Þátttaka í skimun fyrir krabbameini í ristli og endaþarmi
Skimun fyrir krabbameini í ristli og endaþarmi er rannsókn sem leitar að blóði í hægðum hjá einkennalausum einstaklingum. Markmiðið er að greina forstig eða byrjunarstig krabbameina, sem auðveldar meðferð og bætir lífslíkur.
Boð í skimun
Einstaklingar á aldrinum 60 til 69 ára og með lögheimili á Íslandi, er boðin þátttaka annað hvert ár.
Þú færð rafrænt boð um skimun á Heilsuveru.
Sýnatökusett er sent í pósti til þín.
Þú tekur hægðarsýni heima.
Þú skilar sýninu á heilsugæslustöð eða setur í póst í umslagi sem fylgir sýnatökusettinu, merkt rannsóknastofu Landspítala., sem rannsakar sýnið og athugar hvort blóð sé í því.
Þú getur einnig afþakkað boð um þátttöku.
Ef þú ert í meðferð eða eftirliti vegna sepa, krabbameins eða bólgusjúkdóms í ristli og endaþarmi ættir þú líklega ekki að taka þátt í skimun. Ræddu það við við lækninn þinn eða Samhæfingarstöð krabbameinsskimana.
Niðurstöður skimunar
Niðurstöður úr skimun eru sendar til þín rafrænt á Heilsuveru innan fjögurra vikna.
Ef ekkert blóð greinist í sýninu, verður þér sent boð um að taka aftur þátt í skimuninni eftir tvö ár.
Ef blóð greinist í hægðasýninu verður þér boðin speglun á ristli og endaþarmi innan fjögurra vikna, sem getur greint hvort krabbamein, eða forstig krabbameins, sé til staðar.
Ef þú afþakkar ristilspeglun, verður þér aftur boðin þátttaka í skimun með hægðaprófi eftir tvö ár.
Fræðsluefni
Bæklingur um skimun vegna krabbameins í ristli og endaþarmi er aðgengilegur á þremur tungumálum.
Þjónustuaðili
Heilsugæsla höfuðborgarsvæðisins