Með vísan til 124. gr. sveitarstjórnarlaga, nr. 138/2011, tilkynnir ráðuneytið að sameining Borgarbyggðar og Skorradalshrepps í eitt sveitarfélag hefur verið staðfest.

Kjósa skal níu fulltrúa í sveitarstjórn hins sameinaða sveitarfélags við almennar sveitarstjórnarkosningar sem fram fara 16. maí 2026. Nýkjörin sveitarstjórn tekur við stjórn hins sameinaða sveitarfélags hinn 31. maí 2026 og á sama tíma tekur sameiningin gildi.

Samþykkt um stjórn Borgarbyggðar, nr. 1213/2022, mun gilda fyrir hið sameinaða sveitarfélag þar til því hefur verið sett ný samþykkt. Heiti hins sameinaða sveitarfélags verður auglýst sérstaklega.

Íbúar sveitarfélaganna skulu vera þegnar hins sameinaða sveitarfélags. Hið sameinaða sveitarfélag skal taka yfir allt það land sem nú tilheyrir sveitarfélögunum tveimur. Eignir, skuldir, réttindi og skyldur sem tilheyra sveitarfélögunum skulu falla til hins sameinaða sveitarfélags. Skjöl og bókhaldsgögn beggja sveitarfélaga skulu afhent hinu sameinaða sveitarfélagi til varðveislu.

Sveitarstjórnir sveitarfélaganna tveggja kjósa sameiginlega þrjá fulltrúa í yfirkjörstjórn og þrjá til vara í stað yfirkjörstjórna þeirra sem kosnar voru í upphafi yfirstandandi kjörtímabils skv. 17. gr. kosningalaga, nr. 112/2021.

B deild — Útgáfudagur: 23. mars 2026