Hlutverk sjóðsins, verklagsreglur, ársreikningar og úthlutaðir styrkir
Hlutverk Fiskræktarsjóðs
Meginhlutverk Fiskræktarsjóðs er að veita lán og styrki til verkefna sem hafa það að markmiði að:
efla fiskrækt,
bæta veiðiaðstöðu,
styðja við rannsóknir í ám og vötnum,
og auka verðmæti veiði úr ám og vötnum.
Stjórn sjóðsins
Fiskræktarsjóður er skipaður fjögurra manna stjórn sem atvinnuvegaráðherra skipar til fjögurra ára í senn.
Tveir stjórnarmenn eru skipaðir samkvæmt tilnefningu Landssambands veiðifélaga.
Einn stjórnarmaður er skipaður samkvæmt tilnefningu Landssambands stangaveiðifélaga.
Atvinnuvegaráðherra skipar formann stjórnarinnar.
Aðalmenn:
Hermann Brynjarsson, skipaður formaður án tilnefningar
Ólafur Þór Þórarinsson, tilnefndur af Landssambandi veiðifélaga
Drífa Hjartardóttir, tilnefnd af Landssambandi veiðifélaga
Brynja Gunnarsdóttir, tilnefnd af Landssambandi stangaveiðifélaga
Varamenn:
Guðrún Una Jónsdóttir, skipuð varaformaður án tilnefningar
Jón Helgi Björnsson, tilnefndur af Landssambandi veiðifélaga
Þuríður Björg Wiium Árnadóttir, tilnefnd af Landssambandi veiðifélaga
Jón Þór Ólason, tilnefndur af Landssambandi stangaveiðifélaga.
I. Um Fiskræktarsjóð
Fiskræktarsjóður starfar á grundvelli laga um Fiskræktarsjóð og er á forræði atvinnuvegaráðherra, samanber 1. grein laga (með síðari breytingum) um Fiskræktarsjóð.
Meginhlutverk sjóðsins er að veita lán og styrki til verkefna sem þjóna þeim markmiðum að viðhalda og efla lífríki í ám og vötnum ásamt því að auka verðmæti veiði úr þeim.
II. Hverjir geta fengið styrk?
Styrkir Fiskræktarsjóðs eru ætlaðir:
veiðifélögum
einstaklingum
rannsókna- og háskólastofnunum
öðrum lögaðilum
Fiskræktarsjóður gerir kröfu um að fyrir liggi fjármögnun verkefnisins eða verkhlutans sem sótt er um styrk til. Veittir eru styrkir til eins árs í senn.
Ef um framhaldsumsókn er að ræða er gerð krafa um að framvinduskýrsla fylgi styrkumsókn.
III. Umsóknarfrestur 1. mars ár hvert
Umsóknir um lán og styrki úr Fiskræktarsjóði skal senda stjórn sjóðsins fyrir 1. mars ár hvert. Umsóknir sem berast eftir þann tíma eru ekki teknar fyrir.
Umsóknum skal skila á rafrænu eyðublaði en umsóknir á pappírsformi eru ekki teknar gildar.
IV. Mat á umsóknum
Fiskræktarsjóður lýtur fjögurra manna stjórn sem atvinnuvegaráðherra skipar til fjögurra ára í senn. Hún leggur faglegt mat á umsóknir, forgangsraðar verkefnum og ákveður styrkupphæð.
Við mat á umsóknum er lögð áhersla á:
nýnæmi í rannsóknum og framkvæmdum til að ná sem best markmiðum sjóðsins,
hæfni umsækjenda til að leysa verkefnið, þar á meðal þekkingu, reynslu og aðstöðu,
raunhæfni áætlana (verk-, kostnaðar- og fjármögnunaráætlunar).
Einnig er litið til samstarfs við fagaðila og þess hvort verkefnin séu í þágu heildarhagsmuna.
Fiskræktarsjóði er heimilt að afla umsagna Fiskistofu um umsóknir um lán eða styrki, þyki þess þörf. Jafnframt er sjóðnum heimilt að ákveða að greiða úthlutanir í áföngum eftir framvindu verkefna.
V. Eftirlit
Fiskræktarsjóður getur farið fram á að styrkþegi sýni fram á að fjármögnun verkefnisins sé í samræmi við umsókn áður en til greiðslu styrks kemur. Fiskræktarsjóður gerir ráð fyrir eftirfylgni með þeim verkefnum sem hann hefur stutt.
Stjórn Fiskræktarsjóðs getur óskað eftir því að styrkhafar upplýsi Fiskræktarsjóð skriflega um stöðu framkvæmda. Fiskræktarsjóður hefur rétt til að krefja styrkhafa um endurgreiðslu hafi framkvæmdir ekki hafist innan árs frá úthlutun.
VI. Úthlutun
Ákvarðanir um styrki og lán úr sjóðnum eru teknar af stjórn sjóðsins. Um málsmeðferð við veitingu lána og styrkja gilda ákvæði stjórnsýslulaga.
VII. Upplýsingaskylda Fiskræktarsjóðs
Þar sem um opinberan sjóð er að ræða upplýsir Fiskræktarsjóður á vef Fiskistofu um þá styrki sem hann veitir. Almennt munu upplýsingarnar þó takmarkaðar við:
upplýsingar um nafn viðtakenda,
fjárhæð styrks,
heiti og markmið verkefnis.
Aðrar upplýsingar í umsóknum er varða fjárhags- eða viðskiptahagsmuni umsækjenda og annarra lögaðila er tengjast verkefnum á vegum Fiskræktarsjóðs verður hins vegar farið með sem trúnaðarmál.
VIII. Gildistími
Reglur þessar eru settar samkvæmt heimild í 1. málsgrein 8. grein laga um Fiskræktarsjóð, með síðari breytingum og gilda fyrir úthlutun ársins 2026.
Þjónustuaðili
Fiskistofa