Almennt um greiðsluþátttöku í meðferð sem ekki er í boði á Íslandi

Greitt er fyrir tæknifrjóvgunarmeðferðina sem fylgir microtese-meðferð á sama hátt og fyrir tæknifrjóvgunarmeðferð sem fram fer hér á landi. Þannig er endurgreiðsla í fyrstu meðferð allt að 150.000 kr., en allt að 400.000 kr. í annarri til fjórðu meðferð. Engin greiðsluþátttaka er í meðferðum eftir það.

Greiðsla ferðakostnaðar og dagpeninga vegna microtese-meðferðar.

Dagpeningar verða greiddir til þess einstaklings sem undirgengst-microtese meðferðina og foreldris sem mun ganga með barn. Greitt er fyrir fargjald og dagpeninga til og með þess dags sem uppsetning fósturvísis er gerð. Inni í þessum tíma getur verið undirbúningstími sem þjónustuveitandi erlendis metur nauðsynlegan. Dagpeningar eru einnig greiddir fyrir heimferðardag.

Ekki er greiddur ferðakostnaður fyrir maka, þar sem slík heimild byggir á læknisfræðilegri nauðsyn.

Misjafnt getur verið hversu langur meðferðartími er nauðsynlegur erlendis vegna microtese-meðferðar og uppsetningar fósturvísis. Sjúkratryggingar meta fyrir hversu marga daga dagpeningar eru greiddir hverju sinni. Ef meðferðartími fyrir uppsetningu fósturvísis er óvenjulega langur verður dagpeningagreiðsla miðuð við að jafnaði fjóra daga að ferðadögum meðtöldum.

Greiðsluþátttaka í geymslugjaldi fósturvísa erlendis

Ef til verða fósturvísar sem hægt er að frysta að lokinni microtese og tæknifrjóvgunarmeðferð þá greiða Sjúkratryggingar ekki fyrir geymslu slíkra fósturvísa erlendis, nema geymslugjaldið sé hærra en samkvæmt upphæð í reglugerð nr. 1579/2024 um slíkt gjald hér á landi. Ef svo er þá er greiddur mismunur. Þetta er í samræmi við innlenda reglugerð þar sem geymslugjald fyrir frysta fósturvísa er almennt ekki greitt.

Að hámarki er miðað við að geymslugjald sé 105.000 kr. á ári og er þá að hámarki endurgreiddur mismunur á þeirri upphæð og 25.000. kr., samanber upphæð í reglugerð nr. 1579/2024.

Uppsetning frystra fósturvísa sem fást eftir microtese meðferð

Þegar kemur að uppsetningu frystra fósturvísa er ekki greiðsluþátttaka samkvæmt innlendri reglugerð og sama gildir því um slíka meðferð erlendis. Ef uppsetning á frystum fósturvísi er kostnaðarsamari erlendis en samkvæmt innlendri reglugerð, greiða Sjúkratryggingar þó mismuninn.

Að hámarki er miðað við að meðferðin kosti 260.000 kr. og og er þá að hámarki endurgreiddur mismunurinn á þeirri upphæð og 100.000 kr. samanber upphæð í reglugerð nr. 1579/2024.

Skilyrði fyrir greiðsluþáttöku í fósturvísagreiningu erlendis.

Fósturvísagreining er ekki framkvæmd á Íslandi. Sækja þarf um greiðsluþátttöku í meðferð erlendis til Sjúkratrygginga og er læknisvottorð áskilið. Umsóknin verður í öllum tilvikum að berast áður en meðferð hefst og samþykki þarf að liggja fyrir.

Við ákvörðun um það hvort greiðsluþátttaka sé samþykkt þarf að meta hvort brýn nauðsyn sé á rannsókninni. Við það mat er meðal annars horft til eftirfarandi þátta:

• Hvort umtalsverðar líkur séu á því að alvarlegur sjúkdómur komi fram hjá fóstri vegna genabreytingar/litningagalla. Meðal annars er horft til framkvæmdar í Bretlandi og Svíþjóð.

