Sjúkratryggingar
Tannlækningar
Sjúkratryggingar taka þátt í tannlæknakostnaði barna, lífeyrisþega og vegna meðfæddra galla, slysa og sjúkdóma.
Sjúkratryggingar greiða 100% af tannlæknakostnaði fram að 18 ára aldri af bæði almennum tannviðgerðum og svæfingu í samræmi við samning um tannlækningar og með þeim takmörkunum sem koma þar fram.
Árlegt komugjald fyrir börn hjá tannlækni er 3.500 krónur.
Almennar tannlækningar eru meðal annars:
Skoðun.
Greining.
Röntgenmyndir.
Reglulegt eftirlit.
Tannviðgerðir.
Rótfyllingar.
Tannholdslækningar.
Úrdráttur tanna.
Sjúkratryggingar greiða ekki aðstöðugjald vegna tannviðgerða í svæfingu.
Heimilistannlæknir:
Barn þarf að vera skráð hjá heimilistannlækni.
Heimilistannlæknir sér til dæmis um:
Að boða börn í reglulegt eftirlit (að minnsta kosti á 2 ára fresti)
Að skrá ástand tanna og munnhols.
Sjá um forvarnir.
Að sjá um almennar tannlækningar.
Aðrir tannlæknar geta líka sinnt barninu.
Hægt er að skrá barn hjá heimilistannlækni á tannlæknastofu eða á Heilsugæslu á Mínum síðum.
Sjúkratryggingar greiða 100% af tannlæknakostnaði vegna nauðsynlegra meðferða vegna alvarlegra afleiðinga fæðingargalla, sjúkdóma eða slysa sem upp koma fyrir 18 ára aldur en er ekki hægt að sinna fyrr en eftir að fullum beinþroska er náð.
Heimild þessi gildir út 29. aldursár einstaklings.
Tannlæknir sendir Sjúkratryggingum umsókn rafrænt áður en meðferð hefst.
Sjúkratryggingar greiða hluta af kostnaði við úrdrátt endajaxla ef þeir valda eða eru líklegir til að valda alvarlegum vanda hjá einstaklingum 18 ára og eldri.
Lífeyrisþegar eru bæði þeir sem hafa yfir 75% örorku og einstaklingar 67 ára og eldri.
Sjúkratryggingar greiða 75% af tannlæknakostnaði fyrir almennar tannviðgerðir í samræmi við samning um tannlækningar og með þeim takmörkunum sem þar koma fram.
Almennar tannlækningar eru meðal annars:
Skoðun.
Greining.
Röntgenmyndir.
Reglulegt eftirlit.
Tannviðgerðir.
Rótfyllingar.
Tannholdslækningar.
Úrdráttur tanna.
Laust tanngervi.
Gervigómar
Sjúkratryggingar greiða 75% af bæði kostnaði tannlæknis og tannsmiðs vegna smíði gervigóma (heilgóma, plantagóma eða stálparta) lífeyrisþega á sex ára fresti. Einnig er greitt fyrir fóðrun góma á þriggja ára fresti.
Greiðist án umsóknar fyrir lífeyrisþega en annars aðeins að undangenginni samþykkt á umsókn.
Föst tanngervi og tannplantar í tenntan góm
Sjúkratryggingar taka þátt í að greiða kostnað lífeyrisþega vegna tannplanta eða annars fasts tanngervis í tenntan góm.
Tenntur gómur: Ein eða fleiri eigin tennur í efri góm eða neðri góm.
146.677 króna styrkur er veittur vegna tannplanta eða annars fasts tanngervis í tenntan góm framan við 12 ára jaxla á hverju 12 mánaða tímabili sem miðast við meðferðardag.
Ekki þarf að sækja um styrkinn. Tannlæknir lækkar reikninginn sem honum nemur.
Þeir einstaklingar sem fullnýtt hafa eldri styrk vegna smíði fastra tanngerva og tannplanta fyrir 1. júlí 2024 geta átt rétt á mismun á þessari fjárhæð og því sem þeir hafa áður fengið greitt, enda sé um nýja meðferð að ræða (á öðrum tönnum/tannstæðum en áður var styrkt) og sú meðferð veitt eftir 1. júlí 2024.
Sjúkratryggingar taka ekki þátt í kostnaði við endurgerð tannplanta eða fastra tanngerva ef minna en tíu ár eru liðin frá því að tannplanti eða fast tanngervi var sett á sömu tönn eða tannstæði.
