Dómstólar
Túlkar í dómsal
Þingmálið er íslenska og hún er notuð í dómsmálum. Það þýðir að íslenska er töluð í dómsal og skjöl sem eru lögð fram í dómsmálumskulu almennt vera á íslensku eða þýdd á íslensku. Túlkar, þýðendur og táknmálstúlkar eru því oft kallaðir til þjónustu við dómstólana.
Störf og skyldur túlka
Þegar túlkar eru kallaðir til aðstoðar mæta þeir alla jafna í dómsal og túlka fyrir einstaklinga sem geta ekki tjáð sig á íslensku eða nota táknmál. Þá getur túlkur þurft að þýða skýrslutökur sem fara fram í gegnum fjarfundarbúnað eða síma.
Túlkar skulu gæta algjörs hlutleysis, trúnaðar og nákvæmni í störfum sínum.
Túlkar í dómsmálum skulu vera löggiltir til starfans. Fáist ekki löggiltur dómtúlkur má samkvæmt lögum kalla til annan hæfan einstakling til að annast þýðingu. Það kemur fyrir að notuð sé túlkunarþjónusta erlendis frá, til dæmis þegar ekki finnst túlkur fyrir ákveðið tungumál. Túlkunin fer þá fram í gegnum fjarfundarbúnað eða síma.
Túlkar eru yfirleitt boðaðir með litlum fyrirvara eða jafnvel á sama degi og málið er tekið fyrir í dómsal. Það fer eftir aðstæðum hverju sinni hversu mikinn tíma túlkar hafa til undirbúnings.
Dómari stjórnar þinghaldinu og reynir að tryggja að túlkurinn fái gott ráðrúm til að sinna starfi sínu.
Hver boðar túlk í dómsal?
Í sakamálum sér ákæruvaldið um að kalla til túlk. Í einkamálum er það lögmaður málsaðila. Í einstaka tilfellum er það dómstóllinn sem kallar túlkinn til.
Greiðsla fyrir þjónustu túlka er í höndum málsaðila sem getur verið hið opinbera eða einstaklingur.
Táknmálstúlkun
Þýðing skjala í dómsmálum
Skjali á erlendu tungumáli sem lagt er fram í dómsmáli þarf að jafnaði að fylgja þýðing á íslensku að því leyti sem byggt er á efni þess. Þýðendur skjala sem lögð eru fram í dómsmálum þurfa að jafnaði að vera löggiltir skjalaþýðendur Ef ekki er möguleiki á að fá efni skjals þýtt af löggiltum skjalaþýðanda, má leggja fram þýðingu annars hæfs aðila.
Sjá nánar
10. gr. laga nr. 91/1991 um meðferð einkamála og 12. gr. laga nr. 88/2008 um meðferð sakamála