• Almennt er greiðsluþátttaka ekki samþykkt ef um er að ræða sjúkdóm sem gæti komið fram á fullorðinsaldri, t.d. BRCA stökkbreytingu.

• Hvort búið sé að reyna fósturvísagreiningu í mörg skipti án árangurs. Við mat á því hvort meðferð teljist brýn nauðsyn er haft til hliðsjónar hvort líklegt sé að hún beri árangur. Ef búið er að reyna fósturvísagreiningu í nokkur skipti án þess að heilbrigður fósturvísir fáist, dvína líkur á að það takist.

• Almenn greiðsluþátttaka í frjósemismeðferðum á Íslandi takmarkast við fjögur skipti og er almennt miðað við að fósturvísagreining sé ekki reynd oftar án árangurs, nema sérstök læknisfræðileg rök mæli með því.

Ef greiðsluþátttaka er samþykkt greiða Sjúkratryggingar allan kostnað við fósturvísagreininguna sjálfa. Sjúkrahús erlendis getur sent Sjúkratryggingum reikning fyrir þeim hluta meðferðarinnar.

Rannsóknir sem erlendi meðferðaraðilinn telur nauðsynlegt að gera áður en sjálf fósturvísagreiningin fer fram, skulu gerðar á Íslandi ef það er í boði innanlands. Ef slíkar rannsóknir eru engu að síður gerðar erlendis má búast við því að Sjúkratryggingar greiði þær ekki að fullu, heldur verði greiðsluþátttaka hin sama og ef rannsóknin hefði verið gerð á Íslandi. Ef slíkar rannsóknir lengja ferðatíma erlendis verða dagpeningar ekki greiddir fyrir alla daga ferðarinnar.

Greiðsluþátttaka í IVF meðferð (tæknifrjóvgunarmeðferð) sem fylgir fósturvísagreiningu

Greitt er fyrir IVF meðferðina sem fylgir fósturvísagreiningu á sama hátt og fyrir tæknifrjóvgunarmeðferð sem fram fer hér á landi. Upplýsingar um greiðsluþátttöku í meðferð sem fer fram hér á landi má finna í 2. gr. reglugerðar nr. 1579/2024.

Þannig er endurgreiðsla í fyrstu meðferð allt að 150.000 kr., en allt að 400.000 kr. í annarri til fjórðu meðferð. Engin greiðsluþátttaka er í meðferðum eftir það. Ef gjald fyrir meðferðina erlendis er hærra en hér á landi greiða Sjúkratryggingar mismuninn. Þó er að hámarki miðað við að meðferðin kosti 950.000 kr.

Greiðsla ferðakostnaðar og dagpeninga vegna fósturvísagreiningar og uppsetningar fósturvísis

Sjúkratryggingar greiða því foreldri sem gengur með barn fargjald og dagpeninga til og með þess dags sem uppsetning fósturvísis er gerð. Inni í þessum tíma getur verið undirbúningstími sem þjónustuveitandi erlendis metur nauðsynlegan. Dagpeningar eru einnig greiddir fyrir heimferðardag.

Ferðakostnaður foreldris sem ekki gengur með barn er aðeins greiddur ef um er að ræða kynfrumugjafa. Það er vegna þess að viðvera hans er nauðsynleg svo fósturvísir geti orðið til. Ef gjafakynfrumur eru notaðar er Sjúkratryggingum ekki heimilt að taka þátt í ferðakostnaði maka.

Misjafnt getur verið hversu langur meðferðartími er nauðsynlegur erlendis vegna fósturvísagreiningar og uppsetningar fósturvísis. Sjúkratryggingar meta fyrir hversu marga daga dagpeningar eru greiddir hverju sinni. Ef meðferðartími fyrir uppsetningu fósturvísis er óvenjulega langur verður dagpeningagreiðsla miðuð við að jafnaði fjóra daga að ferðadögum meðtöldum.