Tannplantar í tannlausan góm
Sjúkratryggingar greiða 75% af kostnaði lífeyrisþega við ísetningu tannplanta í tannlausan góm til stuðnings tanngervi. Einnig er heimilt að taka þátt í kostnaði við fast tanngervi.
Tannlaus gómur: Engin eigin tönn í efri eða neðri góm.
Tannlæknir sækir um greiðsluþátttöku fyrir skjólstæðinginn og bíður eftir samþykki áður en meðferð hefst.
Ef umsókn er samþykkt niðurgreiða Sjúkratryggingar 2 fyrstu tannplanta í neðri góm og fyrstu 4 tannplanta í efri góm.
Sjúkratryggingar taka ekki þátt í kostnaði við ísetningu tannplanta í tenntan og tannlausan góm á sama 12 mánaða tímabili.
Sjúkratryggingar greiða 100% kostnað við almennar tannlækningar samkvæmt gjaldskrá þeirra sem falla undir skilgreiningu langveikra einstaklinga.
Til langveikra teljast öryrkjar og aldraðir sem eru langsjúkir og dveljast á sjúkrahúsum, hjúkrunarheimilum eða hjúkrunarrýmum á öldrunarstofnunum.
Langsjúkur er elli- eða örorkulífeyrisþegi sem hefur verið lengur en í mánuð samfellt á sjúkrahúsi sem er á föstum fjárlögum og dvölin hefur varað lengur en sex mánuði undanfarna tólf mánuði. Sama á við ef ljóst er frá upphafi að um varanlega dvöl á hjúkrunarheimili eða í hjúkrunarrými öldrunarstofnunar er að ræða.
Sjúkratryggingar greiða 100% kostnað við almennar tannlækningar samkvæmt gjaldskrá þeirra sem eru 18 ára eða eldri og hafa greinst með andlega þroskahömlun.
Andleg þroskahömlun þarf að vera staðfest sem greininguna væg, miðlungs, alvarleg eða svæsin þroskahefting (F70-73 samkvæmt ICD-10 flokkunarkerfi heilbrigðisþjónustu).
Sækja þarf um aukna greiðsluþátttöku til Sjúkratrygginga vegna þeirra.
Sjúkratryggingar taka þátt í kostnaði vegna nauðsynlegra tannlækninga og tannréttinga vegna alvarlegra afleiðinga meðfæddra galla, slysa og sjúkdóma.
Aðkeyptur tannsmíðakostnaður og rannsóknir greiðast saman í hlutfalli við vinnu tannlæknis að ákveðnu hámarki.
Ef um tannréttingar er að ræða er skilyrði að þjónustan sé veitt af sérfræðingi í tannréttingum.
Ef kjálkafærsluaðgerð er nauðsynleg vegna tannréttinga er skilyrði að sú meðferð sé veitt af sérfræðingi í munn- og kjálkaskurðlækningum.
Nauðsynlegt er að sækja um greiðsluþátttöku Sjúkratrygginga vegna þess áður en meðferð, önnur en bráðameðferð, hefst. Tannlæknar senda umsóknir til Sjúkratrygginga fyrir skjólstæðinga sína.
Tannlækningar vegna alvarlegra afleiðinga meðfæddra galla og sjúkdóma
Sjúkratryggingar taka þátt í kostnaði vegna nauðsynlegra tannlækninga, annarra en tannréttinga, vegna eftirtalinna atvika:
Meðfæddrar vöntunar einnar eða fleiri fullorðinstanna framan við 12 ára jaxla, sbr. þó 12. gr.
Vansköpunar fullorðinstanna framan við 12 ára jaxla sem leiðir til alvarlegra útlitsgalla eða starfrænna truflana tyggingarfæra.
Rangstæðra tanna, þ.m.t. endajaxla, sem tengdar eru meini (cystu eða æxli), kjálkabeindrepi eða vegna kjálkafærsluaðgerðar.
Tanna, annarra en endajaxla, sem líklegar eru til þess að valda skaða eða hafa valdið skaða á nærliggjandi fullorðinstönnum eða stoðvefjum þeirra eða hindra uppkomu þeirra.
Alvarlegra einkenna frá kjálkaliðum eða tyggivöðvum.
Alvarlegrar sýrueyðingar glerungs og tannbeins fullorðinstanna framan við 12 ára jaxla.
Alvarlegs niðurbrots á stoðvefjum tanna framan við 12 ára jaxla.
