Greiðsluþátttaka vegna tannlækninga

Sjúkratryggingar taka þátt í kostnaði við nauðsynlegar tannréttingar barna og ungmenna. Styrkir Sjúkratrygginga vegna tannréttinga eru eftirfarandi samkvæmt gildandi reglugerð.

Meðferð í annan góm: 310.000 kr

Meðferð í báða góma: 460.000 kr

Skilyrði eru:

• Að meðferð sé með föstum tækjum (spöngum) á að minnsta kosti 10 fullorðinstennur í góm

• Að þjónustan sé veitt af sérfræðingi í tannréttingum

• Að meðferð með föstum tækjum hefjist fyrir 21 árs aldur

• Að viðkomandi hafi ekki áður fengið styrk vegna tannréttinga

Styrkir eru greiddir til tannréttingasérfræðings jafn óðum og kostnaður fellur til, uns styrkupphæðin er að fullu greidd.

Tannlæknar senda umsóknir rafrænt til Sjúkratrygginga fyrir hönd skjólstæðinga sinna.

Forréttingar og lagfæringar eftir meðferðarlok

Sjúkratryggingar taka ekki þátt í kostnaði við forréttingar fyrir upphaf tannréttingameðferðar eða eftirlit og lagfæringar stoðtækja eftir meðferðarlok.

Laus tæki

Sjúkratryggingar taka ekki þátt í kostnaði við tannréttingar með skinnum, svo sem Invisalign.

Alvarleg atvik

Sjúkratryggingar taka þátt í 80% kostnaðar samkvæmt gjaldskrá og með þeim takmörkunum sem þar koma fram við nauðsynlegar tannlækningar og tannréttingar vegna alvarlegra afleiðinga meðfæddra galla, slysa og sjúkdóma.

Sjúkratryggingar greiða 95% kostnaðar samkvæmt gjaldskrá með þeim takmörkunum sem þar koma fram vegna nauðsynlegra og tímabærra tannlækninga og tannréttinga vegna alvarlegra afleiðinga meðfæddra galla og sjúkdóma sem tiltekin eru í 12. gr. reglugerðar 766/2024.

Nauðsynlegt er að sækja um greiðsluþátttöku Sjúkratrygginga vegna þess áður en meðferð, önnur en bráðameðferð hefst. Tannlæknar senda umsóknir til Sjúkratrygginga fyrir skjólstæðinga sína.

Ferðakostnaður vegna tannréttinga

Heimilt að taka þátt í fjórum ferðum á almanaksári vegna langra ferða sem farnar eru frá og með 01.07.2024. Skilyrði er að viðkomandi njóti styrks vegna tannréttinga.

Einstaklingur þarf að skila inn staðfestingu á komu/tannlæknareikningi frá sérfræðingi ásamt kvittunum fyrir ferðakostnaði.

Ef ferð hefur verið nýtt vegna meðferðar hjá öðrum aðilum innan heilbrigðiskerfisins skerðir það réttindi til ferða vegna tannréttingameðferðarinnar. Ferðakostnaður er aldrei endurgreiddur að fullu, það er sjúklingshluti í hverri ferð, sjá reglugerð 1140/2019.

Heimilt er að taka þátt í ítrekuðum ferðum vegna alvarlegustu tilvikanna og þarf sérfræðingur í tannréttingum að sækja um slíkt.

Sjá nánar hér.