Greiðsluþátttaka í geymslugjaldi fósturvísa erlendis

Ef til verða fósturvísar sem hægt er að frysta að lokinni fósturvísarannsókn og tæknifrjóvgunarmeðferð þá greiða Sjúkratryggingar ekki fyrir geymslu slíkra fósturvísa erlendis, nema geymslugjaldið sé hærra en samkvæmt upphæð í reglugerð nr. 1579/2024 um slíkt gjald hér á landi. Ef svo er þá er greiddur mismunur. Þetta er í samræmi við innlenda reglugerð þar sem geymslugjald fyrir frysta fósturvísa er almennt ekki greitt.

Að hámarki er miðað við að geymslugjald sé 105.000 kr. á ári og er þá að hámarki endurgreiddur mismunur á þeirri upphæð og 25.000. kr., samanber upphæð í reglugerð nr. 1579/2024.

Uppsetning frystra fósturvísa sem fást eftir fósturvísagreiningu

Þegar kemur að uppsetningu frystra fósturvísa (umfram þá sem gerð er strax í kjölfar fósturvísagreiningar) er ekki greiðsluþátttaka samkvæmt innlendri reglugerð og sama gildir því um slíka meðferð erlendis. Ef uppsetning á frystum fósturvísi er kostnaðarsamari erlendis en samkvæmt innlendri reglugerð, greiða Sjúkratryggingar þó mismuninn.

Að hámarki er miðað við að meðferðin kosti 260.000 kr. og er þá að hámarki endurgreiddur mismunurinn á þeirri upphæð og 100.000 kr. samanber upphæð í reglugerð nr. 1579/2024.

Almennt um greiðsluþátttöku:

Sjúkratryggingar taka þátt í kostnaði vegna tæknifrjóvgunar í aðildarríkjum EES, Sviss og Bretlandi á grundvelli 23. gr. a) laga um sjúkratryggingar nr. 112/2008, sbr. 2. gr. reglugerðar nr. 484/2016.

Greiðsluþátttaka í meðferðinni er sú sama og ef meðferð hefði farið fram hér á landi.

Eingöngu er greitt fyrir þjónustu sem veitt er á starfsstofu sem rekin er á grundvelli leyfis heilbrigðisyfirvalda í viðkomandi landi. Þjónustuveitandi skal uppfylla allar opinberar kröfur um faglega þjónustu, rekstur og eftirlit.

Greiðsluþátttaka í tæknifrjóvgunarmeðferð

Greitt er fyrir IVF meðferðina á sama hátt og fyrir tæknifrjóvgunarmeðferð sem fram fer hér á landi. Upplýsingar um greiðsluþátttöku í meðferð sem fer fram hér á landi má finna í 2. gr. reglugerðar nr. 1579/2024.

Hvernig er sótt um

• Fylla þarf út viðeigandi umsókn

• Fyrir endurgreiðslu þarf að afhenda sundurliðaða, viðurkennda reikninga úr bókhaldskerfi þjónustuveitanda þar sem kemur skýrt fram hvað hver þjónusta sem var veitt kostaði. Án nákvæmra upplýsinga er ekki hægt að reikna út rétta greiðsluþátttöku.

• Greiðslustaðfestingar

• Staðfesting á því að meðferð sé lokið með uppsetningu.

Athugið að einungis er hægt að afgreiða umsóknir þegar meðferð hefur lokið með uppsetningu. Ef ekki var hægt að ljúka meðferð með uppsetningu þarf Sjúkratryggingum að berast staðfesting frá meðferðaraðila hvers vegna til að meta hvort þörf sé á frekari gögnum

Frekari upplýsingar má finna á eftirfarandi slóð: Sjúkratrygging íslenskra ferðamanna erlendis | Sjúkratryggingar