Skráning loftfara
Skráning loftfars
Með skráningu er loftfar fært í íslenska loftfaraskrá, fær íslenskt þjóðerni og verður hluti af því eftirlits- og réttindakerfi sem gildir um loftför á Íslandi. Meginreglurnar er að finna í V. kafla laga um loftferðir nr. 80/2022.
Hver getur skráð loftfar á Íslandi?
Samkvæmt 42. gr. laga um loftferðir er heimilt að skrá loftfar hér á landi ef það er í eigu íslenska ríkisins, sveitarfélaga eða opinberra stofnana hér á landi, íslenskra ríkisborgara eða ríkisborgara ríkja sem Ísland hefur samið við, eða lögaðila sem hafa höfuðstöðvar eða aðalaðsetur hér á landi eða í ríki sem Ísland hefur samið við.
Umsókn og nauðsynleg gögn
Umsókn um skráningu loftfars þarf skila inn ásamt fylgigögnum sem sýna að umsækjandi sé eigandi loftfarsins og hver fari með umráð þess. Ef eignarréttur umsækjanda er háður skilyrðum eða takmörkunum sem geta leitt til þess að eignarrétturinn færist til annars aðila, skal það koma fram í umsókn.
Loftfar verður almennt ekki skráð nema það hafi gilt tegundarvottorð, takmarkað tegundarvottorð eða flugleyfi sem EASA hefur gefið út eða Samgöngustofa metur gilt. Þó er heimilt að skrá tiltekin loftför sem falla utan EASA-kerfisins, þar á meðal heimasmíðuð loftför og létt loftför sem talin eru áhættulítil, ef þau uppfylla viðeigandi kröfur til lofthæfis og unnt er að tryggja örugga starfrækslu þeirra.
Loftfar sem þegar er skráð erlendis verður þó ekki skráð á Íslandi fyrr en það hefur verið tekið af erlendri skrá.
Breytingar eftir skráningu
Skráning er ekki endanlegt formsatriði sem lýkur allri skyldu eiganda eða umráðanda. Verði eigendaskipti á loftfari, eigandi breytir ríkisfangi sínu eða gerð er breyting á loftfarinu sem skiptir máli um kennsl á því, skal eigandi tafarlaust tilkynna Samgöngustofu breytinguna og leggja fram nauðsynleg gögn. Ef eigendaskipti verða með samningi hvílir tilkynningarskylda einnig á afsalsgjafa.
Sérreglur gilda einnig um sölu gegn afborgunum með eignarréttarfyrirvara og um kaup- eða fjármögnunarleigu. Slíka samninga skal tilkynna tafarlaust til Samgöngustofu, og tilkynningarskylda hvílir bæði á eiganda og umráðanda. Ef skráð loftfar er látið í forræði leigutaka eða annars aðila sem notar það á eigin kostnað, þarf sá aðili að afla samþykkis Samgöngustofu áður en notkun hefst.
Afskráning loftfars
Loftfar skal tekið af skrá þegar skráður eigandi óskar eftir því, þegar skilyrði skráningar eru ekki lengur uppfyllt og Samgöngustofa heimilar ekki að skráning haldist, þegar loftfar er rifið eða hefur eyðilagst, eða þegar loftfar er horfið og þrír mánuðir eru liðnir frá því að síðasta flug hófst án þess að vitað sé að það sé enn óskaddað.
Ef á loftfari hvíla skráð réttindi sem meta skal gild hér á landi samkvæmt þjóðréttarlegum skuldbindingum, má ekki taka loftfarið á íslenska skrá nema rétthöfum hafi verið gerð full skil, þeir samþykki flutninginn eða réttindin séu niður fallin við nauðungarsölu. Þetta atriði getur skipt miklu máli þegar loftfar er fjármagnað með veði, fjármögnunarleigu eða öðrum tryggingarréttindum.
Einnig má taka loftfar af skrá ef það hefur ekki haft gilt lofthæfisvottorð, takmarkað lofthæfis- eða þjóðar lofthæfisvottorð, flugleyfi eða heimild í þrjú ár og eigandi aflar ekki slíks vottorðs, leyfis eða heimildar innan frests sem Samgöngustofa setur. Ef skráð réttindi hvíla á loftfarinu skal það almennt ekki tekið af loftfaraskrá nema rétthafi samþykki það, nema sérstakar undantekningar eigi við.
Umsóknir
Lög og reglur
Þjónustuaðili
Samgöngustofa