Ef þú þarft að leggjast inn á sjúkrahús eða ert í meðferð á göngudeild, þá er ýmislegt sem er gott að hafa í huga.

Áður en þú mætir

Þegar þú pakkar niður skaltu athuga eftirfarandi:

Þú þarft að koma með

• eigin lyf, lyfjakort og yfirlit yfir lyf úr lyfjaskömmtun

• hjálpartæki, eins og staf, göngugrind eða hjólastól, ef þú notar þau

Gott að taka með

• snyrtivörur sem þú vilt nota

• millimál, ef þú verður svangur, eins og drykki, ávexti eða kex

• afþreyingu, til dæmis bækur, farsíma eða fartölvu

Landspítali ber ekki ábyrgð ef eigur sjúklinga eða gesta tapast eða skemmast.

Skildu peninga, skartgripi eða önnur verðmæti eftir heima ef þú getur.

Við innlögn

Lyf og lyfjagjafir

Þú þarft að upplýsa starfsfólk deildar eða innskriftarmiðstöðvar um:

• öll lyf sem þú notar eins og augndropa, insúlínpenna, púst, getnaðarvarnir, hormón, krem eða sérhæfð lyf og afhenda þau til varðveislu og endurmats.

• fæðubótarefni og vítamín sem þú tekur

• lyf sem þú tekur við tímabundnum kvillum, eins og höfuðverk

Læknar ákveða hvaða lyf þú þarft á meðan þú ert inniliggjandi og hjúkrunarfræðingar sjá um lyfjagjöf.