Alvarlegra tannskemmda, framan við 12 ára jaxla sem leiða af varanlega alvarlega skertri munnvatnsframleiðslu af völdum geislameðferðar, Sjögrens-sjúkdóms eða lyfja.
Annarra sambærilegra alvarlegra tilvika.
Tannlækningar og tannréttingar vegna alvarlegra afleiðinga meðfæddra galla og sjúkdóma
Sjúkratryggingar greiða 95% af kostnaði vegna nauðsynlegra og tímabærra tannlækninga og tannréttinga vegna eftirtalinna tilvika samkvæmt gjaldskrá og með þeim takmörkunum sem þar koma fram:
Alvarlegrar tannskekkju vegna skarðs í efri tannboga eða klofins góms.
Heilkenna (Craniofacial Syndrome/Deformity) sem valda tannvanda sambærilegum við alvarleg tilvik sem falla undir fyrsta tölulið.
Meðfæddrar vöntunar einnar eða fleiri framtanna eða augntanna í efri gómi eða vöntunar tveggja samliggjandi fullorðinstanna framan við 12 ára jaxla.
Misræmis í vexti beina í höfuðkúpu og kjálkum sem hefur valdið tannvanda sambærilegum við alvarleg tilvik sem falla undir ofangreinda töluliði. Þá er það forsenda greiðsluþátttöku að kjálkafærsluaðgerð sé þáttur í meðferðaráætluninni og að aðgerðin feli í sér að bein séu tekin sundur og fest á nýjum stað í sömu aðgerð.
Sjúkratryggingar taka þátt í kostnaði samkvæmt gjaldskrá með þeim takmörkunum sem þar koma fram.
Ef tanntjón verður er mikilvægt að tilkynna það.
Hinn slasaði eða forráðamaður barns skal tilkynna vátryggingarfélagi sínu tjónið.
Tannlæknir sem sinnir einstaklingi fyrst eftir slys sendir Sjúkratryggingum áverkavottorð.
Fyrst skal leita bóta vegna tannskaða til vátryggingarfélags Ef hvorki vátryggingarfélag né slysatryggingar greiða bætur þá er hægt að sækja um að Sjúkratryggingar niðurgreiði tannlækningar.
Tannskaði vegna slysa
Ef tannskaði er bótaskyldur hjá Sjúkratryggingum greiða Sjúkratryggingar:
Börn yngri en 18 ára:
100% kostnaður.
18 ára og eldri:
80% kostnaðar samkvæmt gjaldskrá með takmörkunum við tannlækningar (ekki tannréttingar).
Alvarlegur tannskaði vegna slysa
Alvarlegur tannskaði getur til dæmis verið ef 4 eða fleiri fullorðinstennur tapast.
Ef tannskaði er bótaskyldur hjá Sjúkratryggingum greiða Sjúkratryggingar:
95% kostnaðar samkvæmt gjaldskrá með takmörkunum.
Tanntjón í vinnuslysum
Reglur slysatrygginga gilda um tanntjón í vinnuslysum. Í alvarlegum tilvikum er greitt kostnaður af gjaldskrá Sjúkratrygginga.
Tannskaði vegna líkamsárása
Tanntjón vegna líkamsárása greiðist ekki af Sjúkratryggingum. Bætur vegna þeirra skal sækja til árásarmanns eða bótasjóðs þolenda ofbeldis hjá dómsmálaráðuneytinu.
Kostnaður við meðferð
Tannlæknar eru aðilar að samningum við Sjúkratryggingar og þekkja reglur um endurgreiðslu. Þeir leggja mat á hvaða meðferð einstaklingur þarf og geta kannað greiðsluþátttöku Sjúkratrygginga áður en meðferð hefst.
Ef um ræðir meðferð sem greidd er af Sjúkratryggingum þá vinna tannlæknar samkvæmt gjaldskrá Sjúkratrygginga.
Tannlækni ber skylda til að upplýsa einstakling um kostnað við meðferðina áður en meðferð hefst.
Endurgreiðsla frá Sjúkratryggingum
Ekki er um beina endurgreiðslu að ræða til einstaklings. Sjúkratryggingar greiða sinn hluta kostnaðarins beint til tannlæknis sem rukkar einstakling um það sem hann þarf að greiða.
Ef þú finnur ekki þær upplýsingar sem þig vantar þá geturðu sent Sjúkratryggingum fyrirspurn