákveðinna gæða, orðspors eða annarra einkenna landbúnaðarafurðar eða matvæla og umhverfisins.

Fyrir liði a-d hér að ofan gildir:

1. Ísland og þær eyjar sem falla undir íslenska lögsögu.
2. Framleiðandi framleiðir vöruna úr að minnsta kosti 51% íslensku korni á Íslandi og öldrun eigi sér stað í lögsögu Íslands samanber afurðarlýsingu í tölulið 2.
3. Framleiðslulýsing er sett fram í tölulið 2. Eftirlit skal vera hjá viðeigandi stofnun, s.s. heilbrigðiseftirliti, Matvælastofnun og/eða Samtökum íslenskra eimingarhúsa.
4. Íslenska vöruheitið er dýrmætt sökum hreinnar orku og hreina vatnsins sem við höfum á Íslandi, við þetta bætist hreinleiki afurða frá landbúnaði, íslenska kornið, geymsla og öldrun við íslenskar aðstæður og framleiðsluaðferðir þær sem þróaðar eru til að nýta alla þessa þætti. Teljum við að íslenskt viskí hafi einstaka sérstöðu sem mikilvægt er að vernda.