Sérstök framlög með barni

Sérstök framlög geta komið frá Tryggingastofnun (TR) í eftirfarandi tilfellum:

• þegar barn hefur misst annað foreldri sitt

• þegar barn er ófeðrað

• þegar móður barns nýtur ekki við vegna sérstakra eða óvenjulegra aðstæðna

Skilyrði fyrir rétti til framlags er að barnalífeyrir sé greiddur með barninu.

Kröfufrestur

Kröfu þarf að leggja fram innan þriggja mánaða frá því að til útgjalda kom. Undantekningar eru:

• Í tengslum við fermingar þarf að leggja fram kröfu innan þriggja mánaða frá fermingardegi en reikningar vegna undirbúnings mega vera eldri.

• Þegar um tannréttingar er að ræða getur verið eðlilegt að bíða með kröfu vegna slíkra aðgerða þar til meðferð líkur þ.e. þegar teinar eða spangir eru fjarlægð af tönnum. Krafan þarf þá að berast innan þriggja mánaða frá þeim degi.

Fylgigögn

Fylgigögn með umsókn eru eftir atvikum:

• reikningar/kvittanir til staðfestingar á útgjöldum

• dánarvottorð foreldris ef foreldri var ekki skráð í þjóðskrá

• önnur gögn eins og við á

Ef tannréttingar:

• yfirlýsing tannréttingalæknis um framvindu og kostnað meðferðar

Ef sjúkdómur barns.

• læknisvottorð

Ferlið

Sýslumaður aflar upplýsinga frá TR og öðrum aðilum eins og við á og kveður upp úrskurð um hvort TR sé heimilt að greiða framlagið. Hægt er að sækja um greiðslu frá TR þegar úrskurður sýslumanns liggur fyrir.  Sótt er um rafrænt á www.tr.is

Kærufrestur

Fái foreldri synjun um sérstakt framlag er hægt að kæra niðurstöðuna til úrskurðanefndar velferðarmála. Kærufrestur er þrír mánuðir frá dagsetningu úrskurðar sýslumanns.