Sækja um nýjan grunnskóla

Börn hafa almennt forgang í sinn hverfisskóla. Forsjáraðilar geta þó ávallt sótt um skólavist í öðrum grunnskóla innan sveitarfélagsins, utan sveitarfélagsins eða í sjálfstætt starfandi skóla.

Umsóknarferli

Í umsókninni er valinn sá skóli sem óskað er eftir og greint frá ástæðu flutnings.

Sækja um skólaskipti innan sveitarfélags

Hægt er að óska eftir flutningi milli skóla í sveitarfélaginu þar sem barnið á lögheimili.

• Ef barnið er að flytja lögheimili í annað skólahverfi á það forgang í þann hverfisskóla.

• Ef sótt er um af öðrum ástæðum er skólavist háð því að pláss sé í skólanum. Reglur um skólahverfi, umsókn og innritun í grunnskóla má nálgast á vefsvæðum sveitarfélaganna.

Enginn umsóknarfrestur er á umsókn um skólaskipti innan sveitarfélags.

Skólinn sem sótt er um sendir staðfestingu á samþykki eða synjun um skólavist til forsjáraðila.

Barnið er áfram skráð í núverandi skóla þar til umsókn hefur verið samþykkt og flutningur hefst formlega.

Að flytja lögheimili en halda áfram í sama skóla

Barn sem flytur milli skólahverfa innan sveitarfélags þarf ekki að skipta um skóla eða sækja um áframhaldandi skólavist.

Barn er áfram skráð í núverandi skóla þangað til forsjáraðili hefur sótt um skólaskipti og umsókn hefur verið samþykkt.

Sækja um skóla í öðru sveitarfélagi, einkaskóla eða alþjóðaskóla

Greiðsluþáttaka sveitarfélags er forsenda þess að barnið fái skólavist í:

• skóla í öðru sveitarfélagi en því sem barnið er með lögheimili

• einkaskóla - sem er sjálfstætt starfandi grunnskóli

• alþjóðaskóla - sem eru sjálfstætt starfandi grunnskólar sem kenna á ensku og eftir alþjóðlegri námskrá

Ólíkt er milli sveitarfélaga hvort hámark sé á fjölda þeirra barna sem fá samþykkta greiðsluþátttöku.

Umsóknin gildir fyrir eitt skólaár í senn.

Afgreiðsla umsókna vegna greiðsluþátttöku

Umsóknin berst til sveitarfélagsins þar sem barnið á lögheimili sem tekur afstöðu til greiðsluþátttökunnar.

• Ef greiðsluþátttöku er synjað fær forsjáraðili svar frá sveitarfélaginu ásamt rökstuðningi.

• Ef greiðsluþátttaka er samþykkt er umsókn send áfram með rafrænum hætti til þess skóla sem óskað er eftir.

Afgreiðsla umsóknar um skólavist

Skólinn tekur afstöðu til umsóknarinnar og sendir staðfestingu á samþykki eða synjun til forsjáraðila og sveitarfélagsins þar sem barn á lögheimili.

Kostnaður

Þegar sótt er um einkaskóla eða alþjóðaskóla þurfa forsjáraðilar að gera ráð fyrir kostnaði sem fellur ekki undir greiðsluþátttöku sveitarfélaganna, svo sem skráningargjöldum.