• Að meðferð sé með föstum tækjum (spöngum) á að minnsta kosti 10 fullorðinstennur í góm.

• Að þjónustan sé veitt af sérfræðingi í tannréttingum.

• Að meðferð með föstum tækjum hefjist fyrir 21 árs aldur.

• Að viðkomandi hafi ekki áður fengið styrk vegna tannréttinga.

Styrkir eru greiddir til tannréttingasérfræðings jafn óðum og kostnaður fellur til þangað til styrkupphæðin er að fullu greidd.

Tannlæknar senda umsóknir rafrænt til Sjúkratrygginga fyrir hönd skjólstæðinga sinna.

Sjúkratryggingar taka ekki þátt í kostnaði við forréttingar fyrir upphaf tannréttingameðferðar eða eftirlit og lagfæringar stoðtækja eftir meðferðarlok.

Sjúkratryggingar taka ekki þátt í kostnaði við tannréttingar með skinnum, svo sem Invisalign.

Sjúkratryggingar greiða 95% kostnaðar samkvæmt gjaldskrá vegna nauðsynlegra og tímabærra tannlækninga og tannréttinga vegna alvarlegra afleiðinga meðfæddra galla og sjúkdóma (12. gr reglugerðar 766/2024).

Nauðsynlegt er að sækja um greiðsluþátttöku Sjúkratrygginga áður en meðferð, önnur en bráðameðferð hefst. Tannlæknar senda umsóknir til Sjúkratrygginga fyrir skjólstæðinga sína.

Ef einstaklingur hefur fengið samþykktan styrk til tannréttinga þá geta Sjúkratryggingar niðurgreitt fjórar langar ferðir á ári.
• Einstaklingur þarf að skila inn staðfestingu á komu/tannlæknareikningi frá sérfræðingi ásamt kvittunum fyrir ferðakostnaði.
• Ef ferð hefur verið nýtt vegna meðferðar hjá öðrum aðilum innan heilbrigðiskerfisins skerðir það réttindi til ferða vegna tannréttingameðferðarinnar.
• Ferðakostnaður er aldrei endurgreiddur að fullu.
• Heimilt er að taka þátt í ítrekuðum ferðum vegna alvarlegustu tilvikanna og þarf sérfræðingur í tannréttingum að sækja um slíkt.

Sjá nánar um niðurgreiðslu ferðakostnaðar.

Kostnaður við meðferð

Tannlæknar eru aðilar að samningum við Sjúkratryggingar og þekkja reglur um endurgreiðslu. Þeir leggja mat á hvaða meðferð einstaklingur þarf og geta kannað greiðsluþátttöku Sjúkratrygginga áður en meðferð hefst.

Ef um ræðir meðferð sem greidd er af Sjúkratryggingum þá vinna tannlæknar samkvæmt gjaldskrá Sjúkratrygginga.

Tannlækni ber skylda til að upplýsa einstakling um kostnað við meðferðina áður en meðferð hefst.

Endurgreiðsla frá Sjúkratryggingum

Ekki er um beina endurgreiðslu að ræða til einstaklings. Sjúkratryggingar greiða sinn hluta kostnaðarins beint til tannlæknis sem rukkar einstakling um það sem hann þarf að greiða.