1. gr. Markmið og gildissvið.

Í reglugerð þessari er kveðið á um nauðsynleg skilyrði til þess að:

1. til að tryggja rekstrarsamhæfi rafrænna gjaldtökukerfa í öllu vegakerfi Sambandsins, á hraðbrautum í borgum og milli borga, aðalvegum og smærri vegum og við ýmis mannvirki, s.s. göng, brýr og ferjur, og
2. til að greiða fyrir upplýsingaskiptum úr ökutækjaskrá yfir landamæri að því er varðar ökutæki og eigendur eða umráðamenn ökutækja sem tengjast vanefndum á greiðslu hvers kyns veggjalda í Sambandinu.

2. gr. Rafræn evrópsk veggjaldaþjónusta.

Ákvæði í greinum 3-22 í tilskipun (ESB) 2019/520 koma ekki til framkvæmda á Íslandi, sbr. b-liður 2. mgr. 1. gr. tilskipunarinnar.

3. gr. Ferli fyrir upplýsingaskipti á milli aðildarríkja.

Samgöngustofa er landsbundinn tengiliður í samræmi við 23. gr. tilskipunar (ESB) 2019/520 og veitir upplýsingar um skráð ökutæki í ökutækjaskrá stofnunarinnar komi fram beiðni um það frá til þess bærum aðila.

Samgöngustofa kallar eftir upplýsingum í gegnum EUCARIS-kerfið um skráða eigendur/umráðendur erlendra ökutækja komi fram beiðni um það frá til þess bærum aðila. Samgöngustofa tekur gjald fyrir slíka uppflettingu í samræmi við gjaldskrá stofnunarinnar.

4. gr. Málsmeðferð vegna vanefnda við greiðslu veggjalda.

Innheimtuaðili veggjalda fer með málsmeðferð og eftirfylgni vegna vanefnda á greiðslu veggjalda í samræmi við 24. og 25. gr. tilskipunar (ESB) 2019/520.

5. gr. Skýrslugjöf til Eftirlitsstofnunar EFTA.

Samgöngustofa skal útbúa skýrslu og senda til Eftirlitsstofnunar EFTA í samræmi við 26. gr. tilskipunar (ESB) 2019/520. Innheimtuaðili veggjalda skal veita Samgöngustofu nauðsynlegar upplýsingar fyrir skýrslugerðina á því formi að taka megi þær beint upp í skýrsluna.

6. gr. Innleiðing.

Með reglugerð þessari öðlast gildi hér á landi eftirtaldar reglugerðir og tilskipun, með þeim breytingum og viðbótum sem leiðir af XIII. viðauka EES-samningsins, bókun 1 um altæka aðlögun og öðrum ákvæðum hans:

1. Tilskipun Evrópuþingsins og ráðsins (ESB) 2019/520 frá 19. mars 2019 um rekstrarsamhæfi rafrænna vegatollkerfa og um að greiða fyrir upplýsingaskiptum yfir landamæri í tengslum við vanefndir á greiðslu veggjalda í Sambandinu (endurútgefin), sbr. ákvörðun sameiginlegu EES-nefndarinnar nr. 31/2025, 7. febrúar 2025, birt í EES-viðbæti við Stjórnartíðindi Evrópusambandsins nr. 17 frá 20. mars 2025, bls. 626-657.
2. Framkvæmdarreglugerð framkvæmdastjórnarinnar (ESB) 2020/204 frá 28. nóvember 2019 um ítarlegar skuldbindingar veitenda evrópskrar, rafrænnar vegatollþjónustu, lágmarkskröfur um inntak svæðisyfirlýsingar fyrir evrópska, rafræna vegatollþjónustu, rafrænan skilflöt, kröfur um rekstrarsamhæfishluta og um niðurfellingu á ákvörðun 2009/750/EB, sbr. ákvörðun sameiginlegu EES-nefndarinnar nr. 31/2025, 7. febrúar 2025, birt í EES-viðbæti við Stjórnartíðindi Evrópusambandsins nr. 17 frá 20. mars 2025, bls. 666-679.
3. Framseld reglugerð framkvæmdastjórnarinnar (ESB) 2020/203 frá 28. nóvember 2019 um flokkun ökutækja, skuldbindingar notenda evrópskrar, rafrænnar vegatollþjónustu, kröfur um rekstrarsamhæfishluta og um lágmarksviðmiðanir um hæfi tilkynntra aðila, sbr. ákvörðun sameiginlegu nefndarinnar nr. 31/2025, 7. febrúar 2025, birt í EES-viðbæti við Stjórnartíðindi Evrópusambandsins nr. 17 frá 20. mars 2025, bls. 658-665.

7. gr. Lagastoð og gildistaka.

Reglugerð þessi sem er sett með heimild í 17. gr. vegalaga nr. 80/2007 öðlast þegar gildi. Við gildistöku reglugerðar þessarar fellur úr gildi reglugerð um rekstrarsamhæfi rafræns gjaldtökukerfis innan Evrópska efnahagssvæðisins, nr. 979/2013.

B deild — Útgáfudagur: 29. maí